ភ្នំពេញ ៖ ផ្អែកតាមការវាយតម្លៃពាក់កណ្ដាលឆ្នាំ ២០២៣ សេដ្ឋកិច្ចកម្ពុជាត្រូវបានប៉ាន់ស្មានថានឹងមានកំណើន ៥,៦% ពោលគឺទាបជាងការព្យាករនៅពេលរៀបចំច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២៣ ដែលត្រូវបានរំពឹងទុកថាអាចសម្រេចបាននូវកំណើនក្នុងអត្រា ៦,៦%។ នេះបើយោងតាមរបាយការណ៍ ស្តីពីលទ្ធផលនៃការអនុវត្តថវិកាឆមាសទី១ និងការវាយតម្លៃការអនុវត្តច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ​ ២០២៣ ដែលបានចេញផ្សាយកាលថ្មីៗនេះ។

ការកាត់បន្ថយការព្យាករណ៍នេះ គឺដោយសារការបន្តអូសបន្លាយនៃសង្គ្រាមរុស្ស៊ី- អ៊ុយក្រែន បានធ្វើឱ្យស្ថានភាព និងទស្សនវិស័យសេដ្ឋកិច្ចសកល ជាពិសេសប្រទេសដែលជាដៃគូពាណិជ្ជកម្មរបស់កម្ពុជា ដូចជា សហរដ្ឋអាម៉េរិក និងសហភាពអឺរ៉ុប កាន់តែមានភាពអាប់អួរ ដែលបង្កឱ្យមានផលប៉ះពាល់ មកលើអនុវិស័យបម្រើការនាំចេញ ជាពិសេសអនុវិស័យកាត់ដេរ បូកផ្សំនឹងការបន្តប្រឈមនឹងបញ្ហាក្នុងស្រុកមួយចំនួន។

ហានិភ័យពីកត្តាខាងក្រៅប្រទេស និងក្នុងប្រទេស តម្រូវឱ្យរាជរដ្ឋាភិបាលត្រូវត្រៀមលក្ខណៈ រួចជាស្រេចក្នុងការបញ្ចៀស និងបន្ធូរបន្ថយសម្ពាធហានិភ័យ និងបញ្ហាប្រឈមនានា ដែលនឹងអាចកើតឡើងជាយថាហេតុ តាមរយៈការដាក់ចេញ និងអនុវត្តវិធានការគោលនយោបាយដែលឆ្លើយតបទាំងក្នុងផ្នែកម៉ាកូសេដ្ឋកិច្ច និងហិរញ្ញវត្ថុសាធារណៈ។ ក្នុងន័យនេះ ក្រសួងសេដ្ឋកិច្ចនិងហិរញ្ញវត្ថុនឹងបន្តតាមដាន និងវាយតម្លៃជាប់ជាប្រចាំ ប្រកបដោយការយកចិត្តទុកដាក់ខ្ពស់ និងត្រៀមលក្ខណៈក្នុងការដាក់ចេញវិធានការអន្តរាគមន៍ឆ្លើយតបឱ្យបានទាន់ពេលវេលាលើបញ្ហានានាដែលអាចកើតមានជាយថាហេតុ។

ទោះបីការអនុវត្តថវិកាក្នុងឆមាសទី ១ កន្លងទៅនេះ នៅជួបប្រទះបញ្ហាប្រឈមមួយចំនួនក្តី ក៏ប៉ុន្តដោយមានការគាំទ្រ និងការលើកទឹកចិត្តយ៉ាងពេញទំហឹង និងជាប្រចាំពីសម្ដេចតេជោ នាយករដ្ឋមន្តី្រ ដែលជាមេបញ្ជាការតែមួយ និងស្មារតីនៃការបន្តចូលរួមយ៉ាងសកម្មពីគ្រប់ក្រសួង-ស្ថាប័នពាក់ព័ន្ធ ក្រសួងសេដ្ឋកិច្ច និងហិរញ្ញវត្ថុប្តេជ្ញាចិត្តដោយមិនរាថយក្នុងការពុះពារសម្រេចឱ្យបាននូវគោលដៅ និងវិធានការទាំងឡាយដែលបានលើកឡើងខាងលើ។

ដូចនេះ, ថវិកាឆ្នាំ ២០២៣ នៅតែអាចចាត់ទុកថាជាឧបករណ៍គោលនយោបាយរបស់រាជរដ្ឋាភិបាលប្រកបដោយប្រសិទ្ធភាព និងស័ក្ដិសិទ្ធិភាព ក្នុងការរក្សាលំនឹងសេដ្ឋកិច្ច និងជីវភាពប្រជាជន ទប់ទល់នឹងសម្ពាធអតិផរណា ព្រមទាំងបម្រើដល់ការស្ដារសេដ្ឋកិច្ច និងជំរុញកំណើនជាបណ្តើរៗឡើងវិញ។ ជាមួយគ្នានេះ, ថវិកាឆ្នាំ ២០២៣ ក៏បានគូសបញ្ជាក់អំពីការប្ដេជ្ញាចិត្តរបស់រាជរដ្ឋាភិបាល ក្នុងការបន្តយកចិត្តទុកដាក់លើប្រសិទ្ធភាពប្រតិបត្តិការចំណាយ ដើម្បីធានាថា រាល់ចំណាយត្រូវធ្វើឡើងក្នុងថ្លៃសមរម្យ, មានគុណភាព, សមស្របតាមលទ្ធភាព, ក្នុងបរិមាណដែលត្រូវការជាក់ស្តែង សម្រាប់ប្រើប្រាស់ក្នុងពេលដែលត្រូវការចាំបាច់ ព្រមទាំងការបន្តខិតខំបង្កើនប្រសិទ្ធភាព និងកម្រិតនៃការកៀរគរចំណូលគ្រប់ប្រភេទ តាមរយៈការអនុវត្តវិធានការយ៉ាងម៉ឺងម៉ាត់និងមុតស្រួច ទាំងវិធានការរដ្ឋបាល និងវិធានការគោលនយោបាយ ដែលមានចែងនៅក្នុងយុទ្ធសាស្ត្រកៀរគរចំណូលឆ្នាំ ២០១៩-២០២៣ ដែលអាចឆ្លើយតបទៅនឹងតម្រូវការចំណាយ។

យោងតាមការប៉ាន់ប្រមាណរបស់ក្រសួងសេដ្ឋកិច្ច និងហិរញ្ញវត្ថុ សម្រាប់តម្លៃសេដ្ឋកិច្ចឆ្នាំ ២០២៣ ផលិតផលសរុបក្នុងស្រុក (ផ.ស.ស) ថ្លៃបច្ចុប្បន្ន គឺស្ថិតក្នុងរង្វង់ទឹកប្រាក់ប្រមាណ ១៣១ ២៧៦ ពាន់លានដុល្លារ ឬសមមូលនឹងប្រមាណ ៣២ ២៩១ លានដុល្លារអាម៉េរិក ស្របពេលដែល ផ.ស.ស សម្រាប់មនុស្ស ត្រូវបានរំពឹងថានឹងកើនឡើងដល់ ១ ៩២៤ ដុល្លារអាម៉េរិក៕