បរទេស៖​ យោងតាមប្រភពព័ត៌មានពី BBC បានរាយការណ៍ថា ក្រុមហ៊ុនហុងកុងបានយល់ព្រមលក់ភាគហ៊ុនកំពង់ផែសំខាន់ៗចំនួន ២ របស់ខ្លួនស្ទើតែទាំងអស់នៅលើព្រែកជីកប៉ាណាម៉ាទៅឱ្យក្រុមហ៊ុនអាម៉េរិក BlackRock។

ការទិញនេះបានកើតឡើងបន្ទាប់ពីប្រធានាធិបតីសហរដ្ឋអាម៉េរិក លោក Donald Trump បានត្អូញត្អែរថា ព្រែកជីកនេះស្ថិតនៅក្រោមការគ្រប់គ្រងរបស់ចិន ហើយសហរដ្ឋអាមេរិកគួរតែជាអ្នកគ្រប់គ្រងផ្លូវដឹកជញ្ជូនដ៏សំខាន់នេះវិញ។ កំពង់ផែទាំងពីរនេះត្រូវបានគ្រប់គ្រង់ដោយក្រុមហ៊ុន CK Hutchison Holding របស់កំពូលមហាសេដ្ឋីហុងកុង (Li Ka-shing)។ ក្រុមហ៊ុននេះមានដំណើរការកំពង់ផែនៅមហាសមុទ្រអាត្លង់ទិក និងប៉ាស៊ីហ្វិកដែលនៅចុងសងខាងព្រែកជីកប៉ាណាម៉ាតាមរយៈក្រុមហ៊ុនបុត្រសម្ព័ន្ធមួយ។ កាលពីថ្ងៃអង្គារ ក្រុមហ៊ុនហុងកុងមួយនេះលើកឡើងថា ខ្លួននឹងលក់ភាគហ៊ុនស្ទើតែទាំងអស់ទៅឲ្យក្រុមហ៊ុនវិនិយោគអាម៉េរិក BlackRock ក្នុងតម្លៃ ២២,៨ ពាន់លានដុល្លារ។ BlackRock គឺជាក្រុមហ៊ុនគ្រប់គ្រងទ្រព្យសកម្មដ៏ធំបំផុតមួយរបស់ពិភពលោក ហើយក្រុមហ៊ុននេះគ្រោងនឹងទិញយកកំពង់ផែចំនួន ៤៣ កន្លែងរបស់ ២៣ ប្រទេសផ្សេងទៀតផងដែរ។

យ៉ាងណាក៏ដោយ ទោះបីជាក្រុមហ៊ុន CK Hutchison ត្រូវបានបង្កើតឡើងដោយមហាសេដ្ឋីហុងកុង និងមិនមែនជាកម្មសិទ្ធិរបស់រដ្ឋាភិបាលចិនក៏ពិតមែន ប៉ុន្តែមូលដ្ឋានរបស់ក្រុមហ៊ុនគឺនៅទីក្រុងហុងកុងមានន័យថា វាដំណើរការនៅក្រោមច្បាប់ហិរញ្ញវត្ថុរបស់ចិន។ ក្រុមហ៊ុននេះបានដំណើរការកំពង់ផែតាំងពីឆ្នាំ១៩៩៧ ។

គួរឲ្យបញ្ជាក់ដែរថា ព្រែកជីកប៉ាណាម៉ា គឺជាព្រែកជីកសិប្បនិម្មិតនៅទ្វីបអាមេរិកកណ្ដាល​ដែលតភ្ជាប់មហាសមុទ្រប៉ាស៊ីហ្វិក និងមហាសមុទ្រអាត្លង់ទិក ដែលមានប្រវែង ៨២ គីឡូម៉ែត្រ។ ជារៀងរាល់ឆ្នាំ នាវារហូតដល់ ១៤​ ០០០ គ្រឿងបានធ្វើដំណើរឆ្លងកាត់ព្រែកជីកនេះរួមមាន កប៉ាល់កុងតឺន័រដែលផ្ទុករថយន្ត, កប៉ាល់ផ្ទុកឧស្ម័នធម្មជាតិ និងទំនិញ, និងនាវាយោធាជាដើម។ ព្រែកជីកប៉ាណាម៉ាត្រូវបានសាងសង់នៅដើមទសវត្សរ៍ឆ្នាំ១៩០០។ កាលពីដំបូង សហរដ្ឋអាមេរិកបានរក្សាអធិបតេយ្យភាពនៅតំបន់ព្រែកជីករហូតដល់ឆ្នាំ១៩៧៧ ដែលបានគ្រប់គ្រងរួមគ្នាជាមួយនឹងប៉ាណាម៉ា។ ក្រោយមក ប៉ាណាម៉ាបានគ្រប់គ្រងលើតំបន់នេះតែម្នាក់ឯងវិញនៅឆ្នាំ១៩៩៩ ។

ទោះជាយ៉ាងណាមិញ Donald Trump បានលើកអំណះអំណាង​ជាច្រើន​សម្រាប់​ការ​ដណ្តើម​គ្រប់គ្រង​ព្រែកជីក និង​តំបន់​ជុំវិញ​ឡើងវិញ។ ប្រធានាធិបតីរូបនេះបានអះអាងថា ឥទ្ធិពលរបស់ចិនគឺជាការគំរាមកំហែងសន្តិសុខជាតិ ដែលសហរដ្ឋអាមេរិកទៅវិញទេគួរតែជាអ្នកវិនិយោគលើការសាងសង់ព្រែកជីកនេះ ហើយកប៉ាល់អាមេរិកត្រូវចំណាយច្រើនសម្រាប់ការប្រើប្រាស់ផ្លូវទឹកមួយនេះ។

នៅក្នុងដំណើរទស្សនកិច្ចទៅកាន់ប្រទេសប៉ាណាម៉ាកាលពីខែកុម្ភៈ រដ្ឋមន្ត្រីការបរទេសអាម៉េរិក Marco Rubio បានទាមទារឱ្យប្រទេសនេះផ្លាស់ប្តូរជាបន្ទាន់ ដោយសារមើលឃើញពីឥទ្ធិពល និងការគ្រប់គ្រងរបស់ប្រទេសចិនលើព្រែកជីកនេះ។ យ៉ាងណាមិញ ប្រធានាធិបតីប៉ាណាម៉ា Jose Raul Mulino បានច្រានចោលការអះអាងរបស់រដ្ឋាភិបាលសហរដ្ឋអាម៉េរិក ដោយលើកឡើងថា ព្រែកជីកនឹងនៅបន្តក្នុងដៃរបស់ប្រទេសអាមេរិកកណ្តាល។ យ៉ាងណាមិញ ក្រុមហ៊ុន CK Hutchison អះអាងថា កិច្ចព្រមព្រៀងជាមួយនឹងក្រុមហ៊ុន BlackRock គឺមានលក្ខណៈពាណិជ្ជកម្មសុទ្ធសាធ ដែលមិនពាក់ព័ន្ធទាំងស្រុងទៅនឹងព័ត៌មាននយោបាយទាក់ទងនឹងកំពង់ផែប៉ាណាម៉ាទេ៕