សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កំពង់ស្ពឺ ៖ កំពង់ស្ពឺ ត្រូវបានគេដឹងច្បាស់ថាជាខេត្ត ដែលទទួលបាននូវការវិនិយោគលើរោងចក្រឧស្សាហកម្មជាបន្តបន្ទាប់ ក្នុងនោះដែរស្រុកគងពិសីនៃខេត្តមួយនេះ ទទួលបានគម្រោងវិនិយោគលើរោងចក្រឧស្សាហកម្មច្រើនជាងគេមួយដែរ ជាក់ស្ដែងក្នុងស្រុកមួយនេះមានរោងចក្រដំឡើងរថយន្តរហូតដល់ទៅ ៣ ហើយក្នុងចំណោមរោងចក្រដំឡើងរថយន្តទាំង ៨ ដែលមានវត្តមាននៅក្នុងប្រទេសកម្ពុជា។
រោងចក្រដំឡើងរថយន្តទាំង ៣ ដែលមានវត្តមាននៅក្នុងស្រុកគងពិសី នៃខេត្តកំពង់ស្ពឺនេះ រួមមាន ទី១. រោងចក្រដំឡើងរថយន្ត Dongfeng ដែលរោងចក្រវិនិយោគដោយក្រុមហ៊ុន GTV MOTOR មានទីតាំងនៅផ្លូវជាតិលេខ ៣ ក្នុងភូមិអង្ក្រង ឃុំអង្គពពេល ស្រុកគងពិសី ខេត្តកំពង់ស្ពឺ។ ទី២. រោងចក្រដំឡើងរថយន្តម៉ាក Soueast ដែលរោងចក្រនេះក៏ស្ថិតនៅក្នុងស្រុកគងពិសីនៃខេត្តកំពង់ស្ពឺដែរ ស្ថិតនៅជាមួយនឹងរោងចក្រដំឡើងរថយន្ត Dongfeng។
រោងចក្រដំឡើងរថយន្តម៉ាកល្បីមួយទៀតនោះគឺម៉ាក IZUSU។ រោងចក្រនេះវិនិយោគដោយក្រុមហ៊ុន K (Cambodia ) ដែលមានទីតាំងវិនិយោគនៅតាមបណ្ដោយផ្លូវជាតិលេខ ៤ ក្នុងស្រុកគងពិសី ខេត្តកំពង់ស្ពឺ ហើយរោងចក្រនេះដែរក៏ទើបតែបើកសម្ពោធដំណើរការកាលពីប៉ុន្មានថ្ងៃមុននេះផងដែរ។
ឯកឧត្តមសុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខធិការក្រុមប្រឹក្សាអភិវឌ្ឍន៍កម្ពុជាក៏បានថ្លែងថា បច្ចុប្បន្ននេះ កម្ពុជាមានរោងចក្រដំឡើងរថយន្តម៉ាកល្បីៗ លើពិភពលោកចំនួន ៨ ហើយ ក្នុងនោះរួមមានម៉ាក Soueast , Hyundai , Kia , Ssangyong , Dongfeng , Ford , Toyota និងរោងចក្រដំឡើងរថយន្ត IZUSU ។
ឯកឧត្តម វ៉ី សំណាង អភិបាលខេត្តកំពង់ស្ពឺ បានថ្លែងថា ខេត្តកំពង់ស្ពឺកំពុងមានភាពទាក់ទាញលើការវិនិយោគពីសំណាក់វិនិយោគិនក្នុងស្រុក និងវិនិយោគិនមកពីខាងក្រៅប្រទេស ដោយភាគច្រើនបណ្ដាក់ទុនវិនិយោគលើវិស័យឧស្សាហកម្ម ហើយនៅពេលបន្ទាប់នៅក្នុងខេត្តនេះនឹងក្លាយជាតំបន់ ដែលមានសក្ដានុពលខ្ពស់លើការវិនិយោគលើលំនៅឋាន ជាពិសេសលំនៅឋានតម្លៃសមរម្យ ដើម្បីផ្គត់ផ្គង់ដល់តម្រូវការនៅក្នុងខេត្តនេះផ្ទាល់។ លោក វ៉ា រីវៈ អ្នកជំនាញអចលនទ្រព្យអន្តរជាតិ ក៏បានមានប្រសាសន៍ផងដែរថា តំបន់ប៉ែកខាងលិច នឹងក្លាយជាតំបន់ដែលមានភាពទាក់ទាញការវិនិយោគនៅពេលអនាគតជា ពិសេសតំបន់ប៉ែកខាងលិចទន្លេមេគង្គ និងទន្លេសាប ហើយជាក់ស្ដែងបច្ចុប្បន្ននេះ ក៏ឃើញថាតំបន់នោះចាប់ផ្ដើមមានសកម្មភាពវិនិយោគជាបន្តបន្ទាប់ផងដែរ៕
Account
Security
Favourite Content