សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ យោងតាមរបាយការណ៍ធនាគារជាតិបានបង្ហាញថា នៅរយៈពេលពេញមួយឆ្នាំ២០២៤ កន្លងទៅនេះ លំហូរទុនវិនិយោគផ្ទាល់បរទេសមកកាន់កម្ពុជាមានទំហំ ៤,២ ប៊ីលានដុល្លារអាមេរិក កើន ៤,៩% ដោយសារការកើនឡើងនូវគម្រោងវិនិយោគមួយចំនួនលើវិស័យមិនមែនហិរញ្ញវត្ថុប្រមាណ ១៧,១% ខណៈការវិនិយោគលើវិស័យហិរញ្ញវត្ថុថយចុះ ៣៥,៥%។ ចំណែកវិនិយោគផ្សេងទៀត បានបង្ហាញពីការកើនឡើងទ្រព្យសកម្មបរទេសសុទ្ធ ៣,២ប៊ីលានដុល្លារអាមេរិក កើនឡើងប្រមាណជា ៩,៥% ធៀបនឹងឆ្នាំ២០២៣ ដែលបណ្តាលមកពីការកើនឡើងប្រាក់បញ្ញើ និងការវិនិយោគលើផលបត្រនៅក្រៅប្រទេស គួបផ្សំនឹងការកើនឡើងការទូទាត់បំណុលក្រៅប្រទេសនៃវិស័យហិរញ្ញវត្ថុ ស្របពេលដែលការខ្ចីសុទ្ធរបស់រាជរដ្ឋាភិបាលថយចុះ ១០,២%។
របាយការណ៍ដដែលបានបង្ហាញទៀតថា សមតុល្យគណនីហិរញ្ញវត្ថុ បង្ហាញពីការកើនទ្រព្យអកម្មបរទេសសុទ្ធ ៣៧១,៧លានដុល្លារអាមេរិកនៅឆ្នាំ២០២៤ ធៀបនឹងទ្រព្យសកម្មបរទេសសុទ្ធ ៦១៨,៦ លានដុល្លារអាមេរិក ក្នុងឆ្នាំ២០២៣ ដែលគាំទ្រដោយលំហូរចូលវិនិយោគផ្ទាល់បរទេស ខណៈទ្រព្យសកម្មបរទេសសុទ្ធដែលវិនិយោគផ្នែកផ្សេងទៀត និងវិនិយោគលើផលបត្រមានការកើនឡើង។
ដោយឡែក ទុនបម្រុងអន្តរជាតិ បន្តរក្សាបាននៅកម្រិតខ្ពស់ ដែលឆ្លុះបញ្ចាំងពីភាពរឹងមាំនៃលទ្ធភាពសងបំណុលក្រៅប្រទេស ការរក្សាស្ថិរភាពអត្រាប្តូរប្រាក់ និងប្រព័ន្ធទូទាត់ជាតិ ព្រមទាំងផ្តល់ការការពារគ្រប់គ្រាន់សម្រាប់បំពេញតម្រូវការសន្ទនីយភាពទប់ទល់នឹងវិបត្តិខាងក្រៅ។ ជាក់ស្តែងទុនបម្រុងអន្តរជាតិនៅឆ្នាំ២០២៤ បានកើនដល់ ២២,៥ ប៊ីលាន ដុល្លារអាមេរិក ស្មើនឹង ១២,៦% ធៀបនឹងឆ្នាំ២០២៣ មានចំនួន២០ ប៊ីលានដុល្លារអាមេរិក ដែល ស្មើនឹង ៧ខែនៃការនាំចូលទំនិញ និងសេវាគ្រាបន្ទាប់ដែលជាកម្រិតខ្ពស់សម្រាប់ប្រទេសកំពុងអភិវឌ្ឍន៍។
ការកើនឡើងនេះ ជាចម្បងបណ្តាលមកពីការកើនឡើងមកពី ១.តម្លៃមាស ២.ការប្រែប្រួលអត្រាប្តូរប្រាក់ ៣.ចំណូលពីការវិនិយោគក្រៅប្រទេស (ការកើនឡើងនៃអត្រាចំណូល និងការធ្វើពិពិធកម្មទ្រព្យសកម្ម) និង ៤.ប្រាក់បម្រុងកាតព្វកិច្ច។ រចនាសម្ព័ន្ធគ្រប់គ្រងទុនបម្រុងអន្តរជាតិ ត្រូវបានរៀបចំឡើងស្របតាមឧត្តមានុវត្តន៍អន្តរជាតិ ដើម្បីធានាការគ្រប់គ្រងប្រកបដោយប្រសិទ្ធភាព និងប្រុងប្រយ័ត្នខ្ពស់សំដៅទទួលបានសុវត្ថិភាព សន្ទនីយភាព និងចំណូលសមស្រប។ ក្រុមប្រឹក្សាភិបាលអនុម័តលើគោលនយោបាយវិនិយោគ ដែលជាក្របខ័ណ្ឌរួម សម្រាប់កំណត់ទិសដៅយុទ្ធសាស្ត្រនៃការគ្រប់គ្រងទុនបម្រុង។ គណៈកម្មការ វិនិយោគ អនុម័តលើសេចក្តីណែនាំការវិនិយោគ ដែលមានចែងលម្អិតអំពីលក្ខខណ្ឌនៃការវិនិយោគ ដោយផ្អែកលើគោលនយោបាយវិនិយោគ៕ វិន ឈុនហ៊ាត
Account
Security
Favourite Content