សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ឯកឧត្តម ទេសរដ្ឋមន្ត្រីទទួលបន្ទុកបេសកកម្មពិសេស អ្នកឧកញ៉ាបណ្ឌិត អូស្មាន ហាស្សាន់ និងជាប្រធានក្រុមប្រឹក្សាភិបាលសមាគមអាម៉ាណះតាកាហ្វុលកម្ពុជា បានជំរុញ និងអំពាវនាវឱ្យបងប្អូនខ្មែរ-ឥស្លាមនៅក្នុងប្រទេសកម្ពុជាប្រើប្រាស់សេវាហិរញ្ញវត្ថុធនាគារ ដោយបង្កើតគណនីធនាគារ និងទុកដាក់ប្រាក់របស់ខ្លួននៅក្នុងធនាគារ ដើម្បីការពារទ្រព្យសម្បត្តិដែលខ្លួនខិតខំរកជាច្រើននោះ ។
ឯកឧត្តមលើកឡើងបែបនេះនៅក្នុងពិធីចុះអនុស្សរណៈនៃការយោគយល់គ្នារវាងសមាគមអាម៉ាណះតាកាហ្វុលកម្ពុជា ជាមួយធនាគារ អេស៊ីលីដា ភីអិលស៊ី ស្ដីពីការអនុវត្តកម្មវិធីគម្រោង លុយខ្ញុំស្អាត កាលពីព្រឹកថ្ងៃទី០៧ ខែមេសា ឆ្នាំ ២០២៥ ។ តាមច្បាប់របស់បងប្អូនខ្មែរឥស្លាម ការបង្កើតគណនីធនាគារហើយទុកដាក់លុយកាក់ក្នុងគណនីដោយទទួលបានការប្រាក់ គឺជារឿងដែលមិនស្របតាមច្បាប់របស់ពួកគាត់ ។ ប៉ុន្តែចាប់ពីពេលនេះបងប្អូនខ្មែរឥស្លាមអាចបង្កើតគណនីធនាគារ ទុកដាក់លុយកាក់ដែលជាទ្រព្យសម្បត្តិរបស់ខ្លួនដោយអត្រាការប្រាក់នឹងបង្វែទៅគណនីធនាគាររបស់សមាគមអាម៉ាណះ តាកាហ្វុលកម្ពុជា ដើម្បីយកទៅអភិវឌ្ឍន៍សង្គម ។
ឯកឧត្តមបានមានប្រសាសន៍បន្តថា នៅក្នុងប្រទេសកម្ពុជា មានបងប្អូនខ្មែរ-ឥស្លាមប្រមាណជាង៨០ម៉ឺននាក់ ហើយដោយសារតែពួកគាត់ប្រកាន់ខ្ជាប់នូវច្បាប់របស់ឥស្លាម ទើបពួកគាត់មិនប្រើប្រាស់នូវសេវាហិរញ្ញវត្ថុរបស់ធនាគារ ដូចនឹងបងប្អូនពលរដ្ឋខ្មែរយើង ដូច្នេះហើយទើបសមាគមអាម៉ាណះតាកាហ្វុលកម្ពុជា បានរិះរកវិធីធ្វើយ៉ាងណាឱ្យបងប្អូនខ្មែរ ឥស្លាម អាចទទួលសេវាដូចប្រជាពលរដ្ឋទូទៅដូចប្រជាពលរដ្ឋកម្ពុជាដែរ ។
ឯកឧត្តមឧកញ៉ាបណ្ឌិត អូស្មាន ហាស្សាន់ បានលើកឡើងថា ៖
«ចាប់ពីពេលនេះតទៅ ពោលគឺក្រោយពីសមាគមអាម៉ាណះតាកាហ្វុលកម្ពុជា បានចុះហត្ថលេខាជាមួយធនាគារ អេស៊ីលីដា ភីអិលស៊ី បងប្អូនខ្មែរឥស្លាម អាចបង្កើតគណនីធនាគារ និងប្រើប្រាស់សេវាធនាគារដូចពលរដ្ឋខ្មែរទូទៅ និងស្របតាមច្បាប់របស់ឥស្លាមផងដែរ ។ កន្លងមកយើងឃើញថាពលរដ្ឋខ្មែរឥស្លាម ដែលរងគ្រោះដោយសារឧបទ្ទវហេតុដូចជាភ្លើងឆេះផ្ទះជាដើម យើងឃើញព័ត៌មានចុះផ្សាយថាពួកគាត់បាត់បង់លុយរាប់ម៉ឺនដុល្លារ រាប់លានរៀល ឬទ្រព្យសម្បត្តិជាច្រើនទៀត ក៏ប៉ុន្តែចាប់ពីពេលនេះពួកគាត់អាចទុកដាក់លុយឬទ្រព្យសម្បត្តិរបស់ពួកគាត់ក្នុងធនាគារ នឹងអាចការពារទ្រព្យសម្បត្តិរបស់ពួកគាត់បាន ហើយការប្រាក់ដែលទទួលបានពីធនាគារក៏នឹងចូលទៅក្នុងគណនីរបស់សមាគមអាម៉ាណះ តាកហ្វុលដែលអាចយកទៅកសាងសមិទ្ធផលជួយសង្គមបានច្រើនទៀតផងដែរ»។
លោកបណ្ឌិតអ៊ិន ចាន់នី ប្រធាននាយកប្រតិបត្តិធនាគារអេស៊ីលីដា ភីអិលស៊ី បានមានប្រសាសន៍ថា អនុស្សរណៈយោគយល់រវាងធនាគារអេស៊ីលីដា និងសមាគមអាម៉ាណះតាកហ្វុលនាពេលនេះ គឺជាការឆ្លុះបញ្ចាំងនៃការប្ដេជ្ញាចិត្តនៃភាគីទាំងពីរ ដើម្បីផ្ដល់ជូននូវសេវាហិរញ្ញវត្ថុស្របតាមគោលការណ៍ច្បាប់ឥស្លាម និងអាចគ្រប់គ្រងហិរញ្ញវត្ថុរបស់សមាគមនៃសមាគមទាំងអស់ដោយគ្មានបន្ទុករបស់ RIBA ។
លោកបណ្ឌិតបន្តថា ភាពជាដៃគូនេះ ក៏បានផ្ដល់ជូននូវដំណោះស្រាយប្រកបដោយតម្លាភាព សុវត្ថិភាព ដោយធនាគារនឹងផ្ដល់ជូននូវសេវាកម្មធនាគារដែលគោរពតាមច្បាប់សារីអះ ដែលអនុញ្ញាតឱ្យបងប្អូនខ្មែរឥស្លាមអាចដាក់ប្រាក់សន្សំដោយមិនទទួលការប្រាក់ ឬត្រូវបានកាត់ចេញដោយស្វ័យប្រវត្តិចូលទៅគណនី របស់សមាគមអាម៉ាណះតាកាហ្វុលកម្ពុជា ដែលមាននៅក្នុងធនាគារអេស៊ីលីដា សម្រាប់កម្មវិធីគម្រោង លុយខ្ញុំស្អាត សម្រាប់ប្រើប្រាស់នៅក្នុងគម្រោងសហគមន៍ និងសកម្មភាពសប្បុរសធម៌នានា ដែលអនុលោមតាមច្បាប់ឥស្លាម ៕
Account
Security
Favourite Content