សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ អាម៉េរិក គ្រោងអនុម័តលើសេចក្តីព្រាងច្បាប់មួយដែលផ្តល់អំណាចដល់ប្រធានាធិបតី លោក Donald Trump សម្រាប់ដាក់ទណ្ឌកម្ម ឬ ដំឡើងពន្ធដល់ទៅ ១០០ ភាគរយលើបណ្តាប្រទេសទាំងឡាយណាដែលទិញប្រេងពីរុស្ស៊ី នេះបើយោងតាមសេចក្ដីរាយការណ៍ពី Al Jazeera។
កាលពីថ្ងៃពុធកន្លងទៅនេះ រដ្ឋសភាអាម៉េរិកបានអនុម័តសេចក្តីព្រាងច្បាប់ស្តីពីទណ្ឌកម្ម និងពន្ធគយដ៏ទូលំទូលាយមួយ ដើម្បីបង្កើនសម្ពាធសេដ្ឋកិច្ចលើរុស្ស៊ីជុំវិញការឈ្លានពានលើអ៊ុយក្រែន។ សេចក្តីព្រាងច្បាប់នេះកំណត់គោលដៅលើវិស័យថាមពល និងការពារជាតិរបស់រុស្ស៊ី, ប្រធានាធិបតីលោក Vladimir Putin, មន្ត្រីជាន់ខ្ពស់ផ្សេងទៀត ព្រមទាំងកងនាវាស្រមោលរបស់ទីក្រុងម៉ូស្គូ ដែលត្រូវបានប្រើប្រាស់ដើម្បីគេចចេញពីទណ្ឌកម្មរបស់លោកខាងលិច។ ច្បាប់នេះក៏បានអនុញ្ញាតឱ្យប្រធានាធិបតី លោក Donald Trump អាចដំឡើងពន្ធយ៉ាងធ្ងន់ធ្ងររហូតដល់ ១០០ ភាគរយ ទៅលើបណ្តាប្រទេសនានាដែលទិញថាមពលពីរុស្ស៊ី និងអាចពង្រីកទណ្ឌកម្មលើអុីរ៉ង់បន្ថែមទៀត។ វិធានការថ្មីនេះអាចនឹងប៉ះពាល់ដល់ឥណ្ឌា និងចិន ដែលជាអ្នកទិញប្រេងធំជាងគេរបស់រុស្ស៊ី។ បច្ចុប្បន្ន សេចក្តីព្រាងច្បាប់នេះកំពុងរង់ចាំការចុះហត្ថលេខាពីលោក Trump ដើម្បីឱ្យដាក់ប្រើប្រាស់ជាផ្លូវការ។
យ៉ាងណាមិញ ឥណ្ឌា បានព្រមានអាម៉េរិកថា វិធានការថ្មីក្នុងការដាក់ពន្ធលើប្រទេសដែលទិញប្រេងពីរុស្ស៊ី អាចនឹងប៉ះពាល់ដល់ទំនាក់ទំនងការទូតរវាងឥណ្ឌា និងអាម៉េរិក។ កាលពីថ្ងៃព្រហស្បតិ៍កន្លងទៅនេះ ក្រសួងការបរទេសឥណ្ឌា ថ្លែងពីការប្តេជ្ញាចិត្តយ៉ាងមុតមាំក្នុងការធានាសន្តិសុខថាមពលសម្រាប់ប្រជាជនរបស់ខ្លួនចំនួន ១,៤ ពាន់លាននាក់។ ឥណ្ឌានឹងចាត់វិធានការចាំបាច់ទាំងអស់ ដើម្បីការពារផលប្រយោជន៍ពាណិជ្ជកម្ម និងសេដ្ឋកិច្ចរបស់ខ្លួន។ ក្រសួងបន្ថែមថា រដ្ឋាភិបាលនឹងធ្វើការយ៉ាងជិតស្និទ្ធជាមួយស្ថាប័នពាណិជ្ជកម្ម និងឧស្សាហកម្ម ដើម្បីដោះស្រាយផលវិបាកដែលបណ្តាលមកពីច្បាប់នេះ។ ក្នុងរយៈពេលប៉ុន្មានខែថ្មីៗនេះ ឥណ្ឌាបានលើកឡើងពីបញ្ហានេះជាមួយភាគីពាក់ព័ន្ធអាម៉េរិកជាច្រើនរូបរួចមកហើយ និងបញ្ជាក់យ៉ាងច្បាស់ពីផលវិបាកដែលអាចកើតមានចំពោះទំនាក់ទំនងទ្វេភាគី និងទីផ្សារថាមពលអន្តរជាតិ។
គួរឲ្យបញ្ជាក់ដែរថា ឥណ្ឌា គឺជាប្រទេសនាំចូលប្រេងធំជាងគេទី ៣ នៅលើពិភពលោក និងស្ថិតនៅក្នុងចំណោមអ្នកទិញប្រេងរុស្ស៊ីធំបំផុត។ សកម្មភាពនេះត្រូវបានមើលឃើញថា ជាការជួយទីក្រុងម៉ូស្គូរកចំណូលមកបំពេញថវិការបស់ខ្លួនឡើងវិញ ចាប់តាំងពីមានសង្គ្រាមជាមួយនឹងអ៊ុយក្រែន និងរងទណ្ឌកម្មយ៉ាងធ្ងន់ធ្ងរពីលោកខាងលិច។ កន្លងមក ទីក្រុងញូវដេលីតែងតែអះអាងជារឿយៗថា ប្រជាជនដ៏ច្រើនសន្ធឹកសន្ធាប់ និងសេដ្ឋកិច្ចរបស់ខ្លួនត្រូវការការផ្គត់ផ្គង់ថាមពលដែលមានសុវត្ថិភាព តម្លៃសមរម្យ និងអាចទុកចិត្តបាន៕
Account
Security
Favourite Content