ភ្នំពេញ ៖ ក្រសួងសេដ្ឋកិច្ច និងហិរញ្ញវត្ថុ បានវាយតម្លៃថា ការអនុវត្តការងារកែទម្រង់ហិរញ្ញវត្ថុសាធារណៈ​ ក្នុងផែនការសកម្មភាពនៃអគ្គនាយកដ្ឋានក្រោមឱវាទក្រសួងសេដ្ឋកិច្ច និងហិរញ្ញវត្ថុ និងក្រសួង ស្ថាប័ន បន្តមានចលនាការ និងវឌ្ឍនភាពល្អតាមការគ្រោងទុក ដោយផ្អែកតាមរបាយការណ៍វឌ្ឍនភាពកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ដំណាក់កាលទី ៤ ប្រចាំត្រីមាសទី ១ ឆ្នាំ២០២៤។

ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជា​ប្រធាន​គណៈកម្មាធិការ​ដឹកនាំ​ការងារ​កែទម្រង់​ការគ្រប់គ្រង​ហិរញ្ញវត្ថុ​សាធារណៈ (គ.ហ.ស.) កាលសប្តាហ៍មុន បានដឹកនាំកិច្ចប្រជុំគណៈកម្មាធិការកែទម្រង់ការគ្រប់គ្រងហិរញ្ញវត្ថុសាធារណៈ ជាមួយដៃគូអភិវឌ្ឍន៍ ដើម្បីពិភាក្សាលើ “ការត្រួតពិនិត្យវឌ្ឍនភាពនៃការអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ដំណាក់កាលទី ៤ ប្រចាំត្រីមាសទី ១ ឆ្នាំ២០២៤” ដោយមានការចូលរួមពីសំណាក់ឯកឧត្តម លោកជំទាវ ជាថ្នាក់ដឹកនាំ និងសមាជិកក្រុមការងារកែទម្រង់ការគ្រប់គ្រងហិរញ្ញវត្ថុសាធារណៈ នៃក្រសួងសេដ្ឋកិច្ច និងហិរញ្ញវត្ថុ, ក្រសួង ស្ថាប័ន, តំណាងដៃគូអភិវឌ្ឍន៍, មន្ទីរសេដ្ឋកិច្ច និងហិរញ្ញវត្ថុរាជធានី ខេត្តទាំង ២៥ និងតំណាងអង្គការមិនមែនរាជរដ្ឋាភិបាល។

ក្រសួងសេដ្ឋកិច្ច និងហិរញ្ញវត្ថុ បានបញ្ជាក់ថា​ ផ្អែកតាមរបាយការណ៍វឌ្ឍនភាពកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ដំណាក់កាលទី ៤ ប្រចាំត្រីមាសទី ១ ឆ្នាំ២០២៤, ការអនុវត្តការងារកែទម្រង់ហិរញ្ញវត្ថុសាធារណៈ​ ក្នុងផែនការសកម្មភាពនៃអគ្គនាយកដ្ឋានក្រោមឱវាទក្រសួងសេដ្ឋកិច្ច និងហិរញ្ញវត្ថុ និងក្រសួង ស្ថាប័ន បន្តមានចលនាការ និងវឌ្ឍនភាពល្អតាមការគ្រោងទុក។ ទោះ​បីជា​យ៉ាង​នេះក្ដី ស្ថានភាព​ហិរញ្ញវត្ថុសាធារណៈកម្ពុជាកំពុងបន្តប្រឈមហានិភ័យក្នុងភាពមិន​ប្រាកដប្រជាខ្ពស់នៃស្ថានភាព​សេដ្ឋកិច្ច និង​លក្ខខណ្ឌហិរញ្ញវត្ថុសាកល ដែល​តម្រូវឱ្យ​រាជរដ្ឋាភិបាលដាក់ចេញ​នូវ​វិធានការឆ្លើយតប​ភ្លាមៗ ​ដើម្បីទ្រទ្រង់កំណើន និងលើកកម្ពស់​បរិយាកា​សវិនិយោគ និងធុរកិច្ច។

ក្នុងស្មារតីនេះ សកម្មភាព​កែទម្រង់ហិរញ្ញវត្ថុសាធារណៈនៅតែដើរតួនាទីសំខាន់ក្នុងការបន្ត​និរន្តរភាពការគ្រប់គ្រងហិរញ្ញវត្ថុសាធារណៈ។ “យុទ្ធសាស្រ្ដកៀរគរចំណូលឆ្នាំ២០២៤-២០២៨”, “ឯកសារគោលស្តីពី​ការកែទម្រង់ប្រព័ន្ធគ្រប់គ្រងចំណូលមិនមែនសារពើពន្ធ” និង “ឯកសារគោលស្តីពី​ការគ្រប់គ្រង​ទ្រព្យសម្បត្តិរដ្ឋ” ត្រូវបន្តរៀបចំ និងដាក់ឱ្យអនុវត្តក្នុងពេលឆាប់ៗ ដើម្បីជំរុញ​ប្រសិទ្ធភាព​ការងារ​ ជាពិសេសពង្រឹងប្រសិទ្ធភាពក្នុងការកៀរគរចំណូលថែម​មួយកម្រិតទៀត។ “ប្រព័ន្ធ​បច្ចេកវិទ្យា​ព័ត៌មាន​សម្រាប់ការគ្រប់គ្រងហិរញ្ញវត្ថុសាធារណៈ (FMIS)”,​ “ប្រព័ន្ធបច្ចេកវិទ្យាព័ត៌មានគ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋ (SARMIS)” និង “ប្រព័ន្ធបច្ចេកវិទ្យាព័ត៌មានគ្រប់គ្រងចំណូលមិនមែនសារពើពន្ធ (NRMIS)” ត្រូវបានដាក់ឱ្យប្រើប្រាស់ ក៏ដូចជាពង្រីកការប្រើប្រាស់ដល់រដ្ឋបាល ឃុំ សង្កាត់ ទូទាំងប្រទេស។ ការធ្វើសន្ធានកម្មលើមុខងារមួយចំនួននៃប្រព័ន្ធទាំងនេះក៏ជាកិច្ចការសំខាន់​ និងត្រូវបានគិតគូរ ដោយភាគីពាក់ព័ន្ធផងដែរ ទន្ទឹមជាមួយនឹង​ការ​បន្ដ​វិនិយោគ​លើ​ប្រព័ន្ធ FMIS ដែល​ជា​ប្រព័ន្ធស្នូល។

ជាមួយគ្នានេះ, ដើម្បីបន្តពង្រឹងការផ្សារភ្ជាប់ថវិកាទៅនឹងគោលនយោបាយ, ក្របខ័ណ្ឌហិរញ្ញវត្ថុសាធារណៈរយៈពេលមធ្យម (MTFF) ត្រូវបានអនុម័ត និងផ្សព្វផ្សាយជាលើកដំបូង ដែលជាមូលដ្ឋានក្នុងការរៀបចំថវិកាសម្រាប់ឆ្នាំ២០២៥ ខាងមុខនេះ។ ការលើកកម្ពស់តម្លាភាពថវិកាមានវឌ្ឍនភាពល្អ ដោយពិន្ទុនៃការអង្កេតលើការបើកចំហថវិការបស់កម្ពុជាបានកើនឡើងដល់ ៤៣ ពិន្ទុ ក្នុងឆ្នាំ២០២៣ (កើនឡើង ១០ ពិន្ទុ ធៀបនឹងឆ្នាំ២០២១)។ ទន្ទឹមនឹងនេះ អនុក្រឹត្យស្តីពីគុណវុឌ្ឍិ​មន្ត្រីគ្រប់គ្រងហិរញ្ញវត្ថុសាធារណៈ ក៏ទទួលបានការអនុម័តផងដែរ ដែលការអនុវត្តគតិយុត្តនេះនឹងរួមចំណែកយ៉ាងសំខាន់ក្នុងការពង្រឹងកម្មវិធីបណ្តុះបណ្តាល និងការតែងតាំងមន្រ្តីគ្រប់គ្រងហិរញ្ញវត្ថុសាធារណៈ។ ​

ជារួម ការត្រួតពិនិត្យ និងវាយតម្លៃលើវឌ្ឍនភាពនៃការអនុវត្តការងារកែទម្រង់ការគ្រប់គ្រងហិរញ្ញវត្ថុសាធារណៈដំណាក់កាលទី ៤ ប្រចាំត្រីមាសទី ១ ឆ្នាំ២០២៤ បានឆ្លុះបញ្ចាំងឱ្យឃើញពីភាពចាំបាច់ក្នុងការបន្តពង្រឹងភាពជឿទុកចិត្តបាននៃថវិកា ដែលរួមចំណែកក្នុងការធានាបាននូវចីរភាពនៃសេដ្ឋកិច្ចជាតិ ក្នុងខណៈដែលស្ថានភាពសេដ្ឋកិច្ចក្រៅប្រទេសមានភាពមិនប្រាកដប្រជាខ្ពស់។ ដោយឡែក នៅក្នុងជំហានដំបូងនៃការអនុវត្តថវិកាព័ត៌មានសមិទ្ធិកម្ម, ក្រសួង-ស្ថាប័ន គឺជាតួអង្គ​សំខាន់ ដែលត្រូវបានលើកទឹកចិត្ត និងជំរុញឱ្យមានការពង្រឹងគណនេយ្យភាពសមិទ្ធកម្ម តាមរយៈ​ការបណ្តុះបណ្តាល និងចែករំលែកបទពិសោធន៍នានា មុននឹងឆ្ពោះទៅរកការវាយតម្លៃលើសមិទ្ធកម្មពេញលេញ​នៅឆ្នាំ​បន្តបន្ទាប់។

ផ្អែកលើវឌ្ឍនភាពនៃការអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ដំណាក់កាលទី ៤ ប្រចាំត្រីមាសទី ១ ឆ្នាំ ២០២៤ នេះ, តំណាងដៃគូអភិវឌ្ឍន៍ និងអង្គការមិនមែនរដ្ឋាភិបាល បានអបអរសាទរចំពោះរាជរដ្ឋាភិបាលដែលសម្រេចបាននូវសមិទ្ធផលល្អ ក្នុងការអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ។ ដៃគូអភិវឌ្ឍន៍ និងអង្គការមិនមែនរដ្ឋាភិបាល ក៏បានផ្តល់នូវមតិយោបល់ និងការស្នើសុំមួយចំនួន សំដៅចូលរួមចំណែកក្នុងការពង្រឹងការគ្រប់គ្រងហិរញ្ញវត្ថុសាធារណៈ និងឆ្លើយតបទៅនឹងស្ថានភាពសេដ្ឋកិច្ចសកល រួមមាន៖ ការពង្រឹងការកៀរគរចំណូល, ការគ្រប់គ្រងវិនិយោគសាធារណៈ, ការអនុវត្តប្រព័ន្ធ FMIS, ការពង្រឹង​​ប្រព័ន្ធស្ថិតិជាតិ និងការបន្តលើកកម្ពស់តម្លាភាពថវិកា។ល។

ជាកិច្ចបញ្ចប់, ឯកឧត្តមអគ្គបណ្ឌិតសភាចារ្យឧបនាយករដ្ឋមន្ត្រី បានថ្លែងអំណរគុណ និងវាយតម្លៃខ្ពស់ចំពោះកិច្ចខិតខំប្រឹងប្រែងកន្លងមករបស់អគ្គលេខាធិការដ្ឋានគណៈកម្មាធិការដឹកនាំការងារកែទម្រង់ការគ្រប់គ្រង​​​​ហិរញ្ញវត្ថុ​សាធារណៈ, គ្រប់អង្គភាពនៃក្រសួងសេដ្ឋកិច្ច និងហិរញ្ញវត្ថុ និងក្រសួង ស្ថាប័ន រហូតសម្រេចបានសមិទ្ធផលនៅត្រីមាសទី ១ ឆ្នាំ ២០២៤ នេះ និងបានស្នើគ្រប់អង្គភាពក្រោមឱវាទក្រសួងសេដ្ឋកិច្ច និងហិរញ្ញវត្ថុ និងក្រសួង ស្ថាប័ន បន្តជំរុញការអនុវត្តផែនការសកម្មភាពរួមដំណាក់កាលទី ៤ នៅត្រីមាសបន្ទាប់ ដើម្បីសម្រេចតាមគោលដៅ​ដែលបានគ្រោងទុក ។​ ឯកឧត្តមអគ្គបណ្ឌិតសភាចារ្យ ក៏បានថ្លែងអំណរគុណដល់ដៃគូអភិវឌ្ឍន៍ និងភាគីពាក់ព័ន្ធទាំងអស់ដែលបានផ្តល់កិច្ចសហប្រតិបត្តិការល្អ និងគាំទ្ររាជរដ្ឋាភិបាលក្នុងការគ្រប់គ្រងហិរញ្ញវត្ថុសាធារណៈប្រកបដោយភាពបុរេសកម្ម៕