ភ្នំពេញ ៖ គ្រាន់តែ​តំបន់​សេដ្ឋកិច្ចពិសេសក្រុងព្រះសីហនុ​តែមួយ​ប៉ុណ្ណោះ ក្នុងមួយឆ្នាំបានចំណាយថវិការហូតដល់ប្រមាណជាង១១១លានដុល្លារអាម៉េរិកទៅលើប្រាក់ឈ្នួលកម្មករ-កម្មការិនីដែលបម្រើការងារនៅក្នុងតំបន់នេះ ដែលនេះជា​ចំណែកមួយ​ក្នុងការលើកស្ទួយ​ដល់កម្រិតជីវភាពរបស់ប្រជាពលរដ្ឋមួយចំនួននៅក្នុងខេត្ត​ ក៏ដូចជាពលរដ្ឋ​ដែលមកពីបណ្ដាខេត្ត​នានា​បម្រើការនៅក្នុង​តំបន់សេដ្ឋកិច្ច​ពិសេស​នេះផងដែរ។ ​នេះបើតាម​របាយការណ៍របស់​ក្រុមការងារ​ជំរុញការ​វិនិយោគ​ខេត្ត​ព្រះសីហនុ ដែលបានផ្សព្វផ្សាយ​កាលពីពេលថ្មីៗកន្លងទៅនេះ ។​

បើតាមរបាយការណ៍បានឱ្យដឹងថា ក្នុង​តំបន់សេដ្ឋកិច្ចពិសេសក្រុងព្រះសីហនុ​ មានក្រុមហ៊ុនកំពុង​បណ្ដាក់ទុន​វិនិយោគប្រមាណ២០០​ក្រុមហ៊ុន​ និង​មានរោងចក្រ​-សហគ្រាស​ជាង ​៣០០ទីតាំង ប្រើ​ប្រាស់​កម្លាំង​ពលកម្ម​សរុប​ប្រមាណ៣ម៉ឺននាក់ ដោយបុគ្គលិក កម្មករម្នាក់​អាចទទួល​បាន​ប្រាក់ឈ្នួលជា​មធ្យម​ប្រចាំ​ខែ ​៣១១ដុល្លារអាម៉េរិក

តាម​របា​យ​កា​រណ៍​បានបង្ហាញថា បើនិយាយ​ពីការ​ចំណាយ​លើ​ប្រាក់ឈ្នួល​របស់បុគ្គលិក​ កម្មករ​ដែលបម្រើការងារនៅក្នុងតំបន់សេដ្ឋកិច្ចពិសេសទាំង៥ទីតាំងក្នុង​ខេត្តព្រះសីហនុទាំង​មូលសរុបទាំង​​អ​ស់​ចំនួនជាង​១១ម៉ឺននាក់​ ​សម្រាប់តែក្នុង​ឆ្នាំ ២០២៥នេះ ​អាច​ទទួល​បាន​ប្រាក់ឈ្នួលសរុប​ចំនួន ៣៥៩​លានដុល្លារអាម៉េរិក​​ ។

គួរ​បញ្ជាក់ថា​ តំបន់​សេដ្ឋកិច្ចពិសេស​ក្រុងព្រះសីហនុ ត្រូវបាន​វិនិយោគ​ដោយ​ក្រុមហ៊ុនមកពីប្រទេស​ចិន ដូច្នេះ​ក្រុមហ៊ុន ​និ​ងរោងចក្រ​សហគ្រាស​ដែលកំពុង​ដំណើរការនៅក្នុង​តំបន់​សេដ្ឋកិច្ចពិសេស​មួយនេះភាគច្រើនក៏ជាការបណ្តាក់មកពីប្រទេសចិនដូចគ្នា ខណៈដែលកាលពីពេលកន្លងទៅថ្មីៗនេះដែរ តំណាងសមាគមវិនិយោគចិនក៏បានសន្យា​ថា​នឹង​ជំរុញវិនិយោគិន​ចិនឱ្យមកបណ្ដាក់ទុនវិនិយោគនៅក្នុង​តំបន់​សេដ្ឋ​កិច្ចពិសេស​នេះ​បន្ថែមទៀត​ ដែល​នឹងធ្វើ​ឱ្យមានកំណើន​វិនិយោគ​នៅក្នុង​តំបន់​សេដ្ឋកិច្ចពិសេសក្រុង​ព្រះ​សី​ហ​នុ​ ក៏ដូចជា​ក្នុង​ខេត្តព្រះសីហនុទាំង​មូលកើនឡើងបន្ថែមទៀត ។​

ឯកឧត្តម ម៉ាង ស៊ីណេត អភិបាលខេត្តព្រះសីហនុ បានលើកឡើងថា ការ​វិនិយោគ​នៅក្នុង​ខេត្តព្រះសីហនុ​ជា​បន្ត​បន្ទាប់បានបង្កើត​ឱកាស​ការងារ​​ និងប្រាក់ចំណូល​ដល់ប្រជាពលរដ្ឋ​ក្នុង​ខេត្តព្រះសីហនុ និង​បានធ្វើឱ្យ​ប្រាក់ចំណូល​ជាមធ្យមប្រចាំឆ្នាំរបស់ខេត្ត​មួយនេះ ខ្ពស់ជាង​គេ​ធៀបនឹ​ងបណ្ដាខេត្តនានា​ទូទាំង​ប្រទេស ហើយក៏រំពឹង​ថា​ប្រាក់ចំណូលជាមធ្យម​សម្រាប់​មនុស្ស​ម្នាក់​របស់​ខេត្តព្រះសីហនុ​នឹ​ងកើនឡើង​ជា​បន្ត​បន្ទាប់​ទៀត ស្របពេល​ផែនការនៃការ​វិនិយោគ​ខេត្តព្រះសីហនុ ក៏កំពុងទាក់ទាញ​បានការ​វិនិយោគថ្មីៗជា​បន្ត​បន្ទាប់ផងដែរ ។​

បើតាម​ផែនការមេរបស់រាជរដ្ឋាភិបាល​កម្ពុជា នឹង​ប្រែ​ក្លាយខេត្តជាប់ឆ្នេរសមុទ្រទាំងបួនរួមមានខេត្តព្រះសីហនុ កោះកុង កំពត និងកែប ឲ្យក្លាយជាតំ​ប​ន់សេ​ដ្ឋ​កិច្ចពិសេគំរូពហុបំណង និងប្រទាក់ក្រឡា និងប្រែ​ក្លា​យ​ខេ​ត្តព្រះ​សី​ហ​នុ​ទៅ​ជាម​ជ្ឈ​មណ្ឌ​ល​ស​មា​ហរ​ណកម្មឧស្សាហកម្មក្នុងតំបន់ បម្រើជាច្រកទ្វារអន្តរជាតិ ​និ​ង​ប៉ូល​អភិ​វ​ឌ្ឍន៍​ជា​តិរ​ប​ស់​​ព្រះ​រាជា​ណាច​ក្រកម្ពុ​ជា​៕