ភ្នំពេញ ៖ នៅសល់ពេលតែប៉ុន្មានថ្ងៃទៀតប៉ុណ្ណោះ គឺឆ្លងចូលឆ្នាំថ្មី ឆ្នាំ២០២៥ ដែលជាការបើកទំព័រគ្រឹះសករាជថ្មី ដែលក្រុមគ្រួសារ ក៏ដូចជាបុគ្គលនីមួយៗ គួរពិនិត្យផែនការហិញ្ញវត្ថុរបស់ខ្លួនឡើងវិញ ដើម្បីពង្រឹងការរៀបចំប្រព័ន្ធហិរញ្ញវត្ថុផ្ទាល់ខ្លួនឱ្យកាន់តែរឹងមាំ ខណៈដែលភាពមិនប្រាកដប្រជានៃសេដ្ឋកិច្ចសកលអាចនឹងអូសបន្លាយពេលបន្តទៀត។

អ្នកជំនាញសេដ្ឋកិច្ច និងហិរញ្ញវត្ថុបានលើកឡើងថា វិបត្តិសេដ្ឋកិច្ចកសលអាចអូសបន្លាយពេលបន្តទៀត ដូច្នេះហើយគ្រួសារ និងបុគ្គលម្នាក់ៗត្រូវរៀបចំប្រព័ន្ធហិរញ្ញវត្ថុឱ្យបានរឹងមាំក្នុងអំឡុងពេលដែលវិបត្តិនេះអាចនឹងបន្តប៉ះពាល់ដល់ស្ថានភាពហិរញ្ញវត្ថុរបស់គ្រួសារ និងបុគ្គលនីមួយៗ។

ទោះបីជាយ៉ាងក្តី មានគន្លឹះសំខាន់ចំនួន ៣ អាចជួយប្រព័ន្ធហិរញ្ញវត្ថុរបស់អ្នកឱ្យកាន់តែរឹងមាំ ក្នុងអំឡុងពេលវិបត្តិអាចនឹងបន្តអូសបន្លាយពេលយូរ ៖

១. ពិនិត្យមើលផែនការហិរញ្ញវត្ថុឡើងវិញ ៖ អ្នកគួរពិនិត្យផែនការហិរញ្ញវត្ថុរបស់ខ្លួនឡើងសម្រាប់ឆ្នាំថ្មី ជាពិសេសតារាងចំណូលចំណាយប្រចាំថ្ងៃ ប្រចាំខែ និងប្រចាំឆ្នាំ កញ្ចប់សន្សំសម្រាប់គ្រាអាសន្ន និងកញ្ចប់សន្សំសម្រាប់ការចូលនិវត្តន៍ជាដើម។ នៅពេលអ្នកពិនិត្យមើលពីផែនការហិរញ្ញវត្ថុរបស់អ្នក ហើយឃើញថាមានចន្លោះប្រហោង នោះអ្នកគួរបំពេញបន្ថែមនូវចន្លោះប្រហោងទាំងនោះ ដើម្បីពង្រឹងប្រព័ន្ធហិរញ្ញវត្ថុផ្ទាល់ខ្លួនរបស់អ្នក។ អំឡុងពេលភាពមិនប្រាកដប្រជានៃសេដ្ឋកិច្ចសកល  គ្រួសារ ឬបុគ្គលនីមួយៗគួរកាត់បន្ថយការចំណាយមិនចាំបាច់ ដូចជាការចំណាយរបស់របរប្រ៊េនៗ ជួបជុំផឹកស៊ី និងជប់លៀងដែលមិនចាំបាច់ជាដើម។ និយាយរួម កាត់បន្ថយការចំណាយតាមដែលអាចធ្វើបាន ដើម្បីបង្កើនការសន្សំសំចៃឱ្យបានច្រើន។

២. ទូទាត់សងបំណុល ៖ ប្រសិនបើអ្នកប្រើប្រាស់កម្ចី ដែលភាសាសាមញ្ញហៅថា “បំណុល” អ្នកត្រូវមានភារកិច្ចទូទាត់សងបំណុលឱ្យគ្រឹះស្ថានហិញ្ញវត្ថុ ដែលអ្នកបានប្រើប្រាស់។ ដូច្នេះ សម្រាប់ឆ្នាំ២០២៥ ខាងមុខនេះ អ្នកត្រូវបែងចែកចំណូលឱ្យបានច្បាស់លាស់ ដូចជាលើការទូទាត់សងបំណុល ចំណាយចាំបាច់ និងរបស់របរដែលចង់បាន។ អ្នកអាចសាកល្បងប្រើប្រាស់រូបមន្ត ៥០/៣០/២០ ដែលជាវិធីសាស្រ្តពេញនិយមមួយ ដើម្បីចាត់ចែងថវិកាឱ្យបានច្បាស់លាស់។ ការអនុវត្តរូបមន្តនេះ មានដូចតទៅ ៖ ចំណូល ៥០% របស់អ្នកសម្រាប់តម្រូវការចាំបាច់ (Needs) ចំណូល ៣០% សម្រាប់របស់របរដែលអ្នកចង់បាន (Wants) និង ២០% ទៀត សម្រាប់ការសន្សំ និងការទូទាត់សងបំណុល (Saving/Debt repayment)។ មួយវិញទៀត ប្រសិនបើអាចទៅរួច ឬនៅពេលមានឱកាសរកប្រភពចំណូលបន្ថែមក្នុងឆ្នាំថ្មីខាងមុខនេះ អ្នកគួររកចំណូលបន្ថែម ដើម្បីបង្កើនការសន្សំបានឱ្យបានច្រើន ហើយនៅពេលអ្នកមានលទ្ធភាពគ្រប់គ្រាន់ក្នុងការទូទាត់សងផ្តាច់បំណុល អ្នកគួរទូទាត់វាឱ្យហើយ នោះវាធ្វើឱ្យអ្នកមានភាពធូរស្រាលខ្លាំងផ្នែកហិញ្ញវត្ថុ។

៣. សន្សំ ៖ សម្រាប់ឆ្នាំថ្មីនេះ ទោះបីជាអ្នកមិនមានប្រាក់ចំណូលច្រើនដើម្បីសន្សំក៏ដោយ ការសន្សំចាប់ផ្តើមពីតិចទៅច្រើន។ អ្នកអាចបង្កើតគណនីសន្សំ និងដាក់ប្រាក់សន្សំនៅធនាគារ និងគ្រឹះស្ថានហិរញ្ញវត្ថុទទួលប្រាក់បញ្ញើ ព្រោះបច្ចុប្បន្ននេះ ការដាក់ប្រាក់សន្សំនៅធនាគារ និងគ្រឹះស្ថានហិរញ្ញវត្ថុទទួលប្រាក់បញ្ញើ ទទួលបានអត្រាការប្រាក់ខ្ពស់ ជាជាងការសន្សំលុយនៅផ្ទះ ឬលេងតុងទីនដែលប្រឈមនឹងហានិភ័យខាតបង់ខ្ពស់។

និយាយជារួម ការសន្សំមានអត្ថប្រយោជន៍ច្រើន ជាពិសេសអាចជួយឱ្យអ្នកសម្រេចបានក្តីបំណងប្រាថ្នារបស់អ្នក ដូចជាលំនៅដ្ឋានក្នុងក្តីស្រមៃ រថយន្ត ការដោះស្រាយបញ្ហាក្នុងគ្រាអាសន្ន និងផែនការចូលនិវត្តន៍ជាដើម៕