សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ក្រោយពេលដែលប៊ុលហ្គារីបានចូលខ្លួនជាសមាជិកនៃក្រុមប្រទេសតំបន់ចាយប្រាក់អឺរ៉ូមួយរយៈក្រោយមក ក្រុមហ៊ុនរកស៊ីក្នុងស្រុកកំពុងវិភាគនិងសម្លឹងមើលថា តើអត្ថប្រយោជន៍ពិតប្រាកដនឹងកើតឡើងសម្រាប់អាជីវកម្មពួកគេឬទេ ហើយថាតើនឹងមានអ្វីខ្លះ។
ប្រាក់អឺរ៉ូ (Euro) បានក្លាយជារូបិយប័ណ្ណផ្លូវការរបស់ប្រទេសប៊ុលហ្គារី កាលពីថ្ងៃទី១ ខែមករា ឆ្នាំ២០២៦ ដែលនេះជាការបញ្ចប់ការប្រើប្រាស់ប្រាក់ ប្រាក់លេវ (Lev) របស់ប៊ុលហ្គារី ដែលមានអាយុកាលជាច្រើនទសវត្សមកហើយ។
កាសែតក្នុងស្រុក Novinata បានសរសេរថា មានការយល់ឃើញស្របគ្នាក្នុងចំណោមអ្នកវិភាគសេដ្ឋកិច្ចដែលបានគូសបញ្ជាក់ ចាប់ពីវិស័យទេសចរណ៍ទៅដល់ឧស្សាហកម្ម ព្រមទាំងគំរូអាជីវកម្មជាក់លាក់មួយចំនួនទៀត គឺត្រូវបានរំពឹងថានឹងទទួលបានអត្ថប្រយោជន៍បំផុតលើផ្នែកប្រាក់ចំណេញ និងអត្ថប្រយោជន៍ដែលមានភាពប្រកួតប្រជែងខ្លាំងដោយក្នុងនោះ រួមមាន៖
វិស័យធនាគារ និងហិរញ្ញវត្ថុ៖ លុបបំបាត់ហានិភ័យរូបិយប័ណ្ណ និងកាត់បន្ថយថ្លៃសេវាប្តូរប្រាក់ ធ្វើឱ្យប្រតិបត្តិការធនាគារងាយស្រួលជាងមុន។ ការទទួលបានប្រភពទុនមានភាពងាយស្រួល ហើយអត្រាការប្រាក់មានភាពប្រកួតប្រជែងខ្ពស់។
ក្រុមហ៊ុនអ្នកនាំចេញ និងពាណិជ្ជកម្មអន្តរជាតិ អាចសន្សំសំចៃថវិកាលើថ្លៃសេវាធនាគារ ការប្តូរប្រាក់ និងការការពារហានិភ័យលលើរូបិយប័ណ្ណ បង្កើនសមត្ថភាពប្រកួតប្រជែងរបស់សហគ្រាសប៊ុលហ្គារី នៅក្នុងទីផ្សារអឺរ៉ុប។
វិស័យទេសចរណ៍៖ ភ្ញៀវទេសចររាប់លាននាក់មកពីតំបន់ចាយលុយអឺរ៉ូ លែងត្រូវការប្តូរប្រាក់នៅពេលមកកម្សាន្ត។ ការទូទាត់មានភាពងាយស្រួល និងតម្លាភាពតម្លៃ ជួយទាក់ទាញភ្ញៀវទេសចរកាន់តែច្រើន។
វិស័យអចលនទ្រព្យ៖ វិនិយោគិនបរទេសអាចវាយតម្លៃឱកាសវិនិយោគបានងាយស្រួល ដោយមិនបារម្ភពីការប្រែប្រួលតម្លៃលុយ។ មជ្ឈមណ្ឌលភស្តុភារកម្ម តំបន់ឧស្សាហកម្ម និងផ្ទះលំហែកាយ នឹងអាចទាក់ទាញទុនវិនិយោគបន្ថែម។
ក្រុមហ៊ុនរកស៊ីផ្នែកផលិតកម្ម និងឧស្សាហកម្ម៖ ទទួលបានលក្ខខណ្ឌវិនិយោគនិងប្រភពទុនអឺរ៉ុបល្អជាងមុន និងកាត់បន្ថយថ្លៃដើមនាំចូលវត្ថុធាតុដើម និងគ្រឿងចក្រ ដែលផ្តល់ផលចំណេញខ្លាំងដល់ឧស្សាហកម្មយានយន្ត វិស្វកម្ម និងអេឡិចត្រូនិច។
អាជីវកម្មខ្នាតតូច និងមធ្យម៖ ទទួលបានផលប្រយោជន៍ពីថ្លៃសេវាធនាគារទាប ងាយស្រួលចូលទីផ្សារអឺរ៉ុប និងទទួលបានទំនុកចិត្តខ្ពស់ពីដៃគូបរទេស។
ដូច្នេះសម្រាប់អត្ថប្រយោជន៍រយៈពេលវែងមានន័យថាពួកគេនឹងអាចកាត់បន្ថយថ្លៃដើមប្រតិបត្តិការ បង្កើនភាពច្បាស់លាស់ក្នុងការរៀបចំផែនការ និងបើកផ្លូវទៅកាន់ទីផ្សារធំដោយគ្មានរបាំងរូបិយប័ណ្ណទៀតនោះទេ៕
Account
Security
Favourite Content