បរទេស៖ សហរដ្ឋអាម៉េរិកអាចនឹងកាត់បន្ថយពន្ធមកនៅត្រឹម ១៥% ទៅ ១៦% លើការនាំចូលពីឥណ្ឌា ខណៈដែលប្រទេសទាំងពីរកំពុងខិតជិតទៅរកកិច្ចព្រមព្រៀងពាណិជ្ជកម្ម នេះបើយោងទៅតាមប្រភពព័ត៌មានពី CNBC។

បច្ចុប្បន្ន ប្រទេសឥណ្ឌាកំពុងពិចារណាលើការបង្កើនការនាំចូលពោតពីអាម៉េរិក និងកាត់បន្ថយការទិញប្រេងពីរុស្ស៊ី។ កាលពីថ្ងៃអង្គារ៍ ប្រធានាធិបតីសហរដ្ឋអាម៉េរិក លោក Donald Trump បានអះអាងថា លោកទទួលបានការធានាពីនាយករដ្ឋមន្ត្រីឥណ្ឌា លោក Narendra Modi ថា ទីក្រុងងញូដេលីនឹងកាត់បន្ថយការទិញប្រេងពីរុស្ស៊ី។

នៅលើបណ្តាញសង្គម X កាលពីថ្ងៃពុធ សប្ដាហ៍នេះ នាយករដ្ឋមន្ត្រីឥណ្ឌា លោក Narendra Modi បានបញ្ជាក់ពីការសន្ទនាតាមទូរស័ព្ទជាមួយ Trump ជាមួយនឹងក្តីសង្ឃឹមថា ប្រទេសទាំងពីរនៅតែបន្តរួបរួមគ្នាប្រឆាំងនឹងអំពើភេរវកម្មក្នុងគ្រប់ទម្រង់ទាំងអស់ ប៉ុន្តែមិនបាននិយាយអំពីជំហររបស់ឥណ្ឌាចំពោះប្រេងរុស្ស៊ីនោះទេ។ គួរឲ្យបញ្ជាក់ដែរថា ប្រេងរុស្ស៊ីគឺជាបញ្ហាមួយក្នុងចំណោមបញ្ហាជម្លោះនៅក្នុងកិច្ចចរចាពាណិជ្ជកម្មទ្វេភាគីដែលអូសបន្លាយរវាងសហរដ្ឋអាម៉េរិក និងឥណ្ឌា។ ចាប់តាំងពីមានសង្រ្គាមរុស្ស៊ី-អ៊ុយក្រែនក្នុងឆ្នាំ២០២២ ឥណ្ឌាបានក្លាយជាអ្នកទិញប្រេងឆៅធំជាងគេទី២ របស់ពិភពលោកបន្ទាប់ពីចិន ដោយបាននាំចូលប្រេង ១,៦ លានបារ៉ែលក្នុងមួយថ្ងៃនៅឆ្នាំនេះ កើនឡើងពី ៥ ម៉ឺនបារ៉ែលក្នុងមួយថ្ងៃនៅឆ្នាំ២០២០។ កាលពីខែសីហា កន្លងទៅ លោក Trump បានដំឡើងពន្ធបន្ថែម ២៥% លើការនាំចូលពីឥណ្ឌា ដែលធ្វើឲ្យទំនិញភាគច្រើនជាប់ពន្ធរហូតដល់ ៥០% ដោយសារពាក់ព័ន្ធនឹងការទិញប្រេងពីរុស្សី ។ មិនត្រឹមតែប៉ុណ្ណោះ ទំនាក់ទំនងរវាងអាម៉េរិក និងឥណ្ឌាកាន់តែតានតឹង នៅពេលដែលលោក Modi បានជួបជាមួយប្រធានាធិបតីរុស្ស៊ី លោក Vladimir Putin និងប្រធានាធិបតីចិន Xi Jinping នៅទីក្រុងប៉េកាំងកាលពីខែមុន។

យ៉ាងណាមិញ ក្នុងរយៈពេលប៉ុន្មានសប្តាហ៍ថ្មីៗនេះ លោក Trump ទន់ចិត្តជាងមុន និងបង្ហាញពីភាពវិជ្ជមានចំពោះការចរចាពាណិជ្ជកម្មជាមួយឥណ្ឌាដែលកំពុងបន្ត។ ពាណិជ្ជកម្មទ្វេភាគីរវាងទីក្រុងញូវដេលី និងវ៉ាស៊ីនតោនបានឈានដល់កំណត់ត្រា ១៣២,២ ពាន់លានដុល្លារគិតត្រឹមខែមីនា ឆ្នាំ ២០២៥ ដែលកើនឡើងជាង ១០% ពីឆ្នាំមុន។ បន្ថែមពីនេះ ការនាំចេញរបស់ឥណ្ឌាទៅកាន់អាម៉េរិកបានកើនឡើង ១១,៦% ឬ ៨៦,៥១ ពាន់លានដុល្លារ ខណៈដែលការនាំចូលពីអាម៉េរិកបានកើនឡើង ៨% ឬ ៤៥,៦៩ ពាន់លានដុល្លារ។ ទន្ទឹមនឹងនេះ ប្រភពព័ត៌មានរបស់ឥណ្ឌា Mint រាយការណ៍ថា ការសម្រេចចុងក្រោយនៃកិច្ចព្រមព្រៀងពាណិជ្ជកម្មនឹងទំនងជាត្រូវបានបញ្ជាក់បន្ថែមទៀតនៅក្នុងកិច្ចប្រជុំកំពូលអាស៊ាននៅចុងខែនេះ ទោះបីជាលោក Trump និង Modi មិនទាន់បានបញ្ជាក់ពីការចូលរួមរបស់ពួកគេជាផ្លូវការសម្រាប់ព្រឹត្តិការណ៍នេះក៏ដោយ៕