សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ធនាគារពិភពលោក (World Bank) បានព្យាករថា សេដ្ឋកិច្ចកម្ពុជាក្នុងឆ្នាំ២០២៥ នឹងមានកំណើនប្រមាណ ៤,៨ភាគរយ ធ្លាក់ចុះពី ៦ភាគរយក្នុងឆ្នាំ២០២៤ ដោយសារតែភាពប្រឈមពាណិជ្ជកម្មទាំងក្នុង និងក្រៅស្រុក បង្កឱ្យមានសម្ពាធ។ នេះបើតាមសេចក្ដីប្រកាសព័ត៌មានរបស់ធនាគារពិភពលោកប្រចាំកម្ពុជានៅថ្ងៃទី ១១ ខែធ្នូ ឆ្នាំ២០២៥នេះ។
យោងតាមរបាយការណ៍បច្ចុប្បន្នភាពសេដ្ឋកិច្ចកម្ពុជាសម្រាប់ខែធ្នូ ឆ្នាំ២០២៥ ដែលមានចំណងជើង «ជម្នះការប្រឈម» បានវាយតម្លៃទៅលើការធ្លាក់ចុះនៃវិស័យអចលនទ្រព្យ ភាពរំខាននៅតាមតំបន់ព្រំដែន និងការរឹតបន្តឹងពាណិជ្ជកម្មថ្មីៗ កំពុងដាក់សម្ពាធទៅលើកំណើនសេដ្ឋកិច្ច ។ បន្ថែមពីនេះ ការធ្លាក់ចុះនៃទីផ្សារអចលនទ្រព្យបានធ្វើឱ្យតម្រូវការក្នុងស្រុក និងសកម្មភាពសំណង់ធ្លាក់ចុះ ខណៈដែលភាពតានតឹងនៅតាមព្រំដែនបានបង្អាក់សកម្មភាពក្នុងទីផ្សារការងារ ក៏ដូចជាក្នុងវិស័យទេសចរណ៍ ។
លោកស្រី Tania Meyer នាយិកាធនាគារពិភពលោកប្រចាំកម្ពុជា បានមានប្រសាសន៍ថា ប្រទេសកម្ពុជាកំពុងឆ្លងកាត់ដំណាក់កាលដ៏លំបាកមួយ ដោយជួបបញ្ហាប្រឈមទាំងក្នុងស្រុក និងមកពីខាងក្រៅផ្ទួនៗគ្នា ។ វិធានការដ៏រឹងមាំ និងកំណែទម្រង់ចំគោលដៅអាចជួយប្រទេសឱ្យទប់ទល់នឹងសម្ពាធដែលកំពុងកើតមានមកលើសេដ្ឋកិច្ច ។
លោកស្រីបន្តថា ការការពារគ្រួសារងាយរងគ្រោះ រួមទាំងអ្នកដែលទើបនឹងវិលត្រលប់ចូលស្រុកវិញ គឺជាកិច្ចការចាំបាច់ណាស់ ។ ជាមួយគ្នានេះ ការកែលម្អបរិយាកាសអាជីវកម្ម ការជួយដល់សហគ្រាសក្រៅប្រព័ន្ធ និងការបង្កភាពងាយស្រួលសម្រាប់អាជីវកម្មចុះបញ្ជីផ្លូវការ គឺមានសារៈសំខាន់ណាស់ ដើម្បីពង្រីកសក្ដានុពលកំណើនបង្កលក្ខណៈស្មើភាពសម្រាប់ការធ្វើអាជីវកម្ម និងបង្កើតការងារដែលមានគុណភាពកាន់តែប្រសើរឡើង ។
ធនាគារពិភពលោកបានបន្ថែមថា កម្ពុជាបានមកដល់ដំណាក់កាលមានសម្ពាធខ្លាំង ដោយនាំមកជាមួយនូវស្ថានភាពម៉ាក្រូសេដ្ឋកិច្ច ដែលមានទ្រនាប់ការពាររឹងមាំគួរសម ។ ទុនបម្រុងអន្តរជាតិនៅតែមានភាពល្អប្រសើរ ដែលអាចធានាការនាំចូលបានប្រមាណ ៧,៥ខែ ខណៈដែលបំណុលសាធារណៈមានកម្រិតទាប គឺប្រហែល២៦ភាគរយនៃផលិតផលក្នុងស្រុកសរុប ។ អតិផរណានៅស្ថិតក្នុងកម្រិតអាចគ្រប់គ្រងបានក្នុងអត្រាមធ្យម ២,៧ភាគរយក្នុងឆ្នាំនេះ ។
តាមរបាយការណ៍របស់ធនាគារពិភពលោកបង្ហាញថា លំហូរវិនិយោគផ្ទាល់ពីបរទេស ( FDI) សម្រេចបាន២,៣ពាន់លានដុល្លារអាមេរិក ក្នុងឆមាសទី១នៃឆ្នាំ ២០២៥ កើនឡើង ២៨,៤ភាគរយធៀបនឹងរយៈពេលដូចគ្នាក្នុងឆ្នាំ២០២៤ ដែលជួយប៉ះប៉ូវដល់អតុល្យភាពនៅខាងក្រៅបានដែរ ។ ទោះជាយ៉ាងណាក៏ដោយ ប្រសិទ្ធភាពនៃការប្រមូលចំណូលរបស់រាជរដ្ឋាភិបាលត្រូវបានរំពឺងថានឹងមិនកើនទេ ដោយសារតម្រូវការប្រើប្រាស់ខ្សោយជាងមុន ហើយឱនភាពគណនីចរន្តត្រូវបានរំពឹងថានឹងរីកកាន់តែធំ ។
ជាការឆ្លើយតបទៅនឹងបញ្ហាប្រឈមទាំងនេះ របាយការណ៍បានលើកឡើងនូវវិធានការបន្ទាន់មួយចំនួន ដូចជាការផ្ដល់ប្រាក់សង្គ្រោះបន្ទាន់ ការបណ្ដុះបណ្ដាល និងការស្វែងរកការងារសម្រាប់ពលករចំណាកស្រុកដែលបានត្រលប់មកវិញ ដើម្បីជួយដល់គ្រួសារដែលងាយរងគ្រោះ និងគាំទ្រដល់តម្រូវការក្នុងស្រុក ។
ធនាគារពិភពលោកបានផ្ដល់ជាទស្សនទានថា កំណែទម្រង់រយៈពេលមធ្យម គួរតែផ្ដោតលើការកាត់បន្ថយថ្លៃដើមក្នុងការធ្វើអាជីវកម្ម ការកែលម្អលទ្ធភាពឱ្យសហគ្រាសខ្នាតតូច អាចទទួលបានហិរញ្ញវត្ថុយកធ្វើដើមទុន និងការសម្រួលពាណិជ្ជកម្មនិងភស្តុភារតាមរយៈឌីជីថលូបនីយកម្ម ៕
Account
Security
Favourite Content