ព្រះសីហនុ៖ កោះរ៉ុងនៅតែទទួលបានភ្ញៀវទេសចរជាមធ្យមប្រមាណ ៤០០ នាក់ក្នុងមួយថ្ងៃ ដែលផ្តល់ចំណូលបានរហូតដល់ ១៨ ០០០ ដុល្លារប្រចាំថ្ងៃ  ទោះបីការធ្វើដំណើរទៅកាន់កោះមានការចំណាយខ្ពស់ជាងមុន និងស្ថិតក្នុងរដូវកាលបៃតងក៏ដោយ។ ក្នុងរដូវកាលបៃតងនេះទៀតសោត ភ្ញៀវក្នុងស្រុកគឺជាកម្លាំងសំខាន់សម្រាប់ទ្រទ្រង់វិស័យទេសចរណ៍ នៅពេលភ្ញៀវអន្តរជាតិធ្លាក់ចុះ។

ថ្លែងប្រាប់ AMS នៅថ្ងៃទី ២២ ខែកញ្ញា លោក ស្រេង ហៃសុខ ប្រធានសមាគមទេសចរណ៍កោះរ៉ុង បានឱ្យដឹងថា ទោះបីតម្លៃប្រេងឥន្ធនៈ និងសំបុត្រទូក និងទូកល្បឿនលឿនសម្រាប់ដឹកអ្នកដំណើរមានការកើនឡើង ក៏កោះរ៉ុងនៅតែទទួលភ្ញៀវទេសចរជាមធ្យមប្រមាណ ៤០០ នាក់ក្នុងមួយថ្ងៃ ដែលមានទាំងភ្ញៀវជាតិ និងអន្តរជាតិ។
លោកបានឱ្យដឹងថា តម្លៃសំបុត្រទូកពីខេត្តព្រះសីហនុទៅកាន់កោះរ៉ុងបានកើនឡើងពី ២៥ ដុល្លារ ដល់ ៣០ ដុល្លារ ដែលលោកចាត់ទុកថាជាកត្តាមួយដែលប៉ះពាល់ដល់ការធ្វើដំណើររបស់ភ្ញៀវទេសចរ។

លោក ហៃសុខ បានបន្តថា ជារៀងរាល់ឆ្នាំ ក្នុងរដូវកាលបៃតង កោះរ៉ុងតែងពឹងផ្អែកជាចម្បងលើភ្ញៀវទេសចរក្នុងស្រុក ដោយសារភ្ញៀវអន្តរជាតិមិនសូវមកកម្សាន្តនៅអំឡុងពេលនេះ។ ទោះជាយ៉ាងណា ឆ្នាំនេះ កោះរ៉ុងក៏បានបាត់បង់ភ្ញៀវក្នុងស្រុកមួយចំនួនផងដែរ។

លោកបានបញ្ជាក់ថា៖ «ក្នុងរដូវកាល High Season មានភ្ញៀវទេសចរបរទេសជាច្រើនមកកម្សាន្ត។ នៅពេលឈានចូលដល់រដូវកាល Green Season យើងតែងតែពឹងផ្អែកជាចម្បងទៅលើភ្ញៀវទេសចរក្នុងស្រុក។ បច្ចុប្បន្ននេះ ប្រហែល ៧៥ ភាគរយនៃភ្ញៀវទេសចរគឺជាប្រជាជនកម្ពុជា។ ក្នុងចំណោមនោះ ជាមធ្យមភ្ញៀវម្នាក់ចំណាយប្រាក់ប្រហែល ៣៧ ទៅ ៤៥ ដុល្លារក្នុងមួយថ្ងៃ សម្រាប់ការស្នាក់នៅ និងអាហារ»។

តាមការប៉ាន់ស្មានរបស់លោក ហៃសុខ ចំណូលខាងលើសំដៅទៅលើរយៈពេលប៉ុន្មានខែក្នុងរដូវវស្សានៅកោះរ៉ុង។ លោកបានបន្ថែមថា អ្នកដែលមានគម្រោងទៅកម្សាន្តនៅកោះរ៉ុងក្នុងខែនេះ នៅតែអាចធ្វើដំណើរបានជាធម្មតា ហើយអាជីវកម្មជាច្រើនក៏កំពុងផ្តល់ការបញ្ចុះតម្លៃលើសេវាកម្មរបស់ខ្លួនផងដែរ។

លោកមិនទាន់មានរបាយការណ៍សរុបអំពីចំនួនភ្ញៀវក្នុងរយៈពេល ៨ ខែដំបូងនៃឆ្នាំនេះទេ។ ទោះជាយ៉ាងណា ចាប់ពីខែមករា ដល់ខែមេសា កោះរ៉ុងបានទទួលភ្ញៀវទេសចរចំនួន ១៥២,១៧៦ នាក់ ក្នុងនោះភ្ញៀវក្នុងស្រុកមានចំនួន ១២៧,៣៦៥ នាក់។

លោក ហៃសុខ បានលើកឡើងថា ភ្ញៀវក្នុងស្រុកតែងមានការព្រួយបារម្ភអំពីព្យុះ និងរលកធំៗក្នុងរដូវវស្សា ប៉ុន្តែជាទូទៅ អាកាសធាតុមិនសូវប៉ះពាល់ខ្លាំងដល់តំបន់កោះនោះទេ ដោយសារមិនសូវមានខ្យល់បក់ខ្លាំង។ លោកបានណែនាំឱ្យភ្ញៀវត្រៀមសម្លៀកបំពាក់ការពារទឹក ឬការពារភ្លៀងឱ្យបានគ្រប់គ្រាន់ ព្រោះប៉ុន្មានថ្ងៃចុងក្រោយនេះមានភ្លៀងធ្លាក់ជាប់ៗគ្នា។

លោក តាំង សុចិត្រគ្រឹស្នា ប្រធានមន្ទីរទេសចរណ៍ខេត្តព្រះសីហនុ បានឱ្យដឹងថា ខេត្តព្រះសីហនុមានកោះចំនួន ៣២ ដែលមានគោលដៅទេសចរណ៍សំខាន់ៗ រួមមាន កោះរ៉ុង កោះរ៉ុងសន្លឹម កោះសង្សារ កោះថ្មី កោះតាកៀវ កោះអឿន កោះឬស្សី និងកោះក្របី។

លោកស្រី ឆាយ ស៊ីវលីន ប្រធានសមាគមភ្នាក់ងារទេសចរណ៍កម្ពុជា បានលើកឡើងថា ភ្ញៀវទេសចរបរទេស ជាពិសេសអ្នកមកពីបណ្តាប្រទេសលោកខាងលិច និងអឺរ៉ុប ភាគច្រើនមកកម្សាន្តក្នុងអំឡុងខែរដូវក្តៅ ដើម្បីស្វែងរកអាកាសធាតុកក់ក្តៅ និងសកម្មភាពកម្សាន្តតាមឆ្នេរខ្សាច់។

លោកស្រីបានបញ្ជាក់ថា ការកើនឡើងនៃភ្ញៀវក្នុងស្រុកដែលមកកម្សាន្តក្នុងរដូវកាលបៃតង បានជួយបំពេញចន្លោះពីការធ្លាក់ចុះនៃភ្ញៀវអន្តរជាតិ និងបង្ហាញពីតួនាទីកាន់តែសំខាន់របស់ទេសចរណ៍ក្នុងស្រុកក្នុងការគាំទ្រអាជីវកម្ម និងសហគមន៍មូលដ្ឋានក្នុងរដូវវស្សា។

សម្រាប់រដូវកាលទេសចរណ៍បៃតង លោកស្រីបានស្នើឱ្យអ្នកផ្តល់សេវាកម្មក្នុងស្រុកអនុវត្តស្តង់ដារសុវត្ថិភាពឱ្យបានតឹងរ៉ឹង ដោយប្រើប្រាស់អាវពោងដែលមានគុណភាព និងមានអនាម័យ ព្រមទាំងរក្សាតម្លៃដឹកជញ្ជូនទៅកាន់កោះឱ្យមានស្ថិរភាព ដើម្បីបង្កើនទំនុកចិត្តរបស់ក្រុមហ៊ុនទេសចរណ៍អន្តរជាតិ។

លោកស្រី ឆាយ ស៊ីវលីន ក៏បានស្នើឱ្យផ្តោតលើការធ្វើទីផ្សារជាយុទ្ធសាស្ត្រ ការផ្តល់ជូននូវគុណតម្លៃ និងការគ្រប់គ្រងកោះឱ្យកាន់តែប្រសើរ ដើម្បីទាក់ទាញភ្ញៀវបរទេសក្នុងរដូវកាលមិនមមាញឹក។

លោកស្រីបានជំរុញឱ្យអាជ្ញាធរមូលដ្ឋានចូលរួមគ្រប់គ្រងកោះ តាមរយៈការគាំទ្រការសម្អាតឆ្នេរខ្សាច់ជាប្រចាំ និងការកំណត់តំបន់ដីឱ្យបានច្បាស់លាស់ ព្រមទាំងកំណត់តំបន់ជាក់លាក់សម្រាប់កីឡាទឹកប្រើគ្រឿងម៉ាស៊ីន ដើម្បីកាត់បន្ថយការបំពុលដោយសំឡេង។

លោកស្រីក៏បានស្នើឱ្យបែងចែកឆ្នេរខ្សាច់មួយចំនួនសម្រាប់ភាពស្ងប់ស្ងាត់ និងការសម្រាកលំហែ ដើម្បីរក្សាបរិយាកាសស្ងប់ស្ងាត់សម្រាប់ភ្ញៀវទេសចរដែលស្វែងរកបទពិសោធន៍បែបធម្មជាតិ។

សម្រាប់ការទាក់ទាញភ្ញៀវដែលចូលចិត្តការកម្សាន្ត និងការជួបជុំ លោកស្រីបានលើកឡើងពីលទ្ធភាពរៀបចំកម្មវិធីច្នៃប្រឌិត ដូចជា «ពិធីជប់លៀងក្រោមដំណក់ទឹកភ្លៀង» (Rain Parties) ក្នុងរដូវវស្សា ប៉ុន្តែគួរកំណត់ទីតាំងជាក់លាក់ ដើម្បីកុំឱ្យរំខានដល់ភ្ញៀវដែលចង់បានភាពស្ងប់ស្ងាត់៕