បរទេស ៖ កងកម្លាំងយោធារបស់រដ្ឋាភិបាលទីក្រុងវ៉ាស៊ិនតោនកាលពីប៉ុន្មានថ្ងៃមុនកន្លងមកនេះបានដាក់ការសង្ស័យថា ប្រទេសចិន និងប្រទេសរុស្ស៊ី សុទ្ធតែបានធ្វើតេស្តសមត្ថភាពអាវុធនៅទីអវកាសរបស់ខ្លួនជាច្រើនដងក្នុងរយៈពេលប៉ុន្មានខែចុងក្រោយនេះ។

យោងតាមការចេញផ្សាយដោយទូរទស្សន៍ CNN បានឲ្យដឹងទៀតដែរថា មន្ត្រីយោធាអាមេរិកជឿជាក់លើរបាយការណ៍ដែលផ្កាយរណបរបស់ប្រទេសរុស្ស៊ីថា ពិតជាបានធ្វើសមយុទ្ធទាំងបែបការពារ និងប្រយុទ្ធផង attack and defend tactics ដែលវាជាសកម្មភាពក្នុងគោលដៅដើម្បីអាចបង្កើនកម្លាំងនៅក្នុងជួរទ័ពទីអវកាសរបស់ខ្លួន។

មន្ត្រីដដែលនោះបានរៀបរាប់ទៀតថា៖

«យើងបានមើលឃើញថា ផ្កាយរណបជាច្រើនរបស់រុស្ស៊ីបានធ្វើការហោះហើរព័ទ្ធជុំវិញផ្កាយរណបដែលនៅនឹងថ្កល់មួយគ្រឿងស្ថិតនៅរយៈកំពស់ទាបពីផែនដី។ យុទ្ធសាស្ត្រនេះអាចជារបៀបដែលកម្លាំងយោធារុស្ស៊ីអាចធ្វើការវាយប្រហារសត្រូវនៅក្នុងករណីជម្លោះគ្នាណាមួយនាពេលអនាគត»។

នៅក្នុងការរៀបរាប់នេះដែរ មន្ត្រីអាមេរិកក៏បានលើកឡើងផងដែរថា រុស្ស៊ី នៅតែចិញ្ចឹមចិត្តក្នុងការប្រើប្រាស់អាវុធនុយក្លេអ៊ែរនៅក្នុងបេសកកម្មនៅទីអវកាសនៅឡើយ។ ដូច្នេះ សមយុទ្ធថ្មីៗនេះអាចអនុញ្ញាតឲ្យកម្លាំងទ័ពរុស្ស៊ីនឹងមានលទ្ធភាពក្នុងការត្រៀមរៀបចំបំពាក់អាវុធដ៏គ្រោះថ្នាក់នៅក្នុងទីអវកាសនៅពេលណាមួយជាមិនខាន។

គួររំលឹកថា កាលពីឆ្នាំកន្លងទៅ CNN ក៏ធ្លាប់បានស្រាវជ្រាវរកឃើញដែរអំពីកិច្ចខិតខំរបស់ប្រទេសរុស្ស៊ីក្នុងការអភិវឌ្ឍបច្ចេកវិទ្យាផ្កាយរណបដែលអាចបំពាក់អាវុធនុយក្លេអ៊ែរ។ ឧបករណ៍នេះ នឹងអាចប្រើប្រាស់ថាមពលជារលកសញ្ញាដ៏ខ្លាំងក្លាមួយក្នុងការវាយប្រហារទំលាក់ផ្កាយណបធម្មតា និងបូករួមទាំងផ្កាយរណបរបស់រដ្ឋាភិបាលនៃប្រទេសទាំងឡាយបានទៀតផង។

ប្រភពដដែលនេះក៏បានអះអាងដែរថា ប្រទេសចិន​បាន​ធ្វើ​សមយុទ្ធ​ហ្វឹកហ្វឺន​ស្រដៀង​គ្នា​នេះ​នៅ​ក្នុង​ទីអវកាស​កាលពី​ឆ្នាំ​មុន​ម្តងមកហើយ។ ដោយឡែកកាលពីខែធ្នូ ឆ្នាំ២០២៤ ទីក្រុងប៉េកាំងបានបង្ហាញសមត្ថភាពកម្រិតខ្ពស់ដោយធ្វើសមយុទ្ធផ្កាយរណបជាច្រើនក្នុងទម្រង់កៀកគ្នាដែលបង្កើនការព្រួយបារម្ភអំពីកម្មវិធីយោធាដែលមានសក្តានុពលនៃការបង្កជម្លោះនានានៅពេលខាងមុខ។

ផ្កាយរណប​ទាំងនោះត្រូវបានដាក់តម្រៀបគ្នាឲ្យស្ថិតនៅរួម​គន្លងតែមួយ ហើយ​អាច​វាយប្រហារ​ផ្កាយរណបផ្សេងទៀត ឬ​រារាំង​ដោយ​ផ្ទាល់បានយ៉ាងងាយ។ យ៉ាងណាក្តី នេះ​គ្រាន់តែ​ជា​បច្ចេកវិទ្យា​មួយ​ដែល​ទីក្រុង​ប៉េកាំង​កំពុង​អភិវឌ្ឍប៉ុណ្ណោះ។ ជាក់ស្តែង ចិនក៏កំពុងអភិវឌ្ឍមីស៊ីលប្រឆាំងផ្កាយរណប និងការវាយប្រហារដោយថាមពលផ្ទាល់ ដែលប្រើឡាស៊ែរ ឬប្រព័ន្ធស្រដៀងគ្នា ដើម្បីវាយប្រហារផ្កាយរណបផ្សេងទៀតដែរ៕