សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងថា ការអភិវឌ្ឍជំនាញ និងការវិនិយោគលើបច្ចេកវិទ្យាជាគន្លឹះក្នុងការប្រើប្រាស់សក្តានុពលមូលធនមនុស្សរបស់កម្ពុជា។ ការលើកឡើងបែបនេះ ត្រូវបានថ្លែងក្នុងចូលរួមជាវាគ្មិនក្នុងកិច្ចពិភាក្សានៃកិច្ចប្រជុំកំពូលធុរកិច្ចកម្ពុជា-អាស៊ាន ដោយបានលើកឡើងពីភាពចាំបាច់នៃការវិនិយោគលើជំនាញ និងបច្ចេកវិទ្យា ដើម្បីប្រើប្រាស់សក្តានុពលមូលធនមនុស្សនិងជំរុញកំណើនសេដ្ឋកិច្ចកម្ពុជា។
នៅក្នុងកិច្ចពិភាក្សាក្រោមប្រធានបទ៖ “មូលធនមនុស្ស៖ គន្លឹះនៃការអភិវឌ្ឍពាណិជ្ជកម្ម និងហេដ្ឋារចនាសម្ព័ន្ធ” ការអភិវឌ្ឍជំនាញ និងការវិនិយោគលើបច្ចេកវិទ្យាជាគន្លឹះក្នុងការប្រើប្រាស់សក្តានុពលមូលធនមនុស្សរបស់កម្ពុជា ឯកឧត្តម ហែម វណ្ឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានគូសបញ្ជាក់ពីតួនាទីនៃបច្ចេកវិទ្យា ដូចជាបញ្ញាសប្បនិម្មិត (AI) ការធ្វើស្វ័យប្រវត្តិកម្មក្នុងខ្សែច្រវាក់ផលិតកម្ម បច្ចេកវិទ្យារ៉ូបូត និងការអប់រំ STEM ក្នុងការរៀបចំកម្លាំងពលកម្មរបស់កម្ពុជាសម្រាប់ឧស្សាហកម្មថ្មីៗ។
ឯកឧត្តមរដ្ឋមន្ត្រីបានលើកឡើងថា៖
«កម្ពុជាមានប្រជាជនវ័យក្មេង ស្វាហាប់ និងចូលចិត្តប្រើប្រាស់បច្ចេកវិទ្យា។ ភាគលាភប្រជាសាស្រ្តនេះគឺជាធនធានសំខាន់របស់កម្ពុជានាពេលបច្ចុប្បន្ន ប៉ុន្តែធនធាននេះមិននៅស្ថិតស្ថេររហូតទេ។ នេះជាពេលវេលាដ៏ល្អប្រសើរសម្រាប់យើងក្នុងការប្រើប្រាស់ភាគលាភប្រជាសាស្រ្តឱ្យបានជាអតិបរមាសម្រាប់ការអភិវឌ្ឍសង្គម-សេដ្ឋកិច្ច»។
កិច្ចពិភាក្សាដែលមានវាគ្មិនសំខាន់ៗ រួមទាំង ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ តំណាងវិស័យឯកជន និងការិយាល័យពាណិជ្ជកម្មនៃតំបន់អាស៊ាន បានពិភាក្សាពីភាពចាំបាច់នៃការកាត់បន្ថយភាពមិនស៊ីគ្នានៃជំនាញក្នុងការឆ្លើយតបទៅនឹងតម្រូវការទីផ្សារ (Skill Mismatch) និងការបន្ស៊ីការអប់រំបណ្តុះបណ្តាលជាមួយនឹងតម្រូវការជាក់ស្តែងក្នុងឧស្សាហកម្ម។
ឯកឧត្តម ហែម វណ្ណឌី បានសង្កត់ធ្ងន់លើការលើកកម្ពស់ផលិតភាព ការកែលម្អគោលនយោបាយដើម្បីគាំទ្របរិវត្តកម្មបច្ចេកវិទ្យា និងពង្រឹងការទទួលស្គាល់គ្នាទៅវិញទៅមកនៃបណ្តាប្រទេសសមាជិកអាស៊ាន ដើម្បីបង្កើនការចល័តកម្លាំងពលកម្មនៅក្នុងតំបន់។ សម្រាប់ចក្ខុវិស័យកម្ពុជា ឆ្នាំ២០៣០ និងឆ្នាំ២០៥០ ឯកឧត្តមបានគូសបញ្ជាក់ថា ការវិនិយោគលើមូលធនមនុស្ស និងបច្ចេកវិទ្យា នឹងជាស្នូលនៃអនាគតសេដ្ឋកិច្ចកម្ពុជា។
ឯកឧត្តមបានបន្ថែមថា ៖
«បច្ចេកវិទ្យាអាចជំនួសការងារមួយចំនួនរបស់មនុស្ស តែយើងមិនគួរខ្លាចវាទេ។ យើងត្រូវវិនិយោគលើបច្ចេកវិទ្យា, វិនិយោគលើមូលធនមនុស្សដើម្បីប្រើប្រាស់បច្ចេកវិទ្យា, និងធ្វើបច្ចុប្បន្នភាពកម្មវិធីសិក្សាពាក់ព័ន្ធនឹងបច្ចេកវិទ្យា ដើម្បីបង្កើនភាពប្រកួតប្រជែងរបស់កម្ពុជា»។
Account
Security
Favourite Content