ភ្នំពេញ ៖ ប្រតិបត្តិករហិរញ្ញវត្ថុបានលើកឡើងថា គ្រឹះស្ថានធនាគារ និងគ្រឹះស្ថានមីក្រូហិរញ្ញវត្ថុ នៅតែបន្តតួនាទីជាអ្នកជួយគាំទ្រផ្នែកហិរញ្ញវត្ថុជូនប្រជាជន និងអាជីវកម្មទាំងអស់ ខណៈដែលធនាគារ និងគ្រឹះស្ថានហិរញ្ញវត្ថុតែងផ្តល់ប្រឹក្សាដល់អតិថិជនមុននឹងផ្តល់កម្ចី។

លោក សុខ វឿន ប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា (CMA) និងប្រធាន​នាយក​ប្រតិបត្តិ​គ្រឹះស្ថាន​មីក្រូហិរញ្ញវត្ថុ អិ​ល​អូ​អិ​ល​ស៊ី ​(LOLC) បានឱ្យដឹងទៀតថា តួនាទីរបស់គ្រឹះស្ថានធនាគារ និងគ្រឹះស្ថានមីក្រូហិរញ្ញវត្ថុ គឺនៅតែបន្តជួយគាំទ្រប្រជាជន និងអាជីវកម្មទាំងអស់ គឺបន្តអនុវត្តការងារដោយអត់មានការរួញរានោះទេ

លោកថា ៖

“ជាជំហររបស់យើង គឺថាធ្វើយ៉ាងម៉េចដើម្បីឱ្យអាជីវកម្មទាំងខ្នាតតូច និងមធ្យម ឬខ្នាតតូចបំផុត ក៏ដូចជាអតិថិជនរបស់យើងមានលទ្ធភាពក្នុងការទទួលបានសេវាហិរញ្ញវត្ថុផ្លូវការដើម្បីប្រើប្រាស់សាច់ប្រាក់ក្នុងការស្តារ និងពង្រីកមុខរបររបស់ពួកគាត់។”

លោក សុខ វឿន បានថ្លែងថា ជាទូទៅតាមការសិក្សា និងមើលពីទិដ្ឋភាពទូទៅ អតិថិជនដែលទទួលបានឥណទានពីខាងមីក្រូហិរញ្ញវត្ថុផ្លូវការ ក៏ដូចជាធនាគារ ឃើញថាមានជីវភាពកាន់តែប្រសើរ ប៉ុន្តែក្នុងនោះឃើញមានអតិថិជនតិចតួចបំផុតដែលជួបនឹងបញ្ហា។

លោកបន្តថា ៖

“ជាទូទៅ ភាគច្រើនបញ្ហាដែលកើតមានមិនមែនជាបញ្ហាដែលកើតចេញពីធនាគារ ឬមីក្រូហិរញ្ញវត្ថុនោះទេ ប៉ុន្តែកើតចេញពីអតិថិជន ដែលពួកគាត់យកកម្ចីទៅប្រើប្រាស់មិនចំគោលដៅ ខុសពីអ្វីដែលបានពិភាក្សាជាមន្ត្រីជំនាញហិរញ្ញវត្ថុ។”

ជាមួយគ្នានេះ លោក សុខ វឿន ក៏បានបញ្ជាក់ថា ប្រសិនបើអតិថិជនមានបញ្ហានឹងរឿងបំណុលសងមិនរួច សូមឱ្យអង្គុយចរចាជាមួយនឹងស្ថាប័ន តែកុំឱ្យទៅខ្ចីបំណុលនៅស្ថាប័នផ្សេង ឬពីឯកជនដើម្បីយកមកដោះស្រាយ វានឹងអាចជួបគ្រោះថ្នាក់។ ដូច្នេះបើមានបញ្ហា សូមដោះស្រាយតាមនីតិវិធីជាមួយគា្ន ចៀសវាងការបង្វិលបំណុលពីនេះ ពីនោះ ដែលឱ្យមានបំណុលច្រើនលើសលប់។

លោកបណ្ឌិត អ៊ិន ចាន់នី ប្រធាននាយកប្រតិបត្តិរបស់ធនាគារ អេស៊ីលីដា ភីអិលស៊ី បានថ្លែងថា ៖«គ្រឹះស្ថានធនាគារ និងមីក្រូហិរញ្ញវត្ថុតែងតែផ្តល់ប្រឹក្សា និងយោបល់ដល់អតិថិជន។

លោកបណ្ឌិតបានបញ្ជាក់ថា ៖

“ជាធម្មតា ពេលអតិថិជនដាក់ពាក្យសុំខ្ចីប្រាក់ គាត់តែងតែចង់បានច្រើន តែស្ថាប័នពិនិត្យលើផែនការអាជីកម្មរបស់គាត់ថា តើលំហូរសាច់ប្រាក់ដែលកើតមកពីអាជីវកម្ម មានគ្រប់គ្រាន់សម្រាប់គាត់ខ្ចីទំហំឥណទានប៉ុន្នឹងដែរ ឬទេ? ក្នុងករណីថា លំហូរសាច់ប្រាក់មិនគ្រប់គ្រាន់ទេ ហើយគាត់ចង់ទំហំឥណទានធំ ស្ថាប័នមិនអាចផ្តល់ឱ្យធំទៅតាមអ្វីដែលគាត់ចង់បាននោះទេ។ ប៉ុន្តែនៅពេលសាច់ប្រាក់ត្រូវទៅតាមផែនការអាជីវកម្មរបស់គាត់ហើយ ទើបស្ថាប័នបានចាប់ផ្តើមពិនិត្យមើលទ្រព្យធានា។”

លោកបណ្ឌិត អ៊ិន ចាន់នី បានបញ្ជាក់ផងដែរថា ជាគោលការណ៍របស់ស្ថាប័នហិរញ្ញវត្ថុ ឬធនាគារ ភាគច្រើនគេមិនមើលទៅទ្រព្យធានាមុន ហើយពិនិត្យមើលទៅរំហូរសាច់តាមក្រោយនោះទេ ប៉ុន្តែគេតែងពិនិត្យមើលទៅលើរំហូរសាច់ប្រាក់មុន ហើយបានគេពិនិត្យទៅលើទ្រព្យធានាក្រោយមុនពេលសម្រេចផ្ដល់កម្ចី៕