សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ ពិភពលោកបានទទួលស្គាល់អំពីកម្រិតបច្ចេកវិទ្យាដ៏ទំនើបនៃបន្ទះឈីបជំនាន់ចុងក្រោយរបស់ក្រុមហ៊ុន Nvidia ដែលប្រើប្រាស់ជាផ្នែកមួយនៃខួរក្បាលសម្រាប់ម់ាស៊ីនឆ្លាតវ៉ៃក្នុងការអភិវឌ្ឍបច្ចេកវិទ្យាគ្រប់ប្រភេទ ជាពិសេស មុខងារ Machine Learning ដែលប្រើប្រាស់នៅលើកម្មវិធីល្បីៗ ដូចជា ChatGPT និង Sora ជាដើម។
DeepSeek ជាម៉ូដេល Machine Learning របស់ប្រទេសចិនបានបង្ហាញមុខមិនដល់មួយសប្តាហ៍ផងធ្វើឲ្យក្រុមហ៊ុនបច្ចេកវិទ្យា Nvidia ខាតបង់មិនស្ទើរនោះទេ ពោលគឺរហូតទៅដល់ជាង១០០ពាន់លានដុល្លារបាត់ទៅហើយដោយសារតែ Startup នេះបានអះអាងថាខ្លួនមិនបានប្រើប្រាស់ផលិតផលដែលជាបន្ទះឈីបណាមួយរបស់ Nvidia នោះឡើយ។
អ្វីដែលកាន់តែគួរឲ្យភ្ញាក់ផ្អើលនោះគឺ DeepSeek បានចំណាយទុនសម្រាប់ការអភិវឌ្ឍបច្ចេកវិទ្យាដ៏សំខាន់បែបនេះមានត្រឹមតែ៦លានដុល្លារប៉ុណ្ណោះទាំងដែលក្រុមហ៊ុនបច្ចេកវិទ្យាយក្សរបស់អាមេរិកដែលស្ថិតនៅ Sillcon Valley បានចំណាយប្រាក់រហូតទៅដល់រាប់សិបពាន់លានដុល្លារទម្រាំអាចទទួលបានជោគជ័យ និងដាក់ឲ្យប្រើប្រាស់ជាផ្លូវការ។
មួយរយៈចុងក្រោយនេះ អាមេរិក និងសម្ព័ន្ធមិត្តកំពុងតែរីកមុខរីកមាត់ និងសប្បាយចិត្តយ៉ាងខ្លាំងតាមរយៈការទទួលយកអត្ថប្រយោជន៍លើសលប់ច្រើនជាងប្រទេសចិនតាមរយៈការប្រកួតប្រជែងផលិតផលបន្ទះឈីប។ ទណ្ឌកម្មនានាទៅលើការប្រកួតប្រជែងពាណិជ្ជកម្ម ការរិតត្បិតទៅលើការអភិវឌ្ឍបច្វេកវិទ្យារបស់ចិនពីសំណាក់អាមេរិក ជាពិសេសការហាមឃាត់បន្ទះឈីបលំដាប់លេខមួយ មានន័យថាចិនគឺស្ថិតនៅត្រឹមប្រជាជាតិដែលមានការប្រើប្រាស់បន្ទះឈីបលំដាប់ទី២នៅឡើយ ( second-tier) ដែលវាបង្កជាផលលំបាកដល់រដ្ឋាភិបាលក្រុងប៉េកាំងក្នុងការប្រកួតប្រជែងទៅលើវិស័យធំៗដូចជាសព្វាវុធយោធា និងសេដ្ឋកិច្ចជាដើម។
របាំងចុងក្រោយមួយដែលអាមេរិកសង្ឃឹមថានឹងអាចកាត់ផ្តាច់ចិនពីបច្ចេកវិទ្យា AI លំដាប់កំពូលនោះ គឺកាលពីខែធ្នូ ឆ្នាំ២០២៤កន្លងទៅដែលស្ថិតក្នុងអំណាចនៃរដ្ឋបាលអាណត្តិលោក Joe Biden បានរារាំង និងទប់ស្កាត់រាល់ការនាំចេញឧបករណ៍ ក៏ដូចជាសម្ភារៈនានាពាក់ព័ន្ធនឹងបច្ចេកវិទ្យាទាំងអស់ ជាពិសេសគឺផលិតផលបន្ទះឈីបទំនើបៗទៅកាន់ទីផ្សារប្រទេសចិន។
ទោះបីជាយ៉ាងណាក្តី DeepSeek ត្រូវបានអ្នកជំនាញមើលឃើញថា វាគ្រាន់តែជាដំណាក់កាលដំបូងប៉ុណ្ណោះ។ DeepSeek ត្រូវបានបង្កើតឡើងនៅក្នុងឆ្នាំ២០២៣ ក្នុងទីក្រុង Hangzhou ដោយស្ថាបនិកដែលមានឈ្មោះថា Liang Wenfeng ហើយរហូតមកដល់ពេលបច្ចុប្បន្ននេះមានបុគ្គលិកបម្រើការងារមិនដល់២០០នាក់នោះទេ៕
Account
Security
Favourite Content