សៀមរាប ៖ សមាគម​មីក្រូហិរញ្ញវត្ថុ​កម្ពុជា បានរៀបចំ​សន្និសីទ​មីក្រូហិរញ្ញវត្ថុ​ប្រចាំឆ្នាំ ២០២៥ នាសណ្ឋាគារ​សុខា ខេត្តសៀមរាប ដោយមានការ​ចូលរួម​ពី​មន្ត្រីជាន់ខ្ពស់ធនាគារ​ជាតិ ក្រសួងស្ថាប័ន អាជ្ញាធរ និងសមាជិក​សមាគមជាច្រើន​។ ក្នុង​សន្និសីទមីក្រូហិរញ្ញវត្ថុឆ្នាំ ២០២៥ នេះ សមាគមមីក្រូហិរញ្ញវត្ថុ​បានលើកយកប្រធានបទ​ស្ដីពី បរិយាបន្ន​ហិរញ្ញវត្ថុក្នុង​បរិបទសកល​កំពុង​ប្រែប្រួលមកជជែក​និងពិភាក្សា ។

នៅក្នុងពិធីបើក​សន្និសីទមីក្រូហិរញ្ញវត្ថុប្រចាំឆ្នាំ ២០២៥ កាលពីថ្ងៃទី០៥ ខែធ្នូ ឆ្នាំ ២០២៥ លោកជំទាវ ​ឌិត នីតា ប្រធាន​ក្រុមប្រឹក្សាភិបាល​សមាគម​មីក្រូហិរញ្ញវត្ថុ​កម្ពុជា បានមានប្រសា​ស​ន៍​ថា៖ឆ្នាំនេះជាឆ្នាំទី១៨ដែលសមាគម​មីក្រូហិរញ្ញវត្ថុ​កម្ពុជាបានរៀបចំសន្និ​សីទ​មីក្រូហិរញ្ញវត្ថុ​​ប្រចាំឆ្នាំនេះឡើង។សម្រាប់ឆ្នាំ២០២៥នេះសមាគម​បានលើកយក​ប្រធានបទស្ដីពី​បរិយា​បន្ន​ហិរញ្ញវត្ថុ​ក្នុងបរិបទសកល​កំពុង​ប្រែ​ប្រួលមកធ្វើជា​ប្រធាន​បទ សម្រាប់ស្រាវជ្រាវ និងពិភាក្សា​ ។

លោកជំទាវ​បន្តថា៖សកលលោកនាពេល​បច្ចុប្បន្ន​នេះមិនត្រឹមតែផ្លាស់ប្តូរផ្នែក​ភូមិសាស្ត្រ​នយោបាយ​នោះទេ តែ​វាក៏កំពុង​ប្រែប្រួល​ផ្នែកសេដ្ឋកិច្ច និងហិរញ្ញវត្ថុ​ផងដែរ។វិស័យមីក្រូហិរញ្ញវត្ថុកំពុងតែឆ្ពោះទៅរក​គន្លង​ថ្មីៗ​រួមមាន​ហិរញ្ញវត្ថុ​បៃតង ​កិច្ចការ​ពារ​អតិថិជន ហិរញ្ញវត្ថុ​ប្រកបដោយបរិយាបន្ន​ឌីជីថល​នីយកម្ម នវានុវត្តន៍​ធនធានមនុស្សជំនាន់​ GenZនិង​សមភាពយេន​ឌ័រ ។

លោកជំទាវ​មានប្រសាសន៍ថា ៖

« សន្និសីទ នៅថ្ងៃនេះ នឹងមានបទបង្ហាញសំខាន់​ៗ និងកិច្ចពិភាក្សា​ជាក្រុមយ៉ាង​ស៊ីជម្រៅ ដោយមានការ​ចូលរួមពីសំណាក់តួអង្គ​សំខាន់ៗក្នុងវិស័យ​មីក្រូហិរញ្ញវត្ថុ​ និងអ្នកជំនាញ​ដែលមានការទទួល​ស្គាល់​ជាតិនិងអន្តរជាតិ » ។

លោក​ជំទាវសង្ឃឹមថា តាមរយៈសន្និសីទ​មីក្រូហិរញ្ញវត្ថុ​នៅថ្ងៃនេះ នឹង​បានសិក្សាស្វែងយល់បន្ថែមពីបញ្ហាចម្បង​ៗ នៃបរិយាបន្ន​ហិរញ្ញវត្ថុ​ក្នុង​បរិបទសកល ដែល​កំពុង​មានការប្រែប្រួលឆាប់រហ័សនិងបានប៉ាន់​ស្មានក្នុងវិស័យមីក្រូហិរញ្ញវត្ថុ ដែលជា​លទ្ធផល​នៃការ​ស្រាវជ្រាវ​និ​ងបទអន្តរាគមន៍បរបស់វាគ្មិន​ ។ លើសពីនេះ លទ្ធផល​នៃការ​ស្រាវជ្រាវ​និងកិច្ច​ពិភាក្សា​នាពេលនេះ នឹង​ផ្ដល់​ជា​ធាតុចូលយ៉ាង​សំខាន់សម្រាប់​ការ​រៀបចំគោល​នយោបាយ​លើ​វិស័យមីក្រូហិរញ្ញវត្ថុ ប្រកបដោយប្រសិទ្ធភាព​និងគ្រប់ជ្រុង​ជ្រោយ សំដៅ​រួម​ចំណែក​ធានា​ឱ្យបាននូវ​ការអភិវឌ្ឍ​សេដ្ឋកិច្ចជាតិ​ប្រកបដោយចីរភាព​និងបរិយាបន្ន​ ។

ឯកឧត្តម​យឹម លាត ទេសាភិបាលរង​ធនាគារ​ជាតិនៃកម្ពុជា បានមានប្រសាសន៍ថា៖កម្មវិធីនេះ នឹ​ងផ្ដល់​ឱកាស​ដល់ដៃគូពាក់ព័ន្ធ​ស្វែង​យល់​បន្ថែមអំពី​បញ្ហា​ប្រឈម ចែក​រំលែក​បទពិសោធន៍ល្អក្នុងស្ថានភាពនៃវិស័យហិរញ្ញវត្ថុ​ប្រកបដោយចីរភាព ។  តាមរយៈកម្មវិធីនេះដែរ ឯកឧត្តមជឿជាក់ថា​ សន្និសីទ មីក្រូហិរញ្ញវត្ថុប្រចាំឆ្នាំ ២០២៥​នេះ នឹងទទួលបានធាតុចូល​ដ៏មានតម្លៃសម្រាប់ពង្រឹង​ និងមានចំណាត់ការ​កិច្ចការពារ​អតិថិជន អភិវឌ្ឍន៍បច្ចេកវិទ្យាថ្មី ពង្រឹង​សាមគ្គីភាពរវា​ងភាគីទាំងអស់ ។

ឯកឧត្តមបាន ​ចូលរួម​អបអរសាទរ​ចំពោះលទ្ធផល​ដែល​​សមាគម​មីក្រូហិរញ្ញវត្ថុកម្ពុជា សម្រេច​បាននាពេល​កន្លងមក និងបាន​កោតសរសើរ​ខ្ពស់​ចំពោះកិច្ច​ខិត​ខំប្រឹង​ប្រែង​របស់​សមាគម និងគ្រឹះស្ថាន ក្នុងការ​ចូលរួមបង្កើត​ភាពជោគជ័យរួមគ្នា​ ប្រកបដោយចីរភាព ។ ទាំងអស់​នេះ​បានស​បញ្ជាក់​ឱ្យឃើញយ៉ាងមុត​មាំអំពី សុឆន្ទៈ ភារតភាព និងសាមគ្គីភាពជាធ្លុង​មួយរបស់ថ្នាក់ដឹកនាំគ្រប់​លំដាប់​ថ្នាក់នៃ​មហាគ្រួសារ​មីក្រូហិរញ្ញវត្ថុ​ ។

ឯកឧត្តម​បានមានប្រសាសន៍បន្ថែមថា​ កម្មវិធីសន្និសីទហិរញ្ញវត្ថុនៅថ្ងៃនេះ មានភាពសមស្របជាមួយនឹង និន្នាការ​បច្ចុប្បន្ន​ដូចជា ហិរញ្ញវត្ថុ​បៃតង​ បច្ចេកវិទ្យាឌីជីថល នវានុវត្ត​ន៍ កម្លាំង​ការងារ Gen Z និង សមភាពយេនឌ័រ ។

យោងតាមសេចក្ដីប្រកាសព័ត៌មានរបស់មីក្រូហិរញ្ញវត្ថុ​កម្ពុជា ឱ្យដឹងថា​ សន្និសីទមីក្រូហិរញ្ញវត្ថុ​ឆ្នាំ ២០២៥ មានអ្នកចូលរួម​ប្រមាណជាង​៤០០នាក់ ដែលភាគច្រើន​ជាអ្នក​ដឹកនាំជាន់ខ្ពស់មកពីគ្រឹះស្ថាន​ជា​សមាជិករបស់​សមាគម​មីក្រូហិរញ្ញវត្ថុកម្ពុជា និយ័តករ​ តំណាង​មកពីដៃគូអភិវឌ្ឍន៍ និងអ្នកជំនាញអន្តរជាតិ ។ សន្និសីទនេះ នឹងជួយ​សម្របសម្រួល​ឱ្យ​មានកា​រដោះដូរ និងចែករំលែកចំណេះដឹងកម្រិតខ្ពស់តាមរយៈទម្រង់​ផ្សេងៗ ៕