បរទេស៖ យោងតាមប្រភពព័ត៌មានពី BBC បានរាយការណ៍ថា​ អាម៉េរិក និងចិន បានចាប់ផ្តើមកិច្ចចរចាជាថ្មី ជាមួយនឹងក្ដីសង្ឃឹមថា ប្រទេសមហាអំណាចទាំងពីរអាចយល់ព្រមបន្តក្របខណ្ឌកាត់បន្ថយភាពតានតឹងពាណិជ្ជកម្មបន្ថែមទៀត។

កាលពីថ្ងៃចន្ទសប្ដាហ៍នេះ កិច្ចប្រជុំរវាងអាម៉េរិក និងចិន បានកើតឡើងម្តងទៀតនៅប្រទេសស៊ុយអែត ដែលដឹកនាំដោយភាគីទីក្រុងវ៉ាស៊ីនតោន ដោយមានរដ្ឋមន្ត្រីក្រសួងរតនាគារ លោក Scott Bessent និងភាគីទីក្រុងប៉េកាំង ដោយឧបនាយករដ្ឋមន្ត្រី លោក He Lifeng ខណៈដែលក្របខណ្ឌកាត់បន្ថយភាពតានតឹងពាណិជ្ជកម្មរយៈពេល ៩០ ថ្ងៃរវាងមហាអំណាចទាំងពីរជិតផុតកំណត់នៅថ្ងៃទី ១២ ខែសីហា។

កាលពីសប្តាហ៍មុន លោក Scott Bessent បាននិយាយថា កិច្ចពិភាក្សាជាមួយប្រទេសចិនគឺស្ថិតនៅក្នុងដំណាក់កាលល្អមួយ និងសង្ឃឹមថា ជុំថ្មីនៃកិច្ចចរចាអាចបណ្តាលឱ្យមានក្របខណ្ឌកាត់បន្ថយភាពតានតឹងពាណិជ្ជកម្មជាលើកទីពីរ។ គេរំពឹងថា ​អាម៉េរិក និង​ចិន​ អាច​នឹង​បន្តក្របខណ្ឌកាត់បន្ថយភាពតានតឹងពាណិជ្ជកម្មថែម​រយៈពេល ៣ ខែ​ទៀត។ ទន្ទឹមនឹងនេះ សហរដ្ឋអាមេរិកបានផ្អាកការរឹតបន្តឹងលើការនាំចេញបច្ចេកវិទ្យាទៅកាន់ប្រទេសចិន ដើម្បីជៀសវាងការប៉ះពាល់ដល់កិច្ចពិភាក្សាពាណិជ្ជកម្មរវាង Donald Trump និងប្រធានាធិបតីចិន Xi Jinping។

ទន្ទឹមនឹងនេះ គេសង្ឃឹមថា កិច្ចចរចារវាងអាម៉េរិក និងចិនចុងក្រោយនេះនឹងទទួលបានលទ្ធផលល្អ ដោយសារនាពេលថ្មីៗនេះ ការចរចាពាណិជ្ជកម្មរបស់ប្រទេសភាគច្រើនទទួលបានជោគជ័យ។ កាលពីថ្ងៃអាទិត្យ Trump និងប្រធានគណៈកម្មការអឺរ៉ុប Ursula von der Leyen បានប្រកាសអំពីក្របខ័ណ្ឌកិច្ចព្រមព្រៀងពាណិជ្ជកម្មរវាងអាម៉េរិក និងសហភាពអឺរ៉ុប។ កាលពីសប្តាហ៍មុន ទីក្រុងវ៉ាស៊ីនតោនបានយល់ព្រមលើកិច្ចព្រមព្រៀងពាណិជ្ជកម្មដ៏ធំមួយមិនធ្លាប់មានជាមួយទីក្រុងតូក្យូផងដែរ ដោយនៅក្រោមកិច្ចព្រមព្រៀងនេះ ជប៉ុននឹងវិនិយោគ ៥៥០ ពាន់លានដុល្លារនៅក្នុងអាម៉េរិក។ នៅខាងអាស៊ីអាគ្នេយ៍វិញឥណ្ឌូណេស៊ី និង​វៀតណាមក៏ត្រូវបានបន្ទាបពន្ធដោយអាម៉េរិកផងដែរ បន្ទាប់ពីចរចារពាណិជ្ជកម្មជាមួយនឹង Trump បានជោគជ័យ។

សូមរំលឹកថា ចាប់តាំងពីប្រធានាធិបតី Donald Trump មកកាន់អំណាចជាលើកទីពីរ អាម៉េរិក និងចិន បានដំឡើងពន្ធគ្នាទៅវិញទៅមកលើសពីអត្រា ១០០%។ ក្រោយមក មហាអំណាចទាំងពីរបានព្រមព្រៀងផ្អាកការយកពន្ធគយនេះក្នុងរយៈពេល ៩០ ថ្ងៃ បន្ទាប់ពីមានការជួបប្រជុំគ្នានៅទីក្រុងហ្សឺណែវ និងទីក្រុងឡុងដ៍កាលពីដើមឆ្នាំនេះ។ មិនត្រឹមតែប៉ុណ្ណោះ ការនាំចេញបច្ចេកវិទ្យាជាពិសេសបន្ទះឈីបដែលប្រើសម្រាប់បញ្ញាសិប្បនិម្មិត (AI) គឺជាចំណុចក្តៅគគុកមួយនៃជម្លោះពាណិជ្ជកម្ម ដោយអាម៉េរិកព្រួយបារម្ភថា បន្ទះឈីបកម្រិតខ្ពស់របស់ខ្លួនអាចត្រូវបានប្រើប្រាស់ដោយយោធារបស់ចិន និងជួយក្រុមហ៊ុនរបស់ចិនក្នុងការប្រជែងគ្នាសម្រាប់ការច្នៃប្រឌិត៕