សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ការរៀបចំទីក្រុងឱ្យមានរបៀបរៀបរយ និងសណ្ដាប់ធ្នាប់ល្អ គឺពិតជាមានសារសំខាន់ណាស់សម្រាប់ការរស់នៅរបស់ប្រជាជន ហើយបើសិនជាការរៀបចំទីក្រុងបានត្រឹមត្រូវ នឹងជួយលើកកម្ពស់ដល់ការរស់នៅរបស់ប្រជាជនកាន់តែប្រសើរ កាត់បន្ថយជំងឺ កាត់បន្ថយបញ្ហាក្នុងសង្គម ដូចជា ជនអនាថា និងគ្រឿងញៀនជាដើម ។
ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានមានប្រសាសន៍ថា នៅលើពិភពលោកនេះ ការរៀបចំក្រុងបានត្រឹមត្រូវ នឹងអាចកាត់បន្ថយបាននូវអត្រានៃអ្នកប្រើប្រាស់គ្រឿងញៀន កាត់បន្ថយជំងឺមិនឆ្លង ជាពិសេស ជំងឺទឹកនោមផ្អែម អ្នកធាត់ អំពើឆក់ប្លន់ក៏នឹងត្រូវថយចុះដែរ ។
ឯកឧត្តមបន្តថា ៖
«ការរៀបចំទីក្រុងបានត្រឹមត្រូវ មានសណ្ដាប់ធ្នាប់ គឺទាក់ទិននឹងការរៀបចំឱ្យមានលំហសាធារណៈ ហើយក្រុងដែលរៀបចំដោយមិនមានលំហសាធារណៈ នឹងបង្កឱ្យពលរដ្ឋមានជំងឺច្រើន អ្នកប្រើប្រាស់គ្រឿងញៀនច្រើន មានករណីបៀតបៀន និងអំពើហិង្សារច្រើន ដូច្នេះហើយ ទើបក្រសួងរៀបចំដែនដី នគរូបនីយកម្ម និងសំណង់ ត្រូវបង្ខំដោះស្រាយអគារមិនរៀបរយ អគារចាស់ទ្រុឌទ្រោម»។
ឯកឧត្តមបន្ថែមថា ៖
«ប្រជាពលរដ្ឋដែលរស់នៅក្នុងអគារមិនរៀបរយ អគារចាស់ទ្រុឌទ្រោម ភាគច្រើនជាមនុស្សដែលត្រូវបានគេបំភ្លេចចោល ហើយអ្នកទាំងនោះ យូរៗទៅនឹងមានគំនិតជ្រុលនិយម ពីព្រោះអ្នកទាំងនោះក៏ពិបាកនឹងជៀសផុតពីគ្រឿងញៀន បៀតបៀន និងហិង្សារនោះដែរ ។ សង្គមយើង បើសិនជារៀបចំក្រុងឱ្យនៅមានអ្នកជ្រុលនិយម ការកាន់អំណាចនឹងមានបញ្ហា ។ ក្នុងន័យនេះ មិនសំដៅដល់ការកាន់អំណាចដើម្បីតែកាន់អំណាចទេ តែយើងត្រូវកាន់អំណាចដើម្បីឱ្យស្រុកទេសរុងរឿង ហើយបច្ចុប្បន្នក៏មិនមានបក្សណាដែលដឹកនាំល្អជាងបក្សប្រជាជនដែរ» ។
ឯកឧត្តមឧបនាយករដ្ឋមន្ត្រីបានបញ្ជាក់ថា ការរៀបចំក្រុងបានល្អមានរបៀបរៀបរយ និងសណ្ដាប់ធ្នាប់ល្អ ក្រសួងរៀបចំដែនដីក៏ត្រូវការមានកិច្ចសហការពីក្រសួងស្ថាប័នផ្សេងទៀត ដូចជា ក្រសួងមហាផ្ទៃ ក៏ត្រូវមានការយល់ពីគ្នាច្បាស់ ហើយត្រូវធ្វើយ៉ាងណាឱ្យគ្រប់ទីក្រុងទាំងអស់ ជាក្រុងដែលងាយស្រួលរស់នៅទោះបីជាម្ចាស់ផ្ទះអត់នៅផ្ទះ មិនចាក់សោរផ្ទះក៏មិនមានបញ្ហា ។
ឯកឧត្តមបញ្ជាក់បន្ថែមថា ការរៀបចំក្រុងគឺដើម្បីឱ្យមានមនុស្សរស់នៅ ដោយមិនចង់ឱ្យមានអគារតែគ្មានមនុស្សរស់នៅ ។ ជាក់ស្ដែងក្រុងបាត់ដំបង និងក្រុងភ្នំពេញ នៅមានអគារមួយចំនួនដែលសង់រួចតែមិនមានមនុស្សរស់នៅ ដូច្នេះ នៅថ្ងៃអនាគត គឺចង់ឱ្យសាងសង់ ឬវិនិយោគអគារឱ្យសមល្មមនឹងចំនួន ដោយមិនចង់ឱ្យមានផ្ទះ មានអគារ តែអត់មនុស្សនៅ ។
គួររម្លឹកថា កន្លងមកក្រសួងរៀបចំដែន ដីនគរូបនីយកម្ម និងសំណង់ បានអញ្ជើញអ្នកជំនាញមកពីទីក្រុងល្បីៗនៅអាស៊ី ដូចជា ទីក្រុងហុងកុង ទីក្រុងសិង្ហបុរី ដើម្បីចែករំលែកពីការរៀបចំក្រុង ពីព្រោះថាក្រុងទាំងនោះ ជាក្រុងដែលបានរៀបចំបានស្អាតល្អ និងមានសណ្ដាប់ធ្នាប់ របៀបរៀបរយ មិនរញ៉េរញ៉ាំ ទោះបីជាក្រុងទាំងនោះមានមនុស្សរស់នៅច្រើនក្ដី ។
ដោយឡែក សម្រាប់កម្ពុជា មានក្រុងមួយចំនួនហើយដែលត្រូវបានរៀបចំ និងដើម្បីសុខុមាលភាពរបស់ពលរដ្ឋ ដូចជា មានផ្លូវថ្មើជើង ផ្លូវជិះកង់ និងកន្លែងហាត់ប្រាណ មានសួនច្បារមានលំហសាធារណៈ ដូចជា ក្រុងសៀមរាប ក្រុងព្រះសីហនុ ហើយថ្មីៗនេះដែរ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក៏បានប្រកាសថានឹងរៀបចំសួនច្បារសាធារណៈចំនួន២ទៀត គឺនៅអតីតព្រលានយន្តហោះអន្តរជាតិភ្នំពេញ និងនៅតំបន់កប់ស្រូវប៉ែកខាងលិចរាជធានីភ្នំពេញ ៕
Account
Security
Favourite Content