ភ្នំពេញ៖ ពិធីបុណ្យចូលឆ្នាំប្រពៃណីខ្មែរគឺពិធីបុណ្យជាតិធំមួយនៅក្នុងប្រទេសកម្ពុជា ដែលប្រារព្ធធ្វើឡើងរៀងរាល់ខែមេសា ដែលថ្ងៃបុណ្យធំមានរយៈពេល ៣ ថ្ងៃ។ អំឡុងរយៈពេលប៉ុន្មានថ្ងៃនេះ គេសង្កេតឃើញថា ប្រជាពលរដ្ឋកម្ពុជាតែងតែធ្វើដំណើរទៅកាន់ស្រុកកំណើតដើម្បីប្រារព្ធពិធីបុណ្យនេះ ឬក៏ទៅស្រុកកំណើតជួបជុំគ្រួសារ។

អំឡុងពេលពិធីបុណ្យចូលឆ្នាំនេះដែរ ប្រជាពលរដ្ឋត្រូវការចំណាយប្រាក់ជាច្រើនដើម្បីទៅជួបជុំគ្រួសារ ក៏ដូចជាជូនលុយកាក់ជូនចាស់ទុំសម្រាប់ពួកគាត់ធ្វើបុណ្យជាដើម។ ដូច្នេះ ដើម្បីចៀសវាងការចំណាយខុសខ្ទង់ ឬលើសពីផែនការចំណាយថវិការបស់អ្នក អ្នកជំនាញផ្នែកហិរញ្ញវត្ថុបានលើកថា  ដើម្បីកុំឱ្យប៉ះពាល់ដល់ការចំណាយ ប្រជាពលរដ្ឋត្រូវរៀបចំផែនការចំណាយឱ្យច្បាស់លាស់ ដទៃទៀត បន្ទាប់ពីពិធីបុណ្យជាតិមួយនេះ។

អ្នកជំនាញចំណេះដឹងហិរញ្ញវត្ថុ បានលើកឡើងថា ការចំណាយតិច ឬច្រើនមិនមែនជាបញ្ហាទេ ដែលបណ្តាលឱ្យមានការចំណាយខុសខ្ទង់ទេ។ បើមើលទៅសេដ្ឋកិច្ច ការចាយវាយច្រើនរបស់ប្រជាពលរដ្ឋនឹងធ្វើចរន្តលុយល្អប្រសើរ ហើយសេដ្ឋកិច្ចរីកក៏មានការរីកចម្រើន។

ក្នុងន័យសេដ្ឋកិច្ច ឧទាហរណ៍ អំឡុងពេលមានបុណ្យទាន ប្រជាពលរដ្ឋចាយលុយច្រើនលើសណ្ឋាគារ ទិញទំនិញ ម្ហូបអាហារ កន្លែងលក់ដូរ និងអ្នកប្រកបអាជីវកម្មពាក់ព័ន្ធនឹងទទួលបានផលប្រយោជន៍ច្រើន។ ជាមួយគ្នានេះ បើការចាយវាយមិនមានផែនការ មិនត្រូវខ្ទង់ ខុសខ្ទង់ ឬមិនបានព្រាងទុក ចាយទៅលើសពីលទ្ធភាពក្នុងការចំណាយ នោះវាធ្វើឱ្យប៉ះពាល់ដល់ការចំណាយផ្សេងៗ ឬក៏ប៉ះពាល់ដល់ការចំណាយក្នុងគ្រួសារ។

ជាធម្មតា បើយើងបានព្រាងទុកសម្រាប់ការផែនការចំណាយរបស់យើង យើងដឹងលទ្ធភាពរបស់យើងក្នុងការចំណាយ នោះមិនឱ្យប៉ះពាល់ដល់ការចំណាយផ្សេងទៀតទេ។ ប៉ុន្តែបើយើងមិនបានព្រាងទុកសម្រាប់ការចំណាយរបស់យើង ដោយយកចំណូលមកចំណាយ ដែលធ្វើឱ្យប៉ះពាល់ដល់ការចំណាយជាប្រចាំ ហើយឈានដល់ការត្អួញត្អែហេតុធ្វើបានជាមានចំណាយ ដោយសារការចំណាយរបស់យើងមិនមានការរៀបចំខ្ទង់ចំណាយឱ្យមានត្រឹមត្រូវ។

ប្រជាពលរដ្ឋរបស់យើងមួយចំនួនទៅលេងស្រុកកំណើត គាត់ដឹងហើយថា រៀងរាល់ឆ្នាំ នៅស្រុកកំណើតមានកម្មពិធីអ្វីខ្លះ និងចំណាយអស់ប៉ុន្មាន ដូច្នេះបើគាត់ដឹងថា​ ពេលចូលឆ្នាំ ភ្ជុំ ឬបុណ្យអុំទូក ហើយគាត់ត្រូវចំណាយប៉ុន្មាន គាត់នឹងត្រៀមទុកសម្រាប់ការចំណាយ។ ប៉ុន្តែបញ្ហាមិនមែនដូច្នេះ បញ្ហាគឺគាត់អត់បានត្រៀម ហើយយកចំណូលធម្មតាប្រចាំខែ ទៅចំណាយសម្រាប់តែរយៈបីថ្ងៃ នៃថ្ងៃបុណ្យអុំទូក ដូច្នេះហើយវាធ្វើឱ្យប៉ះពាល់ដល់ការចំណាយប្រចាំខែរបស់គាត់ ទម្រាំតែទទួលបានចំណូលប្រចាំខែថ្មីមកវិញ។

ប្រជាពលរដ្ឋត្រូវមានគម្រោងថវិកាឱ្យច្បាស់លាស់ ដូច្នេះការចាយវាយរបស់យើងនឹងមិនប៉ះពាល់ដល់ខ្ទង់ចំណាយជីវភាព ឬតម្រូវការរបស់យើងទេ។ ពេលយើងមានផែនការ និងគម្រោងថវិកា យើងដឹងថាតើត្រូវចាយវាយនៅពេលណា  អ៉ីចឹងយើងមានគម្រោង យើងមានការសន្សំទុក ដើម្បីចំណាយពេលណា ដែលយើងត្រូវចំណាយ។ ដូច្នេះបើសិនជាប្រជាពលរដ្ឋមានការៀបចំបែបនេះ ក្រុមគ្រួសារនីមួយៗមានលទ្ធភាពច្រើនក្នុងការចំណាយ ពេលកម្មពិធីឈាប់សម្រាក។

សូមបញ្ជាក់ផងដែរចូលឆ្នាំខ្មែរ គឺជាពិធីបុណ្យ​ចូលឆ្នាំថ្មីរបស់កម្ពុជា ដែលកំណត់តាម ប្រតិទិនពុទ្ធសាសនា (Buddhist calendar) តាមដំណើរគោលចររបស់ព្រះចន្ទ ដែលរាប់តាមរង្វាស់នៃឆ្នាំ ចន្ទគតិ (Lunar calendar) នៅក្នុងវប្បធម៌របស់កម្ពុជា ពិធីបុណ្យនេះត្រូវបានគេហៅថា ពិធីបុណ្យ គិម្ហៈរដូវ “បុណ្យរដូវក្ដៅ” (The Hot Season) នៃវិស្សមកាលតូច (Small vacations) ហើយចូលឆ្នាំខ្មែរ ដែលត្រូវបានប្រជាជនកម្ពុជា ឱ្យនិយមន័យថា (សង្ក្រាន្ត​ខ្មែរ​-Sangkrant Khmer) គឺជាថ្ងៃចូលឆ្នាំថ្មី ដែលប្រារព្ធ​ឡើងរៀងរាល់ ថ្ងៃទី ១៣ ឬ ថ្ងៃទី ១៤ ខែមេសា (April) ជារៀងរាល់ឆ្នាំ ប្រជាពលរដ្ឋ​កម្ពុជា​គ្រប់រូប និងត្រូវបានឈប់សម្រាកពីការងា រដើម្បីចូលរួមអបអរថ្ងៃចូលឆ្នាំថ្មីរបស់ខ្លួន៕