ភ្នំពេញ ៖ ប្រតិបត្តិករហិរញ្ញវត្ថុ និងអ្នកជំនាញក្នុងវិស័យឌីជីថលបានអំពាវនាវ និងណែនាំឱ្យប្រជាពលរដ្ឋបង្កើនការប្រុងប្រយ័ត្នខ្ពស់ចំពោះការបោកបញ្ឆោតរបស់ជនខិលខូច ដែលបានយករូបថ្នាក់នាំស្ថាប័នហិរញ្ញវត្ថុ ជាមួយការបញ្ចេញសាច់ប្រាក់របស់រដ្ឋាភិបាលជួយដល់ប្រជាពលរដ្ឋ ហើយតម្រូវឱ្យចុចលើតំណរភ្ជាប់លីង (Link) ដែលគ្មានប្រភពច្បាស់លាស់។

ជាក់ស្តែង ករណីរបស់ធនាគារ អេស៊ីលីដា ភីអិលស៊ី ក្រុមបោកបញ្ឆោតបានយករូបភាពថ្នាក់ដឹកនាំរបស់ធនាគារ កាត់ត ជាមួយខ្លឹមសារមួយថា សម្តេចនាយករដ្ឋមន្ត្រីបានប្រកាសតាមរយៈក្រសួងហិរញ្ញវត្ថុថា ប្រជាពលរដ្ឋកម្ពុជាគ្រប់រូបមានសិទ្ធិទទួលបានសាច់ប្រាក់ចំនួន ១ ០០០ ដុល្លារ ហើយទាមទារឱ្យចុចតំណរ លីង ដែលគ្មានប្រភពច្បាស់លាស់ ដើម្បីទទួលបានសាច់ប្រាក់នេះ។

ករណីនេះ ធនាគារ អេស៊ីលីដា ភីអិលស៊ី បានធ្វើការបដិសេធចំពោះខ្លឹមសារ និងរូបភាពដូចខាងលើ ដែលមានជនខិលខូចយករូបថត បណ្ឌិត ហេង ឌីណា ដែលជាសមាជិកក្រុមប្រឹក្សាភិបាលរបស់ធនាគារ អេស៊ីលីដា ទៅភ្ជាប់នឹងព័ត៌មាននេះ ធ្វើឱ្យប៉ះពាល់យ៉ាងធ្ងន់ធ្ងរដល់ធនាគារ អេស៊ីលីដា។ ហេតុដូចនេះ សូមសារធារណជនទទួលជ្រាបជាព័ត៌មាន និងប្រុងប្រយ័តចំពោះការចុចលើ Link ព្រមទាំងសូមអំពាវនាវដល់សមត្ថកិច្ចមេត្តាចាត់វិធានការតាមផ្លូវច្បាប់។

លោកបណ្ឌិត អ៊ិន ចាន់នី ​ប្រធាននាយកប្រតិបត្តិរបស់​ធនាគារ អេស៊ីលីដា ភីអិលស៊ី បានថ្លែងប្រាប់ថា កន្លងមក ធនាគារ អេស៊ីលីដា មិនដែលជួបករណីបែបនេះនោះទេ ហើយនេះគឺលើកដំបូងហើយដែលស្ថាប័នបានជួបប្រទះ ខណៈពេលនេះគឺធនាគារបានប្តឹងទៅសមត្ថកិច្ចរួចហើយចំពោះករណីនេះ។

លោកបណ្ឌិតណែនាំឱ្យប្រជាជនត្រូវមានការប្រុងប្រយ័ត្នខ្ពស់ចំពោះករណីបែបនេះ ដោយលោកបានថ្លែងដូច្នេះថា ៖

“ប្រជាជនត្រូវតែប្រុងប្រយ័ត្ន ព្រោះរូបភាពនេះត្រូវបានគេទៅកាត់ត ក្នុងន័យបោកបញ្ឆោត […] ហើយចំពោះវិធានការវិញ គឺមានតែការអប់រំ និងផ្សព្វផ្សាយចំណេះដឹងដល់ប្រជាជនឱ្យមានប្រុងប្រយ័ត្ន”។

ជុំវិញករណីនេះដែរ លោក ជី សុផាត ដែលជាអ្នកផលិតមាតិកាអប់រំអំពីចំណេះដឹងឌីជីថល បានលើកឡើងថា ចំពោះរូបភាពបោកបញ្ឆោតតាមប្រព័ន្ធអនឡាញ គឺមានច្រើនរូបភាព ដូច្នេះប្រជាជនត្រូវការប្រុងប្រយ័ត្ន ពិសេសទាក់ទងនឹងវិស័យហិរញ្ញវត្ថុ ដែលតម្រូវឱ្យមានការចុចលើតំណរភ្ជាប់ លីង (Link)។

លោក ជី សុផាត បានលើកឡើងថា ដំណោះស្រាយ គឺទាល់តែមានការចូលរួមគ្នាពីស្ថាប័នពាក់ព័ន្ធ ដែលរួមមានស្ថាប័នសាមី និងរដ្ឋាភិបាល ត្រូវចេញជាព័ត៌មានដល់ប្រជាជនឱ្យប្រយ័ត្នប្រយែងចំពោះករណីដែលអាចកើតឡើងបែបនេះ។ ការធ្វើដូច្នេះអាចធ្វើឱ្យប្រជាជនទទួលបានព័ត៌មាន និងមិនចាញ់ការបោកបញ្ឆោតរបស់ជនខិលខូច។

លោកបានបន្តថា មួយទៀតនោះ គឺប្រជាពលរដ្ឋគឺត្រូវមានចំណេះដឹងឌីជីថលបន្ថែម ទាក់ទងនឹងទម្រង់នៃការបោកបញ្ឆោតទាំងនេះ ព្រោះយើងអាចក្លាយជាជនរងគ្រោះ ដោយសារតែយើងខ្វះខាតចំណេះដឹងផ្នែកឌីជីថល។

លោកបានថ្លែងដូច្នេះថា ៖

“សម្រាប់ខ្ញុំ គាត់ (ប្រជាពលរដ្ឋ) គួរតែមានការប្រុងប្រយ័ត្ន ពិនិត្យម្តងហើយម្តងទៀត ផ្ទៀងផ្ទាត់ទាំងព័ត៌មានឱ្យបានច្បាស់លាស់ ថាតើព័ត៌មានទាំងនេះគឺព័ត៌មានបោកបញ្ឆោត ឬក៏ជាព័ត៌មានពិតប្រាកដ? ដូច្នេះហើយ ការបន្ថែមចំណេះដឹងឌីជីថលដល់ប្រជាពលរដ្ឋ គឺជាចំណុចស្នូលមួយដែលជួយប្រជាពលរដ្ឋជៀសផុតពីការបោកបញ្ឆោតរបស់ជនខិលខូច”៕