ភ្នំពេញ៖ សមាគមសហគ្រិនវ័យក្មេងកម្ពុជា (YEAC) និងមូលនិធិអភិវឌ្ឍន៍ជំនាញ(SDF) បានសហការគ្នារៀបចំកម្មវិធីជំនួបសហគ្រិនវ័យក្មេងដើម្បីចែករំលែកអំពីគុណប្រយោជន៍នៃការអភិវឌ្ឍជំនាញ អភិវឌ្ឍខ្លួន និងស្ថាប័នជាប្រចាំសម្រាប់សហគ្រិន និងបុគ្គលិកក្នុងរោងចក្រ-សហគ្រាសគ្រប់កម្រិត ជាពិសេសធុរកិច្ចបង្កើតថ្មី (Startup) ក៏ដូចជាសហគ្រាសធុនតូច និងមធ្យម (SME) ដែលជាឆ្អឹងខ្នងសេដ្ឋកិច្ច និងជាប្រភពនៃការបង្កើតការងារនៅកម្ពុជា។

កម្មវិធីនារសៀលថ្ងៃទី៦ ខែមីនា នៅសណ្ឋាគារ អូឡាំព្យាស៊ីធី រាជធានីភ្នំពេញនេះក៏ជាវេទិកាផ្តល់ឱកាសក្នុងការចែករំលែកបទពិសោធន៍ បញ្ហាប្រឈម និងដំណោះស្រាយផ្សេងៗព្រមទាំងការផ្សាភ្ជាប់បណ្តាញអាជីវកម្មផងដែរ។ ម្ចាស់អាជីវកម្មក៏បានទទួលព័ត៌មានថ្មីៗទាក់​ទ​ង​​​នឹងកម្មវិធីគាំទ្រផ្សេងៗពាក់ព័ន្ធក្នុងប្រព័ន្ធអេកូជំនាញ និងសហគ្រិនភាពទាំងក្នុង និងក្រៅប្រទេស។

លោកឧកញ៉ា ប៉ិច បូឡែន ប្រធានសមាគមសហគ្រិនវ័យក្មេងកម្ពុជា បានមានប្រសាសន៍ថា៖ កម្មវិធីជំនួបសហគ្រិនវ័យក្មេងនេះជាលើកទី១សម្រាប់ឆ្នាំ២០២៥(1st Young Entrepreneurs Gathering 2025)។កន្លងមកកម្មវិធីដូច្នេះបានរៀបចំច្រើនដងមកហើយ ដោយក្នុងមួយឆ្នាំចាប់ពី ៤ ទៅ ៥ ដង។ ជំនួបនេះមានគោលបំណងជម្រាបដល់សមាជិកឱ្យបានដឹងអំពីមូលនិធិអភិវឌ្ឍន៍ជំនាញ(SDF)ដែលជាសេនាធិការរបស់រាជរដ្ឋាភិបាលដើម្បីជួយដល់ការកសាងសមត្ថភាព និងជំនាញ។

នៅក្នុងជំនួបសហគ្រិនវ័យក្មេងនេះ ក៏មានកិច្ចពិគ្រោះយោបល់ពីតម្រូវការរបស់សមាជិកសមាគមសហគ្រិនវ័យក្មេង និងវេទិកាពិគ្រោះយោបល់ជាមួយដៃគូពាក់ព័ន្ធ ដែលមានសមាគម និងស្ថាប័នជាដៃគូចូលរួមដើម្បីពិភាក្សាពីវឌ្ឍនភាពរបស់ YEAC និងកិច្ចសហសហការនានា ជាពិសេសកម្មវិធីជំនួបសហគ្រិនវ័យក្មេងនេះនឹងជួបពិភាក្សាជាមួយអ្នកជំនាញអភិវឌ្ឍសមត្ថភាពសហគ្រាស សិក្សាស្វែងយល់ និងចាប់យកឱកាសពង្រឹងធនធានមនុស្សក្នុងក្រុមហ៊ុន ជួបជជែកផ្លាស់ប្ដូរយោ​បល់ជាមួយសហគ្រិនមកពីគ្រប់វិស័យ កសាងបណ្ដាញដៃគូអាជីវកម្ម និងពង្រីកកិច្ចសហការ និងផ្សព្វផ្សាយម៉ាកយីហោផលិតផល/សេវាម្មរបស់ក្រុមហ៊ុន។

លោក គី សុខគីម នាយកប្រតិបត្តិមូលនិធិអភិវឌ្ឍជំនាញបានលើកឡើងថា SDF អាចជួយ Startup និង SME លើ ៣ រូបភាព ៖១.​ សម្របសម្រួល និងគាំទ្រកម្មវិធីបណ្តុះបណ្តាលជំនាញតាមតម្រូវការជាក់ស្តែង (co-design and co-invest in skills development programs or coaching programs) សម្រាប់និយោជក និងនិយោជិតនៃ Startup និង SME ដែលរួមមាន upskilling, reskilling និង pre-employ​me​nt លើកកម្ពស់នវានុវត្តន៍ និងផលិតភាព,២. SDF មិនត្រឹមតែផ្តល់ថវិកាគាំទ្រលើការបណ្តុះបណ្តាលជំនាញតែមួយមុខទេ,Startup និង SME ក៏នឹងទទួលបានឱកាសបង្កើតបណ្តាញទំនាក់ទំនងការសហការជាមួយដៃគូក្នុងស្រុក និងអន្តរជាតិរបស់ SDF និងទី៣. SDF អាចជួយផ្សារភ្ជាប់ Startup និង SME ដើម្បីទទួលបានការគាំទ្រផ្នែកគោលនយោបាយរបស់រាជរដ្ឋាភិបាល ដូចជាការលើកទឹកចិត្តផ្នែកពន្ធ និងហិរញ្ញប្បទានសម្បទានរបស់រាជរដ្ឋាភិបាលជាដើម។

បន្ថែមពីនេះ សមាគមសហគ្រិនវ័យក្មេងកម្ពុជា (YEAC) បានធ្វើការស្ទង់មតិជាមួយអ្នកចូលរួមជាង ១៣០ ក្រុមហ៊ុន ដែលមានសក្តានុពល ដើម្បីកំណត់ពីតម្រូវការជំនាញ ទាំងជំនាញបច្ចេកទេស និងជំនាញទន់ ដើម្បីរៀបចំកម្មវិធីបណ្តុះបណ្តាលជំនាញ និងលើកកម្ពស់សមត្ថភាពនិងភាពប្រកួតប្រជែង។

លោកនាយកប្រតិបត្តិបានគូសបញ្ជាក់ផងដែរថា៖ គិតត្រឹមពេលនេះ SDF បានគាំទ្រការបណ្តុះបណ្តាលពង្រឹងសមត្ថភាពបុគ្គលិក, ថ្នាក់ដឹកនាំ និងម្ចាស់ Startup និង SME សរុបប្រមាណ ១៧ ៩១៩ នាក់ ដែលក្នុងនោះ YEAC បានទទួលការគាំទ្រ និងថវិកាបដិភាគពី SDF ដើម្បីរៀបចំ និងអនុវត្តកម្មវិធីបង្កើនជំនាញដល់សហគ្រិន និងបុគ្គលិក ៧២៥ នាក់ (ស្ត្រី ៣៦%) លើជំនាញការកសាងគំរូអាជីវកម្ម (Building Business Model), ផែនការនិងប្រព័ណ្ធអាជីវកម្ម(Business Plan and Business system), Performance Management,ទីផ្សារឌីជីថល( Digital Marketing), ផែនការបង្កើតថវិកានិងរបាយការហិរញ្ញវត្ថុ(Develop Budget Plan and Financial Report),សុវត្ថិភាពចំណីអាហារនិងអនាម័យផ្ទាល់ខ្លួន( Food Safety & Personal Hygiene), បដិសណ្ឋារកិច្ច(Hospitality) និងជំនាញទន់ជាដើម។

លោកនាយកប្រតិបត្តិ SDF ក៏បានលើកទឹកចិត្តដល់ថ្នាក់ដឹកនាំ និងម្ចាស់អាជីវកម្មទាំងអស់ឱ្យបន្តបង្កើនចំណេះ និងជំនាញដល់ខ្លួនឯង និងបុគ្គលិកជាប្រចាំ និងក្នុងទ្រង់ទ្រាយកាន់តែធំ ដើម្បីប្រែក្លាយគំនិតច្នៃប្រឌិតក្នុងអាជីវកម្មរបស់ខ្លួន ទៅជាដំណោះស្រាយ ប្រកបដោយប្រសិទ្ធភាពក្នុងការដោះស្រាយបញ្ហាជាក់ស្តែងក្នុងទីផ្សារ ក្នុងគោលដៅចុងក្រោយបង្កើននវានុវត្តន៍, ផលិតភាព និងភាពប្រកួតប្រជែងនៃអាជិវកម្ម និងប្រជាពលរដ្ឋកម្ពុជា។ “ជំនាញខ្ពស់ ចំណូលខ្ពស់! ចូលរួមប្រែក្លាយកម្ពុជាជាប្រទេសចំណូលខ្ពស់ឆ្នាំ២០៥០។”

គួរឱ្យដឹងផងដែរថា នៅក្នុងកម្មវិធីជំនួបសហគ្រិនវ័យក្មេងនេះ សមាគមសហគ្រិនវ័យក្មេងកម្ពុជានិងសមាគមមិត្តយើង បានចុះហត្ថលេខាលើអនុស្សរណៈយោគយល់គ្នាលើការបង្កើតក្របខណ្ឌនៃកិច្ចសហការភាពជាដៃគូដើម្បីផ្តល់ជំនាញ បណ្តុះបណ្តាលធនធានមនុស្ស និង កសាងសមត្ថភាព៕