សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ដើម្បីសម្រួលដល់ការទូទាត់ទំនិញដែលបានដាក់លក់ក្នុងផ្សារពាណិជ្ជកម្មបែបអេឡិចត្រូនិក ខេមបូឌាត្រេដ ក្រសួងពាណិជ្ជកម្មបានសម្រេចចុះហត្ថលេខានៃការយោគយល់ ជាមួយធនាគារអេស៊ីលីដា ភីអិលស៊ី កាលពីព្រឹកថ្ងៃទី២៦ វិច្ឆិកា ២០២៤ ។
យោងតាមសេចក្ដីប្រកាសព័ត៌មានរបស់ ធនាគារ អេស៊ីលីដា ភីអិលស៊ី បានឱ្យដឹងថា ធនាគារ អេស៊ីលីដា ជាធនាគារពាណិជ្ជទីមួយ ដែលបានបោះផ្សាយមូលបត្រកម្មសិទ្ធិ ជាសាធារណៈនៅកម្ពុជា បានប្រកាសជាផ្លូវការនៅថ្ងៃនេះថា ធនាគារ អេស៊ីលីដា បានចុះអនុស្សរណៈនៃការយោគយល់គ្នា ជាមួយក្រសួងពាណិជ្ជកម្ម ស្តីពីការប្រើប្រាស់សេវាកម្មទូទាត់ប្រាក់តាមប្រព័ន្ធអេឡិចត្រូនិករបស់ ធនាគារ អេស៊ីលីដា សម្រាប់ការទូទាត់ប្រតិបត្តិការទិញ-លក់ទំនិញលើផ្សារខេមបូឌាត្រេដ ដើម្បីផ្តល់ភាពងាយស្រួល រហ័ស និងសុវត្ថិភាព ព្រមទាំងជួយសម្រួលដល់ការធ្វើពាណិជ្ជកម្មតាមប្រព័ន្ធអេឡិចត្រូនិកក្នុងផ្សារខេមបូឌាត្រេដ។
ពិធីចុះអនុស្សរណៈនេះធ្វើឡើង ក្រោមអធិបតីភាពរបស់លោកជំទាវ ជា រដ្ឋា រដ្ឋលេខាធិការក្រសួងពាណិជ្ជកម្ម តំណាងដ៏ខ្ពង់ខ្ពស់របស់ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម និងបណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី ព្រមទាំងថ្នាក់ដឹកនាំ និងសហការីរបស់ក្រសួងពាណិជ្ជកម្ម និងធនាគារ អេស៊ីលីដា ។
ក្នុងឱកាសនោះដែរ លោកបណ្ឌិតអ៊ិន ចាន់នី ប្រធាននាយកប្រតិបត្តិនៃធនាគារអេស៊ីលីដា ភីអិលស៊ី បានមានប្រសាសន៍ថា អនុស្សរណៈនៃការយោគយល់គ្នានេះ ពិតជាមានសារសំខាន់ខ្លាំងណាស់ ក្នុងការបង្កើតភាពជាដៃគូយុទ្ធសាស្ត្រ និងជំរុញកិច្ចសហប្រតិបត្តិការ រវាងក្រសួងពាណិជ្ជកម្ម និងធនាគារអេស៊ីលីដា ដោយនឹងអាចតភ្ជាប់គ្នារវាផ្សារខេមបូឌាត្រេដរបស់ក្រសួងពាណិជ្ជកម្ម និងប្រព័ន្ធទូទាត់ប្រាក់របស់ធនាគារអេស៊ីលីដា ដើម្បីទូទាត់ថ្លៃទំនិញនៅក្នុងផ្សារខេមបូឌាត្រេដ អាចធានាដល់ការអនុវត្តទៅបានដោយរលូន ប្រកបដោយប្រសិទ្ធភាព និងតម្លាភាព ក្នុងវិស័យពាណិជ្ជកម្មតាមប្រព័ន្ធអេឡិចត្រូនិក ។
លោកបណ្ឌិតបន្តថា អនុស្សរណៈនេះ ក៏អាចលើកស្ទួយការអភិវឌ្ឍសហគ្រាសធុនតូចនិងមធ្យមនៅកម្ពុជា តាមរយៈការបង្កើនការយល់ដឹងថា និងសមត្ថភាពក្នុងការគ្រប់គ្រងការប្រើប្រាស់ប្រព័ន្ធបច្ចេកវិទ្យាប្រតិបត្តិការហិរញ្ញវត្ថុ ក្នុងការទូទាត់តាមបែបឌីជីថលទាំងក្នុងនិងក្រៅប្រទេស ។ មិនត្រឹមតែប៉ុណ្ណោះ ក៏អាចលើកកម្ពស់ការប្រើប្រាស់ និងការធ្វើពាណិជ្ជកម្មតាមប្រព័ន្ធអេឡិចត្រូនិក ព្រមទាំងការប្រើប្រាស់ប្រព័ន្ធបច្ចេកវិទ្យាប្រតិបត្តិការហិរញ្ញវត្ថុ ក្នុងការទូទាត់តាមបែបឌីជីថល ។
នៅក្នុងឱកាសនោះដែរ លោកជំទាវ ជា រដ្ឋា រដ្ឋលេខាធិការក្រសួងពាណិជ្ជកម្ម បានមានប្រសាសន៍ឱ្យដឹងថា ការចុះអនុស្សរណៈនៃការយោគយល់នេះ បានបង្ហាញពីការបោះជំហានទៅមុខដ៏មានអត្ថន័យ នៅក្នុងបេសកកម្មរបស់យើងក្នុងការរួមគ្នា ដើម្បីពង្រឹងប្រព័ន្ធអេកូពាណិជ្ជកម្ម ឌីជីថល របស់ប្រទេសកម្ពុជា ដែលអាជីវកម្មអាច ឈានដល់ទីផ្សារថ្មី និងការទទួលយកពាណិជ្ជកម្មឌីជីថលជាផ្លូវឆ្ពោះទៅរកកំណើនថ្មីនៃសេដ្ឋកិច្ចជាតិ ក៏ដូចជាការឆ្លុះបញ្ចាំងពីការសហការគ្នា និងភាពជាដៃគូរវាងវិស័យរដ្ឋ និងឯកជនក្នុងការជំរុញពាណិជ្ជកម្មឌីជីថលនៅកម្ពុជា ។
លោកជំទាវបន្តថា វិស័យពាណិជ្ជកម្ម ឌីជីថលប្រៀបបានដូចជាកម្លាំងចលករដ៏សំខាន់ ដែលរួមចំណែកយ៉ាងសកម្មភាពក្នុងការជួយទ្រទ្រង់ និងអភិវឌ្ឍន៍សេដ្ឋកិច្ច ការបង្កើនប្រាក់ចំណូលជាតិ និងផ្ដល់ឱកាសការងារ ដើម្បីលើកកម្ពស់ជីវភាពរស់នៅរបស់ប្រជាពលរដ្ឋ ស្របនឹងយុទ្ធសាស្ត្របញ្ចកោណដំណាក់កាលទី១ នៃរាជរដ្ឋាភិបាលអាណត្តិទី៧ ឆ្ពោះទៅរកការកសាងប្រព័ន្ធអេកូឌីជីថលដ៏រឹងមាំ ។
លោកជំទាវបញ្ជាក់ថា ជាមួយនឹងអនុស្សរណៈនៃការយោគយល់គ្នាថ្ងៃនេះ នឹងផ្ដល់ឱ្យម្ចាស់អាជីវកម្មនៅក្នុងផ្សារខេមបូឌាត្រេដ ជម្រើសទូទាត់បន្ថែម ដើម្បីជួយសម្រួលដល់ការទូទាត់ប្រាក់តាមប្រព័ន្ធអេឡិចត្រូនិក ដែលនឹងផ្ដល់ភាពងាយស្រួលជូនដល់អាជីវករ សហគ្រាសធុនតូច និងមធ្យម និងអតិថិជន ក្នុងការធ្វើពាណិជ្ជកម្មតាមប្រព័ន្ធអេឡិចត្រូនិកនៅក្នុងផ្សារខេមបូឌាត្រេដ ។ក្រសួងពាណិជ្ជកម្មរំពឹងថាម្ចាស់អាជីវកម្មជាច្រើន មានចំណាប់អារម្មណ៍និងដាក់ពាក្យចូលរួមក្នុង ផ្សារខេមបូឌាត្រេដ ដើម្បីពង្រឹង សមត្ថភាព និងអភិវឌ្ឍធុរកិច្ចរបស់ខ្លួនឱ្យកាន់តែប្រសើរជាពិសេសការចូលរួមក្នុងវេទិកាពាណជ្ជកម្មឌីជីថល និងពិព័រណ៍អនឡាញ ដែលនឹងប្រព្រឹត្តទៅនៅថ្ងៃទី១៣ ដល់ថ្ងៃទី១៦ ខែធ្នូ នឹងក្លាយជាឱកាសពិសេសមួយសំដៅលើកកម្ពស់បង្ហាញពីគុណភាព និងសក្ដានុពលនៃផលិតផលខ្មែរទៅកាន់ទីផ្សារអន្តរជាតិ ៕
Account
Security
Favourite Content