សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ បណ្ដាខេត្តនៅប៉ែកពាយព្យនៃប្រទេសកម្ពុជាមួយចំនួននឹងកាន់តែមានសក្ដានុពល ជាពិសេសទៅលើវិស័យកសិកម្ម ស្របពេលដែលរាជរដ្ឋាភិបាល បាន និងកំពុងអភិវឌ្ឍន៍ប្រព័ន្ធធារាសាស្ត្រនៅតាមបណ្ដាខេត្តមួយចំនួនសម្រាប់ស្រោចស្រពដំណាំ និងសម្រាប់ប្រើប្រាស់ក្នុងការងារកសិកម្ម។ ជាក់ស្ដែងគម្រោងអភិវឌ្ឍន៍ប្រព័ន្ធធារាសាស្ត្រនៅខេត្តចំនួន២ នៅប៉ែកពាយព្យនៃប្រទេសដែលរាជរដ្ឋាភិបាលបានអភិវឌ្ឍន៍នឹងផ្ដល់អត្ថប្រយោជន៍ដល់ពលរដ្ឋក៏ដូចជាវិនិយោគិនបន្ថែមទៀត ។
បើតាមទំព័រទំនាក់ទំនងអេឡិចត្រូនិកផ្លូវការរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា កាលពីចុងសប្ដាហ៍កន្លងទៅនេះ បានបង្ហាញគម្រោងមួយនៅក្នុងខេត្តបន្ទាយមានជ័យ គឺគម្រោងអភិវឌ្ឍន៍ប្រព័ន្ធធារាសាស្ត្រដ៏ធំ នឹងអាចជួយកាត់បន្ថយពីគ្រោះមហន្តរាយធម្មជាតិនៃគ្រោះទឹកជំនន់ ទឹកភ្លៀងដែលកើតឡើងភ្លាមៗនៅក្នុងតំបន់ និងជំនន់ឆ្លងដែនពីប្រទេសថៃ រួមជាមួយនឹងគ្រោះរាំងស្ងួតផងដែរ។
គម្រោងនេះមានលទ្ធភាពស្រោចស្រពលើផ្ទៃដីបង្កបង្កើនផលក្នុងរដូវវស្សាសរុបប្រមាណជិត ២០ម៉ឺនហិកតា និងរដូវប្រាំងបាន ៣ ៥០០ហិកតា ដែលប្រឡាយស្រោចស្រព និងដោះទឹកខ្នាតធំចំនួន៦ខ្សែ មានប្រវែងសរុប ៩២,៦៥គីឡូម៉ែត្រ ។
ដោយឡែក បើតាមទំព័រហ្វេសប៊ុករបស់ឯកឧត្តម សុខ លូ អភិបាលនៃគណៈអភិបាលខេត្តបាត់ដំបង នៅថ្ងៃទី២៤ ខែមិថុនា ឆ្នាំ២០២៤នេះ បានបង្ហាញគម្រោងអភិវឌ្ឍន៍ប្រព័ន្ធធារាសាស្ត្រមួយ ( គម្រោងអភិវឌ្ឍន៍ទំនប់ដូនទ្រី ) នៅចម្ងាយប្រមាណ ៩០គីឡូម៉ែត្រពីក្រុងបាត់ដំបង ប៉ែកភាគពាយព្យ ។ គម្រោងនេះ គឺជាគម្រោងដឹកនាំអភិវឌ្ឍន៍ដោយរាជរដ្ឋាភិបាលកម្ពុជាតាំងពីជំនាន់សម្ដេចតេជោ ហ៊ុន សែន ជានាយករដ្ឋមន្ត្រី ។
បើតាមឯកឧត្តម សុខ លូ បានឱ្យដឹងថា គម្រោងអភិវឌ្ឍន៍ប្រព័ន្ធធារាសាស្ត្រនឹងមានសមត្ថភាពដោះស្រាយបញ្ហាទឺក កាត់បន្ថយហានិភ័យគ្រោះធម្មជាតិ ផ្គត់ផ្គង់ទឹកសម្រាប់កសិកម្ម ឧស្សាហកម្ម ទឹកស្អាតប្រចាំថ្ងៃ និងបម្រើដល់ពហុវិស័យដែលជាផ្នែកមួយជួយលើកស្ទួយជីវភាពរស់នៅរបស់ប្រជាពលរដ្ឋ ។
ឯកឧត្តមបានបញ្ជាក់ថា គម្រោងមួយនេះនឹងត្រូវប្រើរយៈពេលសាងសង់៩០ខែ ដោយចាប់ផ្ដើមដំណើរការកាលពីអំឡុខែមិថុនាឆ្នាំ២០១៨ និងគ្រោងបញ្ចប់នៅអំឡុងខែតុលា ឆ្នាំ ២០២៥ ខាងមុខ ខណៈបច្ចុប្បន្ន វឌ្ឍនភាពនៃគម្រោងនេះសម្រេចបានប្រមាណ៨០ភាគរយ ។ គម្រោងមួយនេះបានគ្របដណ្តប់លើ ១១ឃុំ នៃស្រុកមោងឬស្សី និងស្រុករុក្ខគីរី ខេត្តបាត់ដំបង និងស្រុកបាកាន ខេត្តពោធិ៍សាត់ ដោយអាចស្តុកទឹកបានរហូតដល់ ១៦៣,១លានម៉ែត្រគូប ហើយមានលទ្ធភាពផ្គត់ផ្គង់ទឹកស្រោចស្រពសម្រាប់បង្កើនផលិតផលកសិកម្មប្រមាណ ៣ម៉ឺន ៣ពាន់ហិចកតា ។
គួររំលឹកដែរថា សម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រីធ្លាប់បានជំរុញលើកទឹកចិត្តឱ្យបង្កើតតំបន់ប៉ូលសេដ្ឋកិច្ចទី៤ នៅកម្ពុជា ដោយតំបន់ប៉ូលទី៤នេះមានខេត្តបាត់ដំបង ពោធិ៍សាត់ បានបន្ទាយមានជ័យ ។ តំបន់ប៉ូលនេះដែរត្រូវបានលើកទឹកចិត្ត និងជំរុញឱ្យអភិវឌ្ឍន៍លើដំណាំស្រូវ និងមច្ចា ហើយការអភិវឌ្ឍប្រព័ន្ធធារាសាស្ត្រនេះដែរ ក៏នឹងអាចបង្កបង្កើនដំណាំស្រូវ និងទិន្នផលមច្ចានៅតំបន់ទាំងនោះបានមួយកម្រិតទៀត ៕
Account
Security
Favourite Content