សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ កម្ពុជាមើលឃើញឧស្សាហកម្មភាពយន្តជាច្រកដ៏មានសក្ដានុពលសម្រាប់ផ្សព្វផ្សាយវិស័យទេសចរណ៍ទៅកាន់ពិភពលោក ស្របពេលក្រសួងទេសចរណ៍ជំរុញឱ្យផលិតករភាពយន្តចូលរួមទាក់ទាញផលិតកម្មភាពយន្តអន្តរជាតិ ជាពិសេសផលិតកម្មខ្នាតធំ និងហូលីវូដ ឱ្យមកថតនៅកម្ពុជា។
ក្នុងជំនួបជាមួយលោក ឆាយ បូរ៉ា ប្រធានសមាគមភាពយន្តកម្ពុជា កាលពីចុងសប្ដាហ៍កន្លងទៅ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានលើកឡើងថា ការទាក់ទាញផលិតកម្មភាពយន្តធំៗ និងល្បីៗអន្តរជាតិ ឱ្យមកថតខ្សែភាពយន្តនៅកម្ពុជា គឺជាការធ្វើទីផ្សារដ៏មានសក្ដានុពលសម្រាប់ផ្សព្វផ្សាយទេសចរណ៍ និងអាចជួយទាក់ទាញភ្ញៀវទេសចរបរទេសឱ្យមកកម្ពុជាកាន់តែច្រើន។
ឯកឧត្តម រដ្ឋមន្ត្រី បានបញ្ជាក់ថា នៅពេលផលិតកម្មធំៗមកថតខ្សែភាពយន្តនៅតំបន់ទេសចរណ៍ល្បីៗរបស់កម្ពុជា ហើយខ្សែភាពយន្តទាំងនោះត្រូវបានចាក់បញ្ចាំងនៅតាមរោងភាពយន្តជុំវិញពិភពលោក អ្នកទស្សនានឹងបានឃើញតំបន់ និងទស្សនីយភាពល្បីៗរបស់កម្ពុជា។ ការមើលឃើញទេសភាពទាំងនោះអាចជំរុញឱ្យអ្នកទស្សនាមួយចំនួនមានចំណាប់អារម្មណ៍ចង់មកស្គាល់ និងទស្សនាដោយផ្ទាល់។
ឯកឧត្តម ហួត ហាក់ បានឱ្យដឹងថា ដើម្បីទាក់ទាញផលិតកម្មលំដាប់អន្តរជាតិឱ្យមកផ្ដិតយកទេសភាពតំបន់ទេសចរណ៍ល្បីៗ ដូចជាតំបន់អង្គរ និងតំបន់មួយចំនួនទៀត ក្រសួងទេសចរណ៍បានសម្របសម្រួលផ្ដល់ការស្នាក់នៅ និងហូបចុកដោយឥតគិតថ្លៃដល់ក្រុមការងាររបស់ផលិតកម្មហូលីវូដ ព្រមទាំងជួយស្វែងរកទីតាំងសម្រាប់ការថតភាពយន្តផងដែរ។
ឯកឧត្តម បានបន្ថែមថា កម្ពុជានៅមានកញ្ចប់ថវិកាតិចតួចសម្រាប់ការផ្សព្វផ្សាយ និងធ្វើទីផ្សារពីសក្ដានុពលទេសចរណ៍ បើប្រៀបធៀបនឹងប្រទេសជិតខាងដែលមានកញ្ចប់ថវិកាធំជាង។ ដូច្នេះ កម្ពុជាតែងស្វែងរកគ្រប់មធ្យោបាយដើម្បីផ្សព្វផ្សាយវិស័យទេសចរណ៍ និងស្វាគមន៍អ្នកផលិតមាតិកាល្បីៗលំដាប់ពិភពលោក តារាហូលីវូដ តារាបាល់ទាត់ពិភពលោក និងជាពិសេសផលិតកម្មហូលីវូដដែលមានបំណងមកថតភាពយន្តនៅកម្ពុជា។
ជាមួយគ្នានេះ លោក ឆាយ បូរ៉ា ប្រធានសមាគមភាពយន្តកម្ពុជា បានមានប្រសាសន៍ថា សមាគមបានចូលរួមចំណែកក្នុងការផ្សព្វផ្សាយសក្ដានុពលទេសចរណ៍កម្ពុជា តាមរយៈការផលិតវីដេអូឯកសារអំពីតំបន់ទេសចរណ៍ល្បីៗនៅក្នុងប្រទេស។ ទោះជាយ៉ាងណា លោកបានបញ្ជាក់ថា សមាគមមិនមានថវិកាគ្រប់គ្រាន់សម្រាប់ផលិតវីដេអូឱ្យបានច្រើននោះទេ ហើយបានស្នើសុំការគាំទ្រពីក្រសួងទេសចរណ៍ និងរាជរដ្ឋាភិបាល ដើម្បីគាំទ្រដំណើរការផលិតវីដេអូផ្សេងៗ។
លោក ឆាយ បូរ៉ា ក៏បានលើកឡើងពីគំនិតបង្កើត «មហោស្រពភាពយន្តអន្តរជាតិអង្គរ» ជាមធ្យោបាយមួយសម្រាប់ទាក់ទាញភ្ញៀវទេសចរបរទេស និងផលិតកម្មភាពយន្តអន្តរជាតិមកកម្ពុជា។
លោកបានពន្យល់ថា តាមរយៈមហោស្រពនេះ កម្ពុជាអាចអញ្ជើញផលិតកម្មហូលីវូដធំៗមកចូលរួម ហើយការមកចូលរួមរបស់ពួកគេមិនត្រឹមតែមានផលិតករ ឬអ្នកដឹកនាំរឿងប៉ុណ្ណោះទេ ប៉ុន្តែអាចនាំមកជាមួយនូវតារាហូលីវូដល្បីៗផងដែរ។
លោកបានលើកឡើងថា នៅពេលតារាហូលីវូដមកចូលរួមក្នុងព្រឹត្តិការណ៍នេះ កម្ពុជាអាចរៀបចំដំណើរទស្សនកិច្ចទៅកាន់តំបន់រមណីយដ្ឋានល្បីៗក្នុងស្រុក ដើម្បីឱ្យពួកគេបានឃើញដោយផ្ទាល់ និងផ្ដិតរូបភាពយកទៅផ្សព្វផ្សាយតាមបណ្ដាញសង្គមរបស់ពួកគេ។
លោកបានបញ្ជាក់ថា តារាហូលីវូដនីមួយៗមានអ្នកគាំទ្ររាប់សិប និងរាប់រយលាននាក់ ដូច្នេះនៅពេលពួកគេបង្ហោះរូបភាព ឬមាតិកាអំពីកម្ពុជា នោះនឹងអាចធ្វើឱ្យទស្សនិកជនជាច្រើននៅជុំវិញពិភពលោកបានឃើញ និងស្គាល់ពីតំបន់ទេសចរណ៍របស់កម្ពុជាកាន់តែទូលំទូលាយ។
ការជំរុញកិច្ចសហការរវាងវិស័យភាពយន្ត និងវិស័យទេសចរណ៍ ត្រូវបានមើលឃើញថា ជាមធ្យោបាយមួយដែលអាចជួយបង្កើនការផ្សព្វផ្សាយគោលដៅទេសចរណ៍កម្ពុជា ខណៈកម្ពុជាក៏កំពុងផ្ដោតលើការទាក់ទាញផលិតកម្មភាពយន្តអន្តរជាតិឱ្យមកប្រើប្រាស់ទីតាំងទេសចរណ៍របស់ខ្លួនសម្រាប់ការថតភាពយន្តផងដែរ៕
Account
Security
Favourite Content