ភ្នំពេញ៖ តំបន់សេដ្ឋកិច្ចពិសេសក្រុងព្រះសីហនុ (SSEZ) សម្រេចបានទំហំនាំចូល និងនាំចេញសរុបចំនួន ៤.០៧៨ ពាន់លានដុល្លារអាមេរិកក្នុងឆ្នាំ២០២៤ កើនឡើង ២១,៣ ភាគរយ ធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមទិន្នន័យដែលចេញផ្សាយកាលពីថ្មីៗនេះ ។

កាលពីឆ្នាំមុន តំបន់សេដ្ឋកិច្ចពិសេសក្រុងព្រះសីហនុ បានបន្ថែមសហគ្រាស និងគ្រឹះស្ថានថ្មីចំនួន២៨ ដែលនាំឱ្យចំនួនសរុបកើនឡើងដល់ ២០២ មកពីប្រទេសចិន អឺរ៉ុប សហរដ្ឋអាមេរិក អាស៊ីអាគ្នេយ៍ និងប្រទេសក្នុងតំបន់មួយចំនួនទៀត។

ឯកឧត្តម ឡុង ឌីម៉ង់ អភិបាលរងខេត្តព្រះសីហនុ បានឱ្យដឹងថា តំបន់សេដ្ឋកិច្ចពិសេសក្រុងព្រះសីហនុ ( SSEZ) គឺជាតំបន់សេដ្ឋកិច្ចធំជាងគេនៅក្នុងខេត្តព្រះសីហនុ ដែលផ្តល់ការងារដល់ប្រជាជនជាង ៣ម៉ឺននាក់ និងរួមចំណែកយ៉ាងសំខាន់ដល់ចំណូលសេដ្ឋកិច្ចរបស់ខេត្ត។ លើសពីនេះ SSEZ ដើរតួយ៉ាងសំខាន់ក្នុងខ្សែច្រវាក់ផ្គត់ផ្គង់ក្នុងតំបន់ និងសកលលោក។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានបង្ហាញពីសុទិដ្ឋិនិយម និងសូមការគាំទ្រចំពោះ យុទសាស្ត្ររបស់រាជរដ្ឋាភិបាលដោយបានកត់សម្គាល់លើសន្តិភាព និងស្ថិរភាពនយោបាយ ដែលបានជួយជំរុញនូវកំណើនសេដ្ឋកិច្ចតាមរយៈការលើកទឹកចិត្តដល់បណ្តាពាណិជ្ជករ និងវិនិយោគិនឱ្យមានទំនុកចិត្តលើបរិយាកាសវិនិយោគរបស់កម្ពុជា។

អ្នកឧកញ៉ា បានមានប្រសាសន៍ថា ៖

«និយាយរួម កត្តាទីផ្សារ និងកត្តាសុខសន្តិភាព ស្ថិរភាពនយោបាយ គឺជាកត្តាចាំបាច់សម្រាប់កំណើនសេដ្ឋកិច្ច និងកសាងនូវទំនុកចិត្តដល់វិនិយោគិន»។

អ្នកឧកញ៉ា លឹម ហេង បានលើកឡើងថា ដោយសារប្រទេសមួយចំនួនក្នុងតំបន់ ដូចជា បង់ក្លាដេស ភូមា មានអស្ថិរភាពនយោបាយ បានធ្វើឱ្យរោងចក្រមួយចំនួនរើមកកាន់ប្រទេសកម្ពុជា ដែលជាប្រទេសធានាបាននូវសុខសន្តិភាព និងស្ថិរភាពនយោបាយ និងធ្វើឱ្យកម្ពុជាទទួលការបញ្ជាទិញពីសហរដ្ឋអាមេរិក និងសហគមន៍អឺរ៉ុប រួមជាមួយនឹងទីផ្សារអន្តរជាតិផ្សេងៗ។

សូមរំលឹកដែរថា ក្នុងដំណើរទស្សនកិច្ចទៅកាន់ SSEZ កាលពីដំណាច់ខែធ្នូ ឆ្នាំ២០២៤ កន្លងទៅ ឯកអគ្គរដ្ឋទូតចិនប្រចាំកម្ពុជា ឯកឧត្តម វ៉ាង វិនពីន បានសម្តែងនូវមោទនភាពចំពោះការអភិវឌ្ឍន៍ SSEZ ដែលសម្រេចបានតាមរយៈការវិនិយោគរបស់ចិន ដោយក្នុងរយៈពេល១៦ឆ្នាំកន្លងមកនេះ SSEZ បានទាក់ទាញសហគ្រាសចំនួន២០២ មកពីជាង១០ប្រទេស បង្កើតការងារក្នុងស្រុកជាង ៣០ ០០០កន្លែង ស្មើនឹង ៧ភាគរយនៃបរិមាណនាំចូល និងនាំចេញសរុបរបស់កម្ពុជា។

នៅក្នុងឱកាសជាមួយគ្នានេះ ឯកអគ្គរដ្ឋទូត វ៉ាង វិនពីន បានមានប្រសាសន៍ថា រហូតមកដល់ពេលនេះ និស្សិតមហាវិទ្យាល័យកម្ពុជាចំនួន ៤,៥០០ នាក់បានបញ្ចប់ការសិក្សាពីវិទ្យាស្ថានពហុបច្ចេកទេសមិត្តភាពកម្ពុជា-ចិន ដែលមានទីតាំងនៅក្នុងតំបន់សេដ្ឋកិច្ចពិសេសក្រុងព្រះសីហនុ (SSEZ)៕