សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងគោលបំណងជួយជំរុញចរន្តសេដ្ឋកិច្ចក្នុងស្រុក និងការសន្សំបា្រក់ក្នុងអំឡុងនៃសម្ពាធសេដ្ឋកិច្ចសកល អ្នកជំនាញក្នុងវិស័យទេសចរណ៍ និងម្ចាស់ក្រុមហ៊ុនទេសចរណ៍ក្នុងស្រុក បានលើកទឹកចិត្តឲ្យពលរដ្ឋនាំគ្នាដើរកម្សាន្តក្នុងស្រុកឲ្យបានច្រើន ហើយកាត់បន្ថយដំណើរកម្សាន្តទៅក្រៅប្រទេសក្នុងអំឡុងពិធីបុណ្យចូលឆ្នាំខ្មែរ ឆ្នាំ២០២៦នេះ។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិក-កម្ពុជា បានគូសបញ្ជាក់ថា បើទោះបីសង្គ្រាមនៅមជ្ឈិមបូព៌ាមិនទាន់ជះឥទ្ធិពលអវិជ្ជមានផ្ទាល់ដល់វិស័យទេសចរណ៍កម្ពុជាក៏ពិតមែន ប៉ុន្តែស្ថិតក្នុងកាលទេសៈនេះ ពលរដ្ឋកម្ពុជា គួរធ្វើដំណើរកម្សាន្តក្នុងស្រុកជាជាងធ្វើដំណើរកម្សាន្តទៅក្រៅប្រទេស។
លោកថា ៖
«យើងព្យាយាមលើកទឹកចិត្តសមជិករបស់យើងកាត់បន្ថយនាំភ្ញៀវចេញទៅក្រៅប្រទេស ដើម្បីឲ្យការចំណាយរបស់ភ្ញៀវវិលចូលក្នុងស្រុករបស់យើង»។
លោក ធួន ស៊ីណាន បានបញ្ជាក់ទៀតថា សមាគមទេសចរណ៍បានរៀបចំកម្មវិធីផ្សព្វផ្សាយជាបន្តបន្ទាប់ពីតំបន់សក្ដានុពល ដើម្បីបង្កើនភាពទាក់ទាញភ្ញៀវទេសចរជាតិ និងអន្តរជាតិ។
អ្នកស្រី អាន ស្រីណែត ស្ថាបនិកក្រុមហ៊ុន Summer Tour & Travel បានបញ្ជាក់ថា រៀងរាល់ឆ្នាំ ក្នុងអំឡុងពិធីបុណ្យចូលឆ្នាំខ្មែរ ក្រុមហ៊ុនអ្នកស្រីតែងរៀបចំដំណើរកម្សាន្តទៅកាន់តំបន់សក្ដានុពល ដូចជា ខេត្តកោះកុង សៀមរាប មណ្ឌលគិរី ក្រចេះ ស្ទឹងត្រែង និងរតនៈគិរី ក្នុងគោលបំណងជំរុញភ្ញៀវទេសចរក្នុងស្រុក។
អ្នកស្រីបញ្ជាក់ថា ៖
«ដោយសារឈប់ច្រើនថ្ងៃ អ៊ីចឹងយើងរៀបចំកញ្ចប់ពិសេសគឺដើរលេង ៣ខេត្ត រយៈពេល ២យប់ ៣ថ្ងៃ រួមមានខេត្តក្រចេះ ស្ទឹងត្រែង និងរតនគីរី»។
ចំណែក លោក ហ៊ន សុកចាន់លីដា ស្ថាបនិក Solo landscpes ដែលជាក្រុមហ៊ុននាំភ្ញៀវទេសចរដើរកម្សាន្តទាំងក្នុង និងក្រៅប្រទេស បានប្រាប់បណ្ដាញសារព័ត៌មាន AMS ថា អំឡុងពិធីបុណ្យចូលឆ្នាំខ្មែរនេះ ក្រុមហ៊ុនលោកមានការរៀបចំដំណើរកម្សាន្តក្នុងស្រុកទៅកាន់ តំបន់កោះ ឆ្នេរសមុទ្រ និងតាមតំបន់ភ្នំ ផងដែរ។
លោកបញ្ចាក់ថា ៖
«ភាគច្រើនយើងមានទៅរបៀបដើរព្រៃ បោះតង់ ទៅផ្សងព្រេងអីដែរ។ ពេលខ្លះក៏យើងទៅងូតទឹក ស្ទូចត្រី ឬទៅជិះទូកកាយ៉ាក់អីចឹងទៅ»។
យ៉ាងណាក៏ដោយ ម្ចាស់ក្រុមហ៊ុននាំភ្ញៀវទេសចរបានកត់សម្គាល់ឃើញថាចំនួនភ្ញៀវទេសចរដែលបានកក់កញ្ចប់ដំណើរកម្សាន្តអំឡុងពិធីបុណ្យចូលឆ្នាំខ្មែរនាឆ្នាំនេះ ហាក់មិនសូវមានច្រើនដូចឆ្នាំមុនៗឡើយ។ កត្តាដែលនាំឲ្យការកក់កញ្ចប់ដំណើរកម្សាន្តអំឡុងបុណ្យចូលឆ្នាំខ្មែរថយចុះដែលក្រុមហ៊ុនទាំងនេះប៉ាន់ស្មានថា ដោយសារតែវិបត្តិសេដ្ឋកិច្ចសាកល។
ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ បានអំពាវនាវឲ្យប្រជាពលរដ្ឋខ្មែររស់នៅបរទេសធ្វើដំណើរមកកម្សាន្តនៅកម្ពុជាសម្រាប់ឱកាសចូលឆ្នាំខ្មែរឆ្នាំ២០២៦នេះ។ ជាមួយគ្នានេះ ឯកឧត្តម ក៏ជំរុញឲ្យពលរដ្ឋក្នុងស្រុកដើរលេងកម្សាន្តនៅក្នុងប្រទេសឲ្យបានច្រើន ព្រោះទាំងរាជធានីភ្នំពេញ និងបណ្ដាខេត្តសុទ្ធតែរៀបចំកម្មវិធីកម្សាន្តជាច្រើនសម្រាប់ពិធីបុណ្យចូលឆ្នាំខ្មែរ។
របាយការណ៍ក្រសួងទេសចរណ៍បានបង្ហាញថា ក្នុងអំឡុងពិធីបុណ្យចូលឆ្នាំថ្មីរយៈពេលបីថ្ងៃ កាលពីឆ្នាំ២០២៥ មានភ្ញៀវទេសចរ និងប្រជាពលរដ្ឋជិត ២៤លាននាក់ បានធ្វើដំណើរកម្សាន្តទូទាំងប្រទេស។ ក្នុងនោះ ភ្ញៀវជាតិមានជាង ២៣លាននាក់ និងភ្ញៀវអន្តរជាតិមានជាង ១១ម៉ឺន ៥ពាន់នាក់ ដោយក្នុងចំណោមតំបន់កម្សាន្តដែលមានប្រជាប្រិយភាពខ្ពស់រួមមាន រាជធានីភ្នំពេញ សៀមរាប និងកំពង់ចាម មានភ្ញៀវទេសចរ និងប្រជាពលរដ្ឋទៅកម្សាន្តច្រើនជាងគេ៕ ដោយ ៖ ខន ណារី AMS
Account
Security
Favourite Content