បរទេស ៖ យោងទៅតាមប្រភពព័ត៌មានពីរ៉យទ័របានរាយការណ៍ថា ​ក្រសួងពាណិជ្ជកម្មអាមេរិបានស្នើចេញច្បាប់មួយសម្រាប់ការពារការវិនិយោគទំហំ ៥២ ពាន់លានដុល្លារនៅក្នុងវិស័យឧស្សាហកម្មបន្ទះឈីបដើម្បីបញ្ចៀសពីការទាញប្រយោជន៍ដោយចិន និងបណ្តាប្រទេសផ្សេងៗទៀត។

សំណើនេះនឹងរឹតបន្តឹងអ្នកទទួលហិរញ្ញប្បទានពីសហរដ្ឋអាមេរិក ដែលយកទៅប្រើប្រាស់សម្រាប់ការវិនិយោគលើការផលិតឈីប semiconductor នៅបរទេស ដូចជា ប្រទេសចិន និងរុស្ស៊ី ហើយក៏ហាមឃាត់អ្នកដែលទទួលបានមូលនិធិពីការធ្វើការរួមគ្នា ការស្រាវជ្រាវគម្រោងរួមគ្នា ឬគម្រោងបច្ចេកវិទ្យាជាមួយនឹងងអង្គភាពបរទេសផងដែរ។ ស្របពេលជាមួយគ្នានេះដែរ ឈីប semiconductors មួយចំនួនត្រូវបានចាត់ថ្នាក់ជាឧបករណ៍ដែលមានសារៈសំខាន់ចំពោះសន្តិសុខជាតិ ដូច្នោះហើយវាចាំបាច់ត្រូវមានការរឹតបន្តឹងយ៉ាងតឹងរ៉ឹង។ មិនត្រឹមតែប៉ុណ្ណោះ វិធានការនេះក៏រួមបញ្ចូលទាំងបន្ទះឈីបទាំងសេរ៊ីចាស់ និងជំនាន់ថ្មី ដែលប្រើសម្រាប់ការកំព្យូទ័រ បរិយាកាសដែលពឹងផ្អែកវិទ្យុសកម្ម និងសម្រាប់ឯកទេសនៅក្នុងវិស័យយោធាផ្សេងៗទៀត។

កាលពីថ្ងៃអង្គារកន្លងទៅនេះ ក្រសួងពាណិជ្ជកម្មសហរដ្ឋអាមេរិកបាននិយាយថា ខ្លួននឹងពង្រឹងការគ្រប់គ្រងទាំងនោះដោយការរឹតបន្តឹងផ្នែកបច្ចេកវិទ្យាសម្រាប់បន្ទះឈីប ការត្រួតពិនិត្យការនាំចេញយ៉ាងតឹងរ៉ឹង និងការការពារវិស័យឈីបដើម្បីសន្តិសុខជាតិ។

លើសពីនេះផងដែរ ក្រសួងពាណិជ្ជកម្មសហរដ្ឋអាមេរិកគ្រោងនឹងចាប់ផ្តើមទទួលយកពាក្យនៅចុងខែមិថុនាខាងមុននេះ សម្រាប់កម្មវិធីឧបត្ថម្ភធនក្នុងទំហំតម្លៃ ៣៩ ពាន់លានដុល្លារលើការផលិតឈីប semiconductor ។ ច្បាប់នេះក៏បង្កើតឥណទានពន្ធ ២៥ ភាគរយលើការវិនិយោគសម្រាប់ការសាងសង់រោងចក្រផលិតបន្ទះឈីបផងដែរ។ កាលពីខែតុលាកន្លងទៅនេះ ក្រសួងនេះបានចេញនូវច្បាប់ត្រួតពិនិត្យការនាំចេញ ដើម្បីកាត់ផ្តាច់ប្រទេសចិនចេញពីឧស្សាហកម្មបន្ទះឈីប semiconductor មួយចំនួនដែលផលិតនៅគ្រប់ទីកន្លែងក្នុងពិភពលោកជាមួយនិង ដើម្បីទប់ស្កាត់ល្បឿនក្នុងការរីកចម្រើនផ្នែកបច្ចេកវិទ្យា និងយោធារបស់ទីក្រុងប៉េកាំង។ កាលពីខែតុលាដូចគ្នានោះដែរ ច្បាប់ដែលបានបង្កើតឡើងសម្រាប់ការរឹតបន្តឹងលើវិស័យឈីបានផ្ញើជាលិខិតទៅកាន់ក្រុមហ៊ុនផលិតឧបករណ៍អេឡិចត្រូនិកកំពូលៗដូចជា KLA Corp (KLAC.O), Lam Research Corp (LRCX.O) និង Applied Materials Inc (AMAT.O) ដែលតម្រូវឱ្យពួកគេបញ្ឈប់ការដឹកជញ្ជូនឧបករណ៍អេឡិចត្រូនិកទាំងស្រុងទៅកាន់ប្រទេសចិន ដែលមានរោងចក្រផលិតបន្ទះឈីបកម្រិតខ្ពស់៕