សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ ឥណ្ឌូនេស៊ី បានប្រកាសដាក់ចេញនូវកញ្ចប់ថវិកាប្រមាណ ១,៤៨ ពាន់លានដុល្លារអាម៉េរិកដើម្បីពង្រឹងសេដ្ឋកិច្ច និងទប់ទល់ជាមួយវិបត្តិថាមពលដែលកំពុងកើតមានជាសកល ជាពិសេសទប់តម្លៃរូបិយវត្ថុនៅក្នុងឆមាសទី២នៃឆ្នាំ ២០២៦ ។
កាលពីថ្ងៃចន្ទកន្លងទៅនេះ ឥណ្ឌូនេស៊ី បានប្រកាសដាក់ចេញនូវកញ្ចប់ថវិកាដើម្បីពង្រឹងសេដ្ឋកិច្ចជាតិដែលមានតម្លៃ ២៦,៣៤ ទ្រីលានរូពៀ (ប្រហែល ១,៤៨ ពាន់លានដុល្លារអាម៉េរិក) ខណៈដែលកំពុងប្រឈមមុខនឹងវិបត្តិថាមពលសកល និងសម្ពាធក្នុងស្រុកដែលបានធ្វើឱ្យតម្លៃរូបិយវត្ថុធ្លាក់ចុះយ៉ាងខ្លាំង។
លោក Airlangga Hartarto រដ្ឋមន្ត្រីសម្របសម្រួលកិច្ចការសេដ្ឋកិច្ច បានលើកឡើងថា ថវិកាប្រហែល ១៨,០៤ ទ្រីលានរូពៀ (១ ពាន់លានដុល្លារ) នឹងត្រូវប្រើប្រាស់ដើម្បីប្ដូរជាអង្ករដោយផ្តល់បរិមាណ ១០ គីឡូក្រាមក្នុងមួយបាវជូនដល់ពលរដ្ឋ ៣៣,២៤ លាននាក់ ឬ ស្មើនឹង ១១,៥ ភាគរយនៃចំនួនប្រជាជនសរុប។ លើសពីនេះ សម្រាប់កញ្ចប់ថវិកាដែលនៅសេសសល់រួមមាន៖ ៦,២៦ ទ្រីលានរូពៀ (៣៥០ លានដុល្លារ) សម្រាប់កម្មវិធីចុះកម្មសិក្សា និងសាលាបណ្តុះបណ្តាលវិជ្ជាជីវៈ និង ២,០៤ ទ្រីលានរូពៀ (១១៣,៨ លានដុល្លារ) សម្រាប់ឧបត្ថម្ភធនលើការដឹកជញ្ជូន ជាពិសេសក្នុងអំឡុងពេលវិស្សមកាលសិក្សា។ រដ្ឋាភិបាលនឹងផ្តល់ការបញ្ចុះតម្លៃរហូតដល់ ៣០ ភាគរយលើសំបុត្ររថភ្លើង និង សំបុត្រនាវាចម្លងក្នុងអំឡុងពេលវិស្សមកាលសិក្សា និង រដូវកាលចុងឆ្នាំ។ លើសពីនេះ ឥណ្ឌូនេស៊ីនឹងបន្តរ៉ាប់រងទាំងស្រុងលើពន្ធលើតម្លៃបន្ថែម (VAT) សម្រាប់ការហោះហើរក្នុងស្រុកកៅអី Economy class ក្នុងអំឡុងពេលនោះផងដែរ។
ទន្ទឹមនឹងនេះ រដ្ឋាភិបាលក៏នឹងលុបបំបាត់ពន្ធនាំចូលលើឧស្ម័នរាវ (LPG) និងវត្ថុធាតុដើមសម្រាប់ផលិតជ័រប្លាស្ទិក, កាត់បន្ថយពន្ធនាំចូលលើគ្រឿងបន្លាស់យន្តហោះ, និងកាត់បន្ថយអត្រាពន្ធលើប្រាក់ចំណូលចុងក្រោយសម្រាប់សិទ្ធិអ្នកនិពន្ធក្នុងស្រុកមកត្រឹម ១,៥ ភាគរយ (អត្រាកាលពីមុខខ្ពស់បំផុតរហូតដល់ ៣៥ ភាគរយ)។ កញ្ចប់ថវិកាសម្រាប់ការអនុវត្តវិធានការទាំងនេះមានតម្លៃ ៥០០ ពាន់លានរូពៀ (២៨ លានដុល្លារ)។
លោក Hartarto បានលើកឡើងថា វិធានការនេះត្រូវបានរំពឹងថានឹងបង្កើនផលចំណេញសេដ្ឋកិច្ចចំនួន ២,២៥ ទ្រីលានរូពៀ (១២៥,៦ លានដុល្លារ) តាមរយៈការកាត់បន្ថយការចំណាយសម្រាប់ឧស្សាហកម្មពាក់ព័ន្ធ និងបង្កើតផលជះជាវិជ្ជមានជាបន្តបន្ទាប់។ ការកំណត់ពន្ធនាំចូល ០% លើវត្ថុធាតុដើមផ្លាស្ទិក អាចជួយទប់ស្កាត់អតិផរណាបាន ដោយសារតែការវេចខ្ចប់អាហារស្ទើរតែទាំងអស់សុទ្ធតែប្រើប្រាស់ប្លាស្ទិក។
ទោះជាយ៉ាងណាក្ដី វិធានការថ្មីនេះមិនទាន់រាប់បញ្ចូលកម្មវិធីលើកទឹកចិត្តសម្រាប់ការទិញយានយន្តអគ្គិសនីនោះទេ ដែលធ្លាប់ត្រូវបានរំពឹងថានឹងដាក់ឱ្យអនុវត្តមិនឱ្យហួសពីខែកក្កដានោះឡើយ។ កាលពីពេលមុន រដ្ឋមន្ត្រីក្រសួងហិរញ្ញវត្ថុ លោក Purbaya Yudhi Sadewa ធ្លាប់បានលើកឡើងថា ឥណ្ឌូនេស៊ីនឹងផ្តល់ការឧបត្ថម្ភធនចំនួន ៥ លានរូពៀ (ប្រហែល ២៨០ ដុល្លារ) សម្រាប់ការទិញម៉ូតូអគ្គិសនីមួយគ្រឿង និងការឧបត្ថម្ភធនលើពន្ធតម្លៃបន្ថែម (VAT) ពី ៤០ ភាគរយទៅ ១០០ ភាគរយសម្រាប់រថយន្តអគ្គិសនី ដែលផ្អែកទៅលើប្រភេទអាគុយ។
ប្រធានាធិបតីឥណ្ឌូណេស៊ី លោក Prabowo Subianto បានកំណត់គោលដៅកំណើនសេដ្ឋកិច្ចក្នុងកម្រិត ៥,៤ ភាគរយសម្រាប់ឆ្នាំនេះ ពោលគឺកើនឡើងពី ៥,១១ ភាគរយក្នុងឆ្នាំ ២០២៥។ យ៉ាងណាមិញ អ្នកជំនាញជាច្រើនព្យាករណ៍ថា គោលដៅនេះគឺមិនអាចទៅរួចនោះទេ ដោយសារតែឥណ្ឌូណេស៊ីកំពុងរងគ្រោះដោយសារវិបត្តិថាមពលសកល និងការបាត់បង់ទំនុកចិត្តពីវិនិយោគិនព្រោះតែគោលនយោបាយមិនច្បាស់លាស់។ ក្នុងឆ្នាំនេះផងដែរ រូបិយប័ណ្ណរូពៀធ្លាក់ថ្លៃចុះដល់កម្រិតទាបបំផុតក្នុងប្រវត្តិសាស្ត្រ ខណៈដែលទីផ្សារភាគហ៊ុនរបស់ឥណ្ឌូនេស៊ីធ្លាក់ចុះរហូតដល់ ៣០ ភាគរយ។ ដើម្បីទប់ទល់នឹងការធ្លាក់ថ្លៃរូបិយប័ណ្ណនេះ ធនាគារកណ្តាលបានដំឡើងអត្រាការប្រាក់ចំនួន ៣ លើករួចមកហើយក្នុងរយៈពេល ៥ សប្តាហ៍ចុងក្រោយនេះ។ គួរឲ្យបញ្ជាក់ផងដែរថា នៅក្នុងត្រីមាសទីមួយនៃឆ្នាំនេះ រដ្ឋាភិបាលបានចំណាយថវិកាអស់ចំនួន ១៥ ទ្រីលានរូពៀ (ប្រហែល ៨៤១ លានដុល្លារ) រួចមកហើយ លើការផ្តល់ជំនួយស្បៀងអាហារ និងកម្មវិធីជំរុញសារពើពន្ធផ្សេងៗទៀត៕
Account
Security
Favourite Content