ភ្នំពេញ ៖ ក្នុង​រយៈពេល​ប្រមាណ១ឆ្នាំចុងក្រោយនេះ ការទិញលក់លំនៅឋាន​ក្នុងរាជធានីភ្នំពេញ​មានភាពថមថយ​ជាងឆ្នាំ២០២០, ២០២១ និង​ឆ្នាំ ២០២២​ទៅទៀត ដោយសារតែវិបត្តិ​នៃសេដ្ឋកិច្ច​សកល​ ប៉ុន្តែ​ឆាប់ៗខាងមុខនេះ ទីផ្សា​រលំនៅឋាន​រំពឹងថា​នឹង​មានកំណើនឡើងវិញ​ ដោយសារ​ប្រជាពលរដ្ឋ​មាន​តម្រូវ​ការ​ទិញផ្ទះថ្មីៗកើនឡើង​ ។​

លោក មឿង រដ្ឋា នាយក​ប្រតិបត្តិ​បុរី​វិមាន​ភ្នំពេញ បានមានប្រសាសន៍ថា​ ការ​លក់​ផ្ទះ​ពីបុរីវិមានភ្នំពេញក្នុង​ឆ្នាំ​២០២៣​នេះ ឃើញថា​មានការ​ថមថយ​ជាង​ឆ្នាំ២០២០ – ២០២១ និងឆ្នាំ២០២២ទៅទៀត ដោយសារតែ​ស្ថាន​ភា​ព​សេដ្ឋកិច្ចសកល​ក្នុងឆ្នាំ២០២៣​នេះ ​​នៅតែ​​មិនទា​ន់​មា​ន​​ភា​ពប្រ​សើ​រ​​​ឡើង ​ដូច្នេះ​ប្រជាពលរដ្ឋ​ដែលមានតម្រូវការ​ទិញផ្ទះ​បាន​ផ្អាកសិន​ ដោយរង់ចាំមើល​ពីស្ថានភាព​សេដ្ឋ​កិច្ច​ល្អប្រសើរឡើងវិញ ។​

លោកបន្តថា ប្រជាពលរដ្ឋ​ដែលស្វែងរកទិញផ្ទះ​ក្នុ​ងបច្ចុប្បន្នមានភាពឆ្លាតវៃជាងមុនឆ្ងាយណាស់ ដោយ​ពួក​គេ​សួរនាំព័ត៌មានល្អិតល្អន់​គ្រប់ជ្រុងជ្រោយ​មុននឹង​សម្រេច​ចិត្ត​កក់​លុយ​ទិញផ្ទះ  ពីព្រោះ តែមួយរយៈ​មុននេះ​​មានព័ត៌មានជាច្រើន​មិនល្អជុំវិញអ្នកអភិវឌ្ឍន៍លំនៅឋាន​មួយចំនួ​ន​លើ​ភាពមិនប្រក្រតី​ ដូចជា​បង់លុយផ្ដាច់​ហើយមិនទទួលបានផ្ទះ ផ្ទះមិនមានប្លង់​រឹងស្រប​ច្បាប់ត្រឹមត្រូវ​ជាដើម ។​

លោក​បន្ថែមថា ​សម្រាប់បុរីរបស់លោក​​ក្នុងឆ្នាំ២០២៣​នេះ​ មិនទាន់មានគម្រោងអភិវឌ្ឍន៍បន្តទេ ប៉ុន្តែ​​នៅ​ពេ​ល​ឆាប់ៗ​ឬអាច​ថា​ក្នុងឆ្នាំ២០២​៤​ខាងមុខ ក្រុមហ៊ុន​នឹង​ចាប់ផ្ដើមអភិវឌ្ឍន៍​គម្រោង​ថ្មីៗដើម្បីផ្គត់ផ្គង់​លំ​នៅ​ឋាន​ជូនអតិថិជន ដែលមានតម្រូវការ​នៅពេលខាងមុខ ។​

លោក​ រដ្ឋា​ បានបញ្ជាក់ថា បច្ចុប្បន្ន​នេះ ប្រជាពលរដ្ឋ​ទិញលំនៅឋាន​ដោយបង់រំលស់ជាមួយបុរី​ ឬធនាគារ​មានច្រើនជាង​ប្រជាពលរដ្ឋទិញដោយយកលុយ​ទាំងដុលមកទិញ ទោះបីជា​ពួកគាត់មានលុយទាំង​ដុល​មកតិញក៏ដោយ ព្រោះថា​ពួកគាត់ទិញដោយរំលស់​ជាមួយបុរី ឬជាមួយធនាគារ អាច​ធ្វើឱ្យ​ពួកគាត់សល់​លុយ​មួយចំនួនសម្រាប់​រកស៊ី ឬអាជីវកម្ម ។

លោក ថាន់ ចាន់ណា អ្នកអភិវឌ្ឍន៍លំនៅឋានមួយកន្លែង​នៅប៉ែក​ខាង​កើតរាជធានីភ្នំពេញ បានបញ្ជាក់ថា នៅពេលអនាគតខាងមុខ​ឆាប់ៗនេះ ទីផ្សា​រលំនៅឋាន​នៅភ្នំពេញនឹង​មានការកើនឡើង​ខ្ពស់​ ដូច្នេះអ្នកអភិវឌ្ឍន៍លំនៅឋានមួយចំនួននៅតែ​បន្តអភិវឌ្ឍន៍​គម្រោង​របស់ខ្លួន​ដើម្បីផ្គត់ផ្គង់ជូន​អតិថិជន​នៅពេលខាងមុខ ពោល​គឺនៅពេល​ដែល​ស្ថានភាពសេដ្ឋកិច្ច​មានភាពប្រសើរឡើងវិញ ។​

យ៉ាងណាក៏ដោយ បើទោះបីជា​ក្នុងឆ្នាំ២០២៣​នេះ ការទិញលក់​លំនៅឋា​ន​នៅក្នុ​ងរាជធានីភ្នំពេញមានការថមថយ​ជាងមុន ប៉ុន្តែ​អ្នកអភិវឌ្ឍន៍មួយចំនួន​នៅតែបន្តអភិវឌ្ឍន៍​គម្រោ​ង​របស់ខ្លួន​ជា​បន្តបន្ទាប់ ដែលធ្វើ​ឱ្យគម្រោងលំនៅឋាន​ក្នុងប្រទេស​កម្ពុជា​គិតត្រឹម​ខែកក្កដា ឆ្នាំ២០២៣​ មានចំនួន​ ១៨ ៤៤០​ គម្រោង មានក្រឡាផ្ទៃសរុប​ជាង​ ៣៨,៨២ ​លាន​ម៉ែត្រក្រឡា គិតជា​ទឹកប្រាក់​វិនិយោគ​មាន​រហូតដល់ ១៥,៤៤ពាន់លានដុល្លារ​អាមេរិក ៕