សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងគោលបំណងជំរុញឱ្យការប្រើប្រាស់សេវាសាធារណៈតាមអនឡាញឱ្យកាន់តែច្រើន និងទូលំទូលាយ ក្រសួងរៀបចំដែនដី នគរូបនីយកម្ម និងសំណង់ បានរៀបចំសិក្ខាសាលាផ្សព្វផ្សាយមួយដល់បណ្ដាធនាគារ និងអង្គភាពស្ថាប័នពាក់ព័ន្ធបន្ថែមទៀត ។ សិក្ខាសាលានេះ បានធ្វើឡើងនៅទីស្ដីការក្រសួងរៀបចំដែនដី នគរូបនីយកម្ម និងសំណង់ នាព្រឹកថ្ងៃទី ១៥ ខែមករា ឆ្នាំ២០២៥ ។
នៅក្នុងសិក្ខាសាលានេះដែរ ឯកឧត្តម សាយ សំអាល់ ឧបនាយកនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានមានប្រសាសន៍ថា បេសកកម្មរបស់ក្រសួងរៀបចំដែនដី នគរូបនីយកម្ម និងសំណង់ គឺនឹងបញ្ចប់បញ្ហា និងវិវាទ ដែលកើតមាននៅក្នុងសង្គមជាតិរបស់យើង ដោយក្រសួងនឹងបញ្ចប់ការចុះបញ្ជីដីទាំងស្រុងនៅក្នុងឆ្នាំ២០២៥នេះ ខណៈដែលក្នុងរយៈពេល១ឆ្នាំកន្លះកន្លងទៅនេះ ក្រសួងបានចុះបញ្ជីដីធ្លីចំនួន ៣លាន ៧សែនក្បាលដី ។ ដូច្នេះ សម្រាប់ក្បាលដីដែលមិនទាន់បានចុះបញ្ជី នឹងអាចបញ្ចប់នៅក្នុងអំឡុងខែមេសា ឆ្នាំ២០២៥ ខាងមុខនេះ ។
ឯកឧត្តមបានបញ្ជាក់ថា ៖
«បញ្ហាវិវាទដីធ្លី ក្រសួងរៀបចំដែនដី នគរូបនីយកម្ម និងសំណង់ បានដោះស្រាយជាបន្តបន្ទាប់ តាំងពីវិវាទរាប់ម៉ឺនករណី មកនៅត្រឹមខ្ទង់ពាន់ករណី ហើយក៏បន្តដោះស្រាយជាបន្តបន្ទាប់ទៀត ដើម្បីបញ្ចប់ទាំងស្រុង ដោយព្យាយាមដោះឱ្យនៅតិចបំផុត ។ សម្រាប់ការដាក់ដំណើរការសេវាសាធារណៈអនឡានរបស់ក្រសួងដែនដីនៅពេលនេះ នឹងធ្វើឱ្យប្រជាពលរដ្ឋ និងអ្នកដែលត្រូវការប្រើប្រាស់សេវា អាចប្រើប្រាស់សេវាសាធារណអនឡាញរបស់ក្រសួងពេលណាក៏បាន ឬយើងអាចហៅម្យ៉ាងទៀតបានថា សេវាគាប់ចិត្ត ដែលសេវានេះ អាចប្រើប្រាស់បានកាន់តែងាយស្រួល និងនៅគ្រប់ទីកន្លែង»។
នៅក្នុងឱកាសនោះដែរ លោកជំទាវ សេង សុមេត្តា រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បានមានប្រសាសន៍ថា ការដាក់ឱ្យប្រើសេវាអនឡាញរបស់ក្រសួងរៀបចំដែនដី នគរូបនីយកម្ម និងសំណង់ នឹងផ្ដល់ភាពងាយស្រួលដល់អ្នកប្រើប្រាស់ដោយផ្ទាល់ និងប្រយោល ហើយដើម្បីឱ្យអ្នកប្រើប្រាស់កាន់តែមានភាពងាយស្រួល ក៏ដូចជាស្វែងយល់ពីអត្ថប្រយោជន៍បន្ថែម ក្រសួងបានរៀបចំសិក្ខាសាលានៅពេលនេះដល់អ្នកពាក់ព័ន្ធទាំងអស់ ដូចជាមកពីបណ្ដាធនាគារ មន្ទីរ និងអង្គភាពពាក់ព័ន្ធនានាមួយចំនួនទៀត។
នៅក្នុងសិក្ខាសាលានេះដែរ ក៏មានការពន្យល់បង្ហាញបន្ថែមពីអ្នកជំនាញរបស់ក្រសួងរៀបចំដែនដី នគរូបនីយកម្ម និងសំណង់ ជុំវិញអត្តប្រយោជន៍នៃការប្រើប្រាស់សេវាសាធារណអនឡាញ ដោយក្នុងនោះ មានអ្នកជំនាញមកពីមន្ទីររៀបចំដែនដី នគរូបនីយកម្ម និងសំណង់ និងសុរិយោដី រាជធានីភ្នំពេញ នាយកដ្ឋានបច្ចេកវិទ្យាព័ត៌មានសុរិយោដី និងពីប្រធានក្រុមការងារបរិវត្តកម្មឌីជីថល ជាដើម ៕
Account
Security
Favourite Content