សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ស្របពេលដែលវិស័យអចលនទ្រព្យនៅកម្ពុជានៅតែមិនទាន់មានភាពប្រសើរឡើងដូចកាលមុនឆ្នាំ២០២០ រាជរដ្ឋាភិបាលបានស្វះស្វែងរកដំណោះស្រាយដើម្បីជំរុញវិស័យនេះឱ្យមានសន្ទុះងើបឡើងវិញ។ ជាដំណឹងល្អ ធនាគារចិនបានបង្ហាញនូវជម្រើសថ្មីជូនអ្នកអភិវឌ្ឍលំនៅឋាន និងអ្នកដែលបានទិញផ្ទះ និងមានបំណងទិញផ្ទះ ដោយធនាគារនឹងផ្តល់កម្ចីជាមួយនឹងអត្រាការប្រាក់ដែលមានភាពប្រកួតប្រជែងពី ៦.២% ទៅ ៦.៥% ប៉ុណ្ណោះ ដើម្បីជួយស្ដារវិស័យអចលនទ្រព្យកម្ពុជាឡើងវិញ ។
នៅថ្ងៃទី០៨ ខែឧសភា ឆ្នាំ២០២៥នេះ ក្រសួងរៀបចំដែនដី នគរូបនីយកម្ម និងសំណង់ បានបើកកិច្ចប្រជុំមួយដោយមានសមាសភាពតំណាងធនាគារជាតិនៃកម្ពុជា សមាគមអ្នកអភិវឌ្ឍន៍លំនៅឋាន សមាគមធនាគារនៅកម្ពុជា សមាគមមីក្រូហិរញ្ញវត្ថុកម្ពុជា សមាគមអ្នកសាងសង់កម្ពុជា ព្រមទាំងធនាគារចិន ដើម្បីពិភាក្សាលើការប្រើប្រាស់ឥណទានពីក្រៅប្រទេសដើម្បីស្ដារវិស័យអចលនទ្រព្យនៅកម្ពុជា ។
ឯកឧត្តមឧបនាយករដ្ឋមន្ត្រី សាយ សំអាល់ បានឱ្យដឹងថា កិច្ចប្រជុំនាពេលនេះធ្វើឡើងក្នុងគោលបំណងដើម្បីជូនដំណឹងទាក់ទិននឹងអត្រាការប្រាក់ដែលធនាគារចិនបានផ្តល់ជូន ដែលនេះជាកិច្ចការដ៏ល្អមួយសម្រាប់ធនាគារ និងមីក្រូហិរញ្ញវត្ថុនៅក្នុងប្រទេសកម្ពុជា។ ការជួបជុំគ្នានាពេលនេះក៏ដើម្បីជជែកពិភាក្សា និងស្នើសុំឱ្យមានការយោគយល់គ្នាទៅវិញទៅមកអំពីការសម្រួលលើឧស្សាហកម្មកម្ចីប្រាក់ដើម្បីទិញផ្ទះ ដែលកត្តានេះនឹងជួយសម្រួលលើផលប៉ះពាល់ដល់អាយុជីវិតប្រទេសជាតិ និងរាជរដ្ឋាភិបាលកម្ពុជា។
ឯកឧត្តមបន្តថា ៖
«បច្ចុប្បន្ននេះ ក្រសួងរៀបចំដែនដី នគរូបនីយកម្ម និងសំណង់ បានដោះស្រាយវិវាទបុរីអស់ជាច្រើនករណី ដើម្បីឱ្យប្រជាពលរដ្ឋជាអតិថិជនរបស់បុរីមានទំនុកចិត្តចំពោះរាជរដ្ឋាភិបាលកម្ពុជាដែលខិតខំរិះរកដំណោះស្រាយសមស្របរវាងពួកគាត់ និងម្ចាស់បុរី។ ជាមួយគ្នានេះ ក្រសួងក៏បានជួយដោះស្រាយសម្របសម្រួលលើអត្រាការប្រាក់ជាមួយបណ្ដាធនាគារ និងមីក្រូហិរញ្ញវត្ថុនានាក្នុងកម្ចីទិញផ្ទះសម្រាប់ប្រជាពលរដ្ឋដើម្បីឱ្យពួកគាត់មានលទ្ធភាពទិញលំនៅឋានរស់នៅសមរម្យ និងជួយលើកស្ទួយការប្រើប្រាស់ប្រាក់រៀល និងរក្សាស្ថិរភាពប្រាក់រៀលផងដែរ»។
តាមរយៈកិច្ចប្រជុំនេះ ឯកឧត្តមឧបនាយករដ្ឋមន្ត្រី បានបញ្ជាក់ថា ធនាគារចិនមានបំណងចង់ចូលរួមវិនិយោគក្នុងវិស័យប្រាក់កម្ចីដែលមានអត្រាការប្រាក់ទាបសម្រាប់អតិថិជនក្នុងប្រទេសកម្ពុជា ដូច្នេះនេះគឺជាកត្តាល្អមួយសម្រាប់ប្រជាពលរដ្ឋដែលមានបំណងចង់ទិញលំនៅឋានសម្រាប់រស់នៅ ហើយមិនទាន់មានលទ្ធភាពគ្រប់គ្រាន់ គឺអាចមានឱកាសទិញលំនៅឋានបានតាមរយៈប្រាក់កម្ចីដែលមានអត្រាការប្រាក់ទាបសមស្របតាមលទ្ធភាពដែលខ្លួនមាន ហើយនេះក៏ជាកត្តាល្អមួយដែលជំរុញឱ្យវិស័យអចលនទ្រព្យនៅក្នុងប្រទេសកម្ពុជាមានដំណើរការល្អឡើងវិញ ដោយសារប្រជាពលរដ្ឋមានលទ្ធភាពទិញផ្ទះហើយសំណង់លំនៅឋានដែលនៅសេសសល់នោះក៏អាចលក់អស់ និងមិនជាប់គាំងផងដែរ ៕
Account
Security
Favourite Content