សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ វិនិយោគិនថៃមួយក្រុម បានមកដល់ប្រទេសកម្ពុជា និងបានចុះទៅតាមតំបន់សេដ្ឋកិច្ចពិសេសក្នុងរាជធានី/ខេត្តចំនួន៣ ដើម្បីស្វែងរកឱកាសក្នុងការបណ្ដាក់ទុនវិនិយោគលើវិស័យនានាក្នុងតំបន់សេដ្ឋកិច្ចទាំងនោះ ។
ថ្លែងប្រាប់មន្ត្រីជាន់ខ្ពស់រាជរដ្ឋាភិបាលកម្ពុជា លោក Voratat Tantimongkolsuk តំណាងសភាពាណិជ្ជកម្មថៃបានឱ្យដឹងថា គណៈប្រតិភូសភាពាណិជ្ជកម្មថៃមកកាន់កម្ពុជានាពេលនេះ គឺដើម្បីសិក្សាស្វែងយល់បន្ថែមទៀតពីសក្តានុពលពាណិជ្ជកម្ម វិនិយោគ និងស្វែងរកដៃគូអាជីវកម្មនៅកម្ពុជា។
លោកបានបន្តថា កាលពីឆ្នាំ២០២២ សភាពាណិជ្ជកម្មថៃបានដឹកនាំគណៈប្រតិភូមកកាន់កម្ពុជាម្តងរួចមកហើយ បន្ថែមពីនេះកាលពីដើមឆ្នាំ២០២៣នេះ រដ្ឋមន្ត្រីពាណិជ្ជកម្មក៏បានដឹកនាំគណៈប្រតិភូក្រសួងពាណិជ្ជកម្មកម្ពុជាទៅចូលរួមសិក្ខាសាលាស្តីពីឱកាសពាណិជ្ជកម្ម និងវិនិយោគនៅកម្ពុជា នៅទីក្រុងបាងកក ដែលមានវាគ្មិនមកពីក្រសួងពាណិជ្ជកម្មកម្ពុជា និងក្រុមប្រឹក្សាអភិវឌ្ឍន៍កម្ពុជាផងដែរ។
លោកបន្ថែមថា ទស្សនកិច្ចលើកនេះ ប្រតិភូវិនិយោគិនថៃ នឹងចុះទៅកាន់តំបន់សេដ្ឋកិច្ចពិសេសភ្នំពេញ ខេត្តកោះកុង និងខេត្តព្រះសីហនុ ដើម្បីសិក្សាស្វែងយល់ពីឱកាសធ្វើពាណិជ្ជកម្ម និងវិនិយោគ និងស្វែងរកដៃគូអាជីវកម្ម ។ លើសពីនេះក្រុមប្រឹក្សាវិនិយោគថៃក៏បាន និងកំពុងធ្វើកិច្ចសហប្រតិបត្តិការល្អជាមួយក្រុមប្រឹក្សាអភិវឌ្ឍន៍កម្ពុជា ដើម្បីជួយ និងជំរុញវិស័យវិនិយោគរវាងប្រទេសទាំងពីរផងដែរ ។
ឯកឧត្តម ជា វុទ្ធី អគ្គលេខាធិការរងក្រុមប្រឹក្សាអភិវឌ្ឍន៍កម្ពុជាបានមានប្រសាសន៍ថា តំបន់សេដ្ឋកិច្ចពិសេស បាន និងកំពុងទាក់ទាញការវិនិយោគនានាពីក្នុង និងក្រៅប្រទេស។ ជាក់ស្ដែង ក្នុងរយៈពេលប៉ុន្មានឆ្នាំចុងក្រោយនេះ ការនាំចេញពីតំបន់សេដ្ឋកិច្ចពិសេសមានការកើនឡើងជាបន្តបន្ទាប់ ដោយសារតែមានការវិនិយោគថ្មីៗចូលទៅក្នុងតំបន់សេដ្ឋកិច្ចពិសេស ។
ឯកឧត្តមបន្តថា រោងចក្រធំៗ ក៏បានដាក់ទីតាំងនៅក្នុងតំបន់សេដ្ឋកិច្ចពិសេសនានាក្នុងប្រទេស ដូចជា តំបន់សេដ្ឋកិច្ចក្រុងព្រះសីហនុ តំបន់សេដ្ឋកិច្ចក្រុងបាវិត និងតំបន់សេដ្ឋកិច្ចខេត្តកោះកុងជាដើម ហើយគិតមកដល់បច្ចុប្បន្ននេះ កម្ពុជាមានតំបន់សេដ្ឋកិច្ចពិសេសចំនួន២៤កំពុងមានដំណើរ និងកំពុងទាក់ទាញការវិនិយោគនានាបន្ថែមពីទាំងក្នុង និងក្រៅប្រទេស។
ឯកឧត្តមបន្ថែមថា គោលនយោបាយក្នុងការបង្កើតតំបន់សេដ្ឋកិច្ចពិសេសបន្ថែមនៅតាមបណ្ដាខេត្តរបស់រាជរដ្ឋាភិបាល បាន និងកំពុងហុចផល ជាពិសេសការវិនិយោគ ហើយរាជរដ្ឋាភិបាលក៏មានរដ្ឋបាលតំបន់សេដ្ឋកិច្ចពិសេសនៅតាមបណ្ដាខេត្ត និងតាមតំបន់សេដ្ឋកិច្ចពិសេសនានាសម្រាប់ត្រៀមស្វាគមន៍វិនិយោគិនជាតិ និងអន្តរជាតិដែលមានបំណងវិនិយោគនៅក្នុងតំបន់សេដ្ឋកិច្ចពិសេស ។
Account
Security
Favourite Content