សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រសួងរៀបចំដែនដី នគរូបនីយកម្ម និងសំណង់ (ក្រសួង ដ.ន.ស ) បានចុះអនុស្សរណៈជាមួយបណ្ដាអង្គភាពសាព័ត៌មាន សាកលវិទ្យាល័យ និងគណៈស្ថាបត្យកម្មកម្ពុជា ដើម្បីកសាងធនធានមនុស្ស ពង្រឹងស្ថាប័នទាំងក្រសួង និងដៃគូ ក៏ដូចជាការលើកទឹកចិត្តមនុស្សឱ្យមានការចូលរួមក្នុងសង្គម ។ កិច្ចចុះអនុស្សរណៈនេះធ្វើឡើងនៅថ្ងៃទី១០ ខែកញ្ញា ឆ្នាំ២០២៤ នៅសាលសន្និបាត ២០២១ ទីស្ដីការក្រសួងរៀបចំដែនដី នគរូបនីយកម្ម និងសំណង់ ក្រោមអធិបតីភាព ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ។
អនុស្សរណៈនេះ គឺជាការឆ្លើយតបយុទ្ធសាស្រ្តបញ្ចកោណដំណាក់កាលទី១ ដែលកំណត់ធនធានមនុស្សជាកត្តាស្នូល រួមទាំងឆ្លើយតបទៅនឹងគោលនយោបាយកំណែទម្រង់សាធារណៈដែលដឹកនាំដោយក្រសួងមុខងារសាធារណៈ ។
នៅក្នុងរបាយការណ៍របស់ឯកឧត្តម ថេង ច័ន្ទសង្វារ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា អនុស្សរណៈនៅថ្ងៃនេះ ត្រូវរៀបចំឡើងចំនួន២ ដើម្បីឧត្តមប្រយោជន៍ដល់និស្សិត និងក្រសួងរៀបចំដែនដី នគរូបនីយកម្ម និងសំណង់ ដោយអនុស្សរណៈទី១ គឺ ជាអនុស្សរណៈយោគយល់គ្នារវាងក្រសួងរៀបចំដែនដី នគរូបនីយកម្ម និងសំណង់ ជាមួយនឹងសាកលវិទ្យាល័យចំនួន៩ ហើយអនុស្សរណៈទី១នេះ មានវិសាលភាពលើកិច្ចការពាក់ព័ន្ធនឹងកិច្ចការងារច្បាប់ និងការដោះស្រាយវិវាទដូចជា ការចូលរួមតាក់តែងច្បាប់ និងលិខិតបទដ្ឋានគតិយុត្តដទៃទៀត ក្នុងវិស័យដែលជាសមត្ថកិច្ចរបស់ក្រសួងរៀបចំដែនដី នគរូបនីយកម្ម និងសំណង់។ ការចូលរួមក្នុងយន្តការដោះស្រាយវិវាទនានាស្ថិតក្រោមសមត្ថកិច្ចរបស់ ក្រសួង ដ.ន.ស និង ការចូលរួមជាមួយក្រុមមេធាវីស្ម័គ្រចិត្ត នៃក្រសួង ដ.ន.ស. ដើម្បីសិក្សារៀនសូត្រ និងសម្របសម្រួលដោះស្រាយលើសំណើផ្សេងៗដែលប្រជាពលរដ្ឋស្នើមក ក្រសួង ដ.ន.ស ។
ឯកឧត្តមបន្តថា អនុស្សរណៈទី២ គឺជាអនុស្សរណៈយោគយល់គ្នា រវាងក្រសួងរៀបចំដែនដី នគរូបនីយកម្ម និងសំណង់ គណៈស្ថាបត្យករកម្ពុជា ជាមួយសាកលវិទ្យាល័យ និងវិទ្យាស្ថានចំនួន ដើម្បីកិច្ចសហការលើការអភិវឌ្ឍវិស័យទាំងឡាយក្រោមសមត្ថកិច្ចរបស់ក្រសួង ដ.ន.ស និងចូលរួមពង្រឹងសមត្ថភាពអ្នកវិជ្ជាជីវៈ និងបណ្ដុះបណ្ដាលនិស្សិតរបស់សាកលវិទ្យាល័យ និងវិទ្យាស្ថានទាំងអស់ ។
នៅថ្ងៃនេះដែរ ក៏មានការចុះអនុស្សរណៈរវាងក្រសួងរៀបចំដែនដី នគរូបនីយកម្ម និងសំណង់ ជាមួយអង្គភាពសារព័ត៌មានចំនួន៣ផងដែរ រួមមានបណ្ដាញសារព័ត៌មាន អប្សរា មេឌា សឺវីស (AMS) អង្គភាពសារព័ត៌មាន ហ្វ្រេសញូវ និងសារព័ត៌មានខ្មែរ ចិន ( ស៊ីស៊ីថាមស៍ ) ។
ក្នុងឱកាសនោះ ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានមានប្រសាសន៍ សំណេះសំណាលជាមួយមន្ត្រីថ្នាក់ដឹកនាំក្រសួង និងថ្នាក់ដឹកនាំបណ្ដាស្ថាប័ន សាកលវិទ្យាល័យ ព្រមទាំងនិស្សិតមកពីបណ្ដាសាកលវិទ្យាល័យនានាដែលបានចូលរួមក្នុងពិធីចុះអនុស្សរណៈ ដោយឯកឧត្តមបានសង្កត់ធ្ងន់ថា ការកសាងប្រទេស ការអភិវឌ្ឍសង្គមជាតិឱ្យរីកចម្រើនទៅមុខបាន គឺអាស្រ័យលើធនធានមនុស្ស ។ មានធនធានមនុស្សកាន់តែច្រើន កាន់តែខ្លាំង ការអភិវឌ្ឍសង្គមជាតិក៏កាន់តែរីកចម្រើន ៕
Account
Security
Favourite Content