សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ ថ្មីៗនេះ រដ្ឋមន្ត្រីក្រសួងការពារជាតិអាមេរិក លោកមេបញ្ជាការ Pete Hegseth បានប្រកាសដាក់បទបញ្ជាទៅកាន់ក្រុមមន្ត្រីយោធាជាន់ខ្ពស់ទាំងអស់ក្នុងការចូលរួមរៀបចំផែនការថវិកាជាតិសម្រាប់វិស័យយោធាដែលនឹងអាចកាត់បន្ថយខ្ទង់ចំណាយរហូតទៅដល់ ៨ភាគរយ។
យោងតាមការចេញផ្សាយដោយគេហទំព័រ Defense News នៅសប្តាហ៍នេះបានសរសេរថា ផែនការកាត់បន្ថយខ្ទង់ចំណាយថ្មីនេះអាចជះឥទ្ធិពលយ៉ាងខ្លាំងទៅដល់ប្រសិទ្ធភាពនៃកងកម្លាំងការពារជាតិហើយវាអាចធ្វើឲ្យខូចខាតទៅលើការត្រៀមលក្ខណៈរបស់អាមេរិកក្នុងប្រតិបត្តិការយោធានានាដែលធ្លាប់បានប្រឹងប្រែងអស់រយៈពេលជាច្រើនទសវត្សរ៍មកហើយនោះផងដែរ។
ដោយឡែកនៅក្នុងអត្ថបទចេញផ្សាយនៅលើកាសែតវ៉ាស៊ិនតោនប៉ុស្តិវិញក៏បានបង្ហាញដូចគ្នាដែរថា លោករដ្ឋមន្ត្រី Hegseth បានចេញបញ្ជានេះកាលពីប៉ុន្មានថ្ងៃមុន និងបានកំណត់យកពេលរៀបចំឲ្យបានរួចរាល់នៅត្រឹមដើមសប្ដាហ៍ទី៤នៃខែកុម្ភៈនេះ ដោយក្នុងនោះត្រូវបែងចែកទៅជា៧ផ្នែកនៃផែនការកាត់បន្ថយចំណាយបូករួមទាំងការចំណាយលើប្រតិបត្តិការយោធានៅព្រំដែនខាងត្បូង ការកាត់បន្ថយលើកម្មវិធីនុយក្លេអ៊ែរ និងមីស៊ីល ព្រមទាំងកាត់បន្ថយការចំណាយទៅលើការទិញគ្រាប់រំសេវ រួមទាំងដ្រូននានាផងដែរ។
ដំណឹងអំពីផែនការកាត់បន្ថយខ្ទង់ចំណាយយោធានេះត្រូវបានធ្វើឡើងលើកដំបូងកាលពីប៉ុន្មានសប្តាហ៍មុនមកម្ល៉េះ ប៉ុន្តែគេជឿជាក់ថានឹងត្រូវបដិសេធដោយសមាជិកសភារបស់គណបក្សសាធារណៈ។ គួរឲ្យដឹងដែរថា សមាជិកសភាមកពីគណបក្សប្រជាធិបតេយ្យ និងបក្សសាធារណៈ ដែលទើបតែចុះចេញពីតំណែងមានជំហផ្ទុយគ្នាទាំងស្រុងទៅលើខ្ទង់ចំណាយយោធាដោយម្ខាងចង់បង្កើនឲ្យកាន់តែច្រើនតែម្ខាងទៀតចង់កាត់បន្ថយឲ្យតិចជាងមុនទៅវិញ។
ជាផ្នែកមួយនៃកិច្ចការងារដំបូង និងជាអាទិភាពរបស់លោកប្រធានាធិបតីថ្មី Donald Trump គឺការកាត់បន្ថយចំណាយរបស់រដ្ឋាភិបាល មិនថាចំពោះតែលើវិស័យយោធានោះទេ សូម្បីតែវិស័យសង្គម និងការងារជំនួយមនុស្សធម៍ ជាពិសេស បុគ្គលសហព័ន្ធដែលមានចំនួនរាប់ពាន់នាក់ក៏ត្រូវបានកាត់បន្ថយប្រាក់ចំណាយឧបត្ថម្ភផងដែរ។
គួរឲ្យដឹងដែរថា ខ្ទង់ចំណាយយោធារបស់អាមេរិកក្នុងឆ្នាំ២០២៤កន្លងទៅមានចំនួនរហូតដល់ទៅ៨៥០ពាន់លានដុល្លារ ប៉ុន្តែមកទល់ពេលនេះផែនការសម្រាប់ឆ្នាំថ្មី២០២៥គឺនៅមិនទាន់បានសម្រេចចិត្តជាផ្លូវការនៅឡើយទេ៕
Account
Security
Favourite Content