សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងរយៈពេលប៉ុន្មានឆ្នាំចុងក្រោយនេះ កំណើនសហគ្រិននៅក្នុងប្រទេសកម្ពុជាបានកើនឡើងជាបន្តបន្ទាប់ ជាក់ស្ដែងនិសិ្សតដែលបញ្ចប់ការសិក្សាពីសាកលវិទ្យាល័យនានាបានទៅបង្កើតអាជីវកម្ម និងសហគ្រាសជាច្រើនដែលការបង្កើតសហគ្រាស និងអាជីវកម្មទាំងនេះ ក៏បានជួយដល់ការបង្កើតមុខរបរដល់ប្រជាពលរដ្ឋកម្ពុជាផងដែរ ខណៈដែលតម្រូវការអគារការិយាល័យជួលមានការកើនឡើង។
លោក ខេន ឡូ ប្រធានក្រុមប្រឹក្សាភិបាលនៃក្រុមហ៊ុន Cowell Banker Cambodia បានលើកឡើងថា កំណើននៃក្រុមហ៊ុនក្នុង និងក្រៅប្រទេសនៅកម្ពុជាបានធ្វើឱ្យមានតម្រូវការជួលលើការិយាល័យកើនឡើង ហើយកាលពីមុនម្ចាស់ក្រុមហ៊ុនភាគច្រើនជួលតែផ្ទះល្វែង ឬវីឡាសម្រាប់ធ្វើជាការិយាល័យរបស់ខ្លួន ប៉ុន្តែក្រោយមកក៏បានផ្លាស់ទៅជាជួលការិយាល័យនៅតាមអគារការិយាល័យ ។
លោកបន្តថា ៖
“ដោយសារតែមានក្រុមហ៊ុនបរទេសជាច្រើនចូលមករកស៊ីនៅក្នុងប្រទេសកម្ពុជា ក៏ត្រូវការរកការិយាល័យស្តង់ដារ ជាពិសេសការិយាល័យកម្រិត B និង A ហើយក៏ធ្វើការវិនិយោគលើការអភិវឌ្ឍការិយាល័យទាំងពីរកម្រិតនេះដែលមានការកើនឡើងដូចគ្នាផងដែរ។ ក្រុមហ៊ុនបរទេសគេមកបើកការិយាល័យនៅក្នុងប្រទេសកម្ពុជា គេត្រូវការការិយាល័យដែលស្តង់ដារ ដើម្បីឱ្យភ្ញៀវរបស់គេមកមានទីតាំងសម្រាប់ទទួលភ្ញៀវ មានកន្លែងប្រជុំ ជាដើម ហើយក្រោយៗមកទៀតក៏ក្រុមហ៊ុនក្នុងស្រុកបានរកការិយាល័យបែបនេះដូចគ្នាផងដែរ”
លោក ខេន ឡូ ៖
“បានបន្ថែមថា ក្រៅពីក្រុមហ៊ុនឯកជន ក្នុង និងក្រៅប្រទេសដែលត្រូវការនូវការិយាល័យស្តង់ដារបែបនេះ ក៏មានអង្គការ ស្ថាប័នអន្តរជាតិជាច្រើនទៀត ដែលចូលមកកម្ពុជាក៏មានតម្រូវការលើជួលស្នាក់ការរបស់ពួកគេដែរ ហេតុដូច្នេះហើយទើបយើងមើលឃើញថា ពីមួយឆ្នាំទៅមួយឆ្នំាតម្រូវការការិយាល័យក្នុងប្រទេសកម្ពុជាកាន់តែមានកំណើន”
គួរកត់សម្គាល់ផងដែរថា ក្រោយពេលស្ថានភាពកូវីដ១៩ក្នុងប្រទេសកម្ពុជាមានភាពធូរស្រាល កំណើនអាជីវកម្មរបស់សហគ្រិនជាច្រើនចាប់ផ្ដើមមានសកម្មភាពកើនឡើងវិញជាបន្តបន្ទាប់ ដែលជំរុញឱ្យតម្រូវការអចលនទ្រព្យផ្នែកពាណិជ្ជកម្ម ដូចជាទីតាំងអាជីវកម្មមានតម្រូវការកើនឡើងជាងមុនវិញបន្តិច ហើយរំពឹងថានឹងបន្តមានកំណើនឡើងបន្ថែមទៀតនៅពេលស្ថានភាពសេដ្ឋកិច្ចសកលបានប្រសើរ៕
Account
Security
Favourite Content