សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ មូលនិធិអភិវឌ្ឍន៍ជំនាញ ហៅកាត់ថា SDF គឺជាស្ថាប័នរាជរដ្ឋាភិបាលមួយដែលបង្កើតឡើងសម្រាប់ចូលរួមជួយប្រជាពលរដ្ឋ ជាពិសេស បុគ្គលិកក្រុមហ៊ុន ឱ្យទទួលបានឱកាសបណ្ដុះបណ្ដាលជំនាញដើម្បីពង្រឹងសមត្ថភាពរបស់ពួកគេឱ្យកាន់តែប្រសើរ។ កាលណាបុគ្គលិកមានសមត្ថភាពច្បាស់លាស់ ពួកគេក៏អាចទទួលបានការងារសមស្រប ជាពិសេសទទួលបានចំណូលសមរម្យសម្រាប់ទ្រទ្រង់ជីវភាព។ នេះបើតាមការលើកឡើងរបស់លោក គី សុខគីម នាយកប្រតិបត្តនៃមូលនិធិអភិវឌ្ឍន៍ជំនាញ។
លោក គី សុខគីម បានបន្តឱ្យដឹងទៀតថា នៅក្នុងរូបភាពជារួម គោលដៅសំខាន់របស់ស្ថាប័នគឺចង់ឱ្យពលរដ្ឋមានជំនាញច្បាស់លាស់ ហើយត្រូវជាមួយនឹងទីផ្សារការងារជាក់ស្ដែង ទាំងគុណភាព សុវត្ថិភាពនិងបរិមាណ។
លោកបានបន្តគូសបញ្ជាក់ថា៖
«យើងវិនិយោគរួមគ្នា អភិវឌ្ឍន៍កម្មវិធីរួមគ្នា ដោយមានពាក្យស្លោកមួយថា បង្កើនជំនាញថ្ងៃនេះដើម្បីប្រកួតប្រជែងថ្ងៃស្អែក ក្នុងគោលដៅបន្តអភិវឌ្ឍន៍សមត្ថភាព ក៏ដូចជាជំនាញរបស់យើង ឱ្យត្រូវតាមតម្រូវការទីផ្សារប្រកួតប្រជែងកម្រិតបុគ្គល និងស្ថាប័ន»។
យ៉ាងណាមិញ នៅក្នុងការសម្រេចគោលដៅនេះ SDF បានសហការជាមួយក្រសួងស្ថាប័នពាក់ព័ន្ធ ក៏ដូចជាវិស័យឯកជន ដោយធ្វើការផ្ទាល់ជាមួយនឹងសមាគមធុរកិច្ច ដើម្បីឱ្យដឹងពីតម្រូវការការងារដែលពួកគេកំពុងតែស្វែងរក ហើយ SDF ផ្ដល់ព័ត៌មាននោះទៅដល់ក្រសួងស្ថាប័នពាក់ព័ន្ធ ជាពិសេសក្រសួងការងារ ដែលមានទិន្នន័យបងប្អូនដែលត្រឡប់មកពីប្រទេសជិតខាង។ ជារួមមក គឺ SDF ដើរតួនាទីជាអ្នកផ្គូផ្គង រវាងអ្នករកការងារធ្វើ ទៅនឹងការងារដែលមានស្រាប់នៅក្នុងទីផ្សារ។
លោក គី សុខគីម បានបន្តគូសបញ្ជាក់ផងដែរថា ៖
«កន្លងមករាជរដ្ឋាភិបាល តាមរយៈក្រសួងពាក់ព័ន្ធបានបណ្ដុះបណ្ដាលយុវជនមុននឹងពួកគាត់ចូលបម្រើការងារ តែមូលនិធិយើងបង្កើតឡើងដើម្បីជួយទៅដល់អ្នកដែលមានការងារធ្វើស្រាប់ ហើយចង់បង្កើននូវសមត្ថភាពរបស់ខ្លួន ដែលហៅថា Upskilling ឬក៏ Reskilling ដែលផ្លាស់ប្ដូរជំនាញរបស់ពួកគេ ទៅរៀនជំនាញអ្វីថ្មីមួយ ដើម្បីចាប់ការងារថ្មី»។
លោកបញ្ជាក់ថា នេះជាផ្នែកមួយដើម្បីជួយបង្កើនទៅដល់ការរៀនសូត្រពេញមួយជីវិត និងបន្តអភិវឌ្ឍន៍ខ្លួនដើម្បីធានាថាជំនាញដែលទទួលបាននៅតែត្រូវជាមួយនឹងតម្រូវការទីផ្សារ ឡើងទាំងឋានៈ ក៏ដូចជាប្រាក់ខែរបស់បុគ្គលិកផងដែរ។ ម្យ៉ាងទៀត នៅក្នុងការបណ្ដុះបណ្ដាលនោះ មិនមែនមានត្រឹមតែការបណ្ដុះបណ្ដាលជំនាញបច្ចេកទេសប៉ុណ្ណោះទេ ប៉ុន្តែក៏មាននូវជំនាញទន់ផ្សេងៗទៀតដូចជា ការធ្វើការងារជាក្រុម ជំនាញគ្រប់គ្រង និងដឹកនាំជាដើម៕
Account
Security
Favourite Content