បរទេស៖ យោងតាមប្រភពព័ត៌មានពី BBC បានរាយការណ៍ថា សហរដ្ឋអាម៉េរិកនឹងលែងផ្តល់ការឧបត្ថម្ភធនដល់ប្រទេសកូឡុំប៊ី ដែលជាសម្ព័ន្ធមិត្តដ៏ជិតស្និទ្ធបំផុតរបស់ខ្លួននៅអាម៉េរិកខាងត្បូងទៀតហើយ។

កាលពីថ្ងៃអាទិត្យកន្លងទៅនេះ ប្រធានាធិបតីអាម៉េរិក លោក Donald Trump បានប្រកាសពីការសម្រេចចិត្តនេះនៅលើ Truth Social ដោយបានចោទប្រកាន់ថា ប្រធានាធិបតីកូឡុំប៊ី លោក Gustavo Petro គឺជាមេដឹកនាំគ្រឿងញៀនខុសច្បាប់ ដែលនាំឲ្យមានការផលិតគ្រឿងញៀនខ្លាំងក្លាទាំងក្នុងវិស័យធំ និងតូចនៅទូទាំងប្រទេសកូឡុំប៊ី។ ការអត្ថាធិប្បាយរបស់លោក Trump បានកើតឡើងបន្ទាប់ពីលោក Petro បានចោទប្រកាន់សហរដ្ឋអាម៉េរិកថា បានប្រព្រឹត្តសកម្មភាពឃាតកម្មនៅពេលដែលមានការវាយប្រហារយោធានៅលើដែនទឹករបស់ប្រទេសកូឡុំប៊ីកាលពីខែកញ្ញា។ នេះគឺជាស្ថានភាពតានតឹងចុងក្រោយបង្អស់ដែលកើតឡើងរវាងសហរដ្ឋអាម៉េរិក និងប្រទេសនានានៅអាម៉េរិកឡាទីន ខណៈដែលយោធាមហាអំណាចមួយនេះនៅតែបន្តវាយប្រហារលើនាវានៅសមុទ្រ​ Caribbean ដែលខ្លួនបានចោទប្រកាន់ថាមានផ្ទុកគ្រឿងញៀន។

កាលពីខែកញ្ញា កន្លងទៅនេះដែរ អាម៉េរិកបានប្រកាសថា កូឡុំប៊ី បានបរាជ័យក្នុងការរក្សាការសន្យាដោះស្រាយបញ្ហាជួញដូរគ្រឿងញៀន ហើយមិនមានសិទ្ធិទទួលបានជំនួយដូចដែលបានកំណត់ក្នុងច្បាប់ជំនួយបរទេសនោះទេ។ លោក Trump បានលើកឡើងថា អាម៉េរិកបានបង់ប្រាក់ និងផ្តល់ការឧបត្ថម្ភធំហើយ ប៉ុន្តែលោក Petro មិនបានធ្វើអ្វីសោះដើម្បីបញ្ឈប់ការផលិតថ្នាំញៀន ហើយខ្លួននឹងឈប់ទូទាត់​ ឬ ផ្តល់ការឧបត្ថម្ភធនអ្វីគ្រប់យ៉ាងដល់ប្រទេសនេះទៀតហើយ។

នាយកដ្ឋានរដ្ឋរបស់អាម៉េរិកបានលើកឡើងថា នៅក្រោមការដឹកនាំរបស់លោក Petro ការផលិតកូកាអ៊ីនបានឈានដល់កម្រិតខ្ពស់មួយ ហើយប្រទេសនេះជួបភាពបរាជ័យក្នុងការសម្រេចបាននូវគោលដៅលុបបំបាត់កូកាអ៊ីន។ សូមបញ្ជាក់ថា យោងតាមគេហទំព័ររដ្ឋាភិបាលបានឲ្យដឹងថា អាម៉េរិកបានផ្តល់ជំនួយជាង ៧៤០ លានដុល្លារដល់ប្រទេសកូឡុំប៊ីក្នុងឆ្នាំ២០២៣ ប៉ុន្តែវាមិនច្បាស់ទេថា តើជំនួយទាំងអស់នោះនឹងបញ្ឈប់នៅពេលណា?

កាលពីខែកញ្ញា លោក Petro ក៏ធ្លាប់បានចោទប្រកាន់ទៅលើសហរដ្ឋអាម៉េរិកដែរថា អាម៉េរិកបានរំលោភលើអធិបតេយ្យភាពរបស់ខ្លួនដោយបានសម្លាប់អ្នកនេសាទកូឡុំប៊ីម្នាក់នៅក្នុងការវាយប្រហារនៅលើសមុទ្រ ហើយប្រធានាធិបតីរូបនេះបានបញ្ជាក់ឱ្យដឹងទៀតថា​ អ្នកនេសាទដែលបានបាត់បង់ជីវិតម្នាក់នោះមានឈ្មោះថា Alejandro Carranza មិនជាប់ពាក់ព័ន្ធអ្វីនៅក្នុងការជួញដូរគ្រឿងញៀនទេ ហើយសកម្មភាពប្រចាំថ្ងៃរបស់គាត់គឺនេសាទប៉ុណ្ណោះ។

លោកថ្លែងថា ៖ « Alejandro Carranza ត្រូវ​បាន​គេ​រាយការណ៍​ថា ​បាន​ស្លាប់​នៅ​ថ្ងៃ​ទី ១៥ ខែ​កញ្ញា កន្លងទៅ ​នៅ​ពេល​ដែល​កង​កម្លាំង​អាម៉េរិក​បាន​​បាញ់​លើ​ទូក​របស់​គាត់ ​ខណៈ​ដែល​គាត់​កំពុង​នេសាទ​ត្រី​នៅ​តំបន់ Caribbean »។ យ៉ាងណាមិញ លោក Trump ឆ្លើយតបថា អាម៉េរិកមានគោលបំណងទប់ស្កាត់លំហូរនៃគ្រឿងញៀនពីអាម៉េរិកឡាទីនចូលទឹកដីរបស់ខ្លួន ប៉ុន្តែរដ្ឋាភិបាលរបស់លោកមិនបានផ្តល់ភស្តុតាង ឬព័ត៌មានលម្អិតអំពីអត្តសញ្ញាណរបស់នាវា ឬអ្នកដែលនៅលើនាវានោះទេ៕