សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ វៀតណាមបានក្លាយជាទីផ្សាររថយន្តអគ្គិសនី (EV) ធំបំផុតនៅអាស៊ីអាគ្នេយ៍ក្នុងឆ្នាំ ២០២៥ ដោយការលក់រថយន្តប្រភេទនេះកើនឡើងជាងទ្វេដង និងមានចំណែកជិត ៤០ ភាគរយនៃការលក់រថយន្តថ្មីសរុប។ នេះបើយោងតាមការរាយការណ៍របស់ Vietnam Plus ដោយដកស្រង់ទិន្នន័យពីទីភ្នាក់ងារថាមពលអន្តរជាតិ (IEA)។
យោងតាម IEA កំណើនការលក់ EV របស់វៀតណាមខ្ពស់ជាងមធ្យមភាគកំណើនសកលលោក ដែលមានប្រមាណ ២៥ ភាគរយ ហើយបានក្លាយជាកត្តាសំខាន់មួយក្នុងការជំរុញកំណើនទីផ្សារ EV ទូទាំងអាស៊ីអាគ្នេយ៍។
ការលក់រថយន្តអគ្គិសនីនៅអាស៊ីអាគ្នេយ៍បានកើនឡើងជាងទ្វេដងក្នុងឆ្នាំ ២០២៥ ដល់ជាង ៥០០,០០០ គ្រឿង ដោយវៀតណាម ឥណ្ឌូណេស៊ី និងថៃ ជាទីផ្សារសំខាន់ដែលជំរុញកំណើនក្នុងតំបន់។
កំណើនទីផ្សារ EV របស់វៀតណាមត្រូវបានគាំទ្រដោយគោលនយោបាយរដ្ឋាភិបាល ដែលមានគោលដៅលើកទឹកចិត្តដល់ការប្រើប្រាស់យានយន្តអគ្គិសនី។ ចាប់តាំងពីឆ្នាំ ២០២២ វៀតណាមបានផ្តល់ការលើកលែងថ្លៃចុះបញ្ជី និងពន្ធផ្លូវសម្រាប់យានយន្តអគ្គិសនី។
ជាមួយគ្នានេះ វៀតណាមកំពុងបញ្ចូលការអភិវឌ្ឍហេដ្ឋារចនាសម្ព័ន្ធស្ថានីយសាកថ្មទៅក្នុងយុទ្ធសាស្ត្រដឹកជញ្ជូនបៃតងរបស់ខ្លួន ដើម្បីគាំទ្រដល់ការពង្រីកការប្រើប្រាស់ EV។
ក្រោមកម្មវិធីថាមពលបៃតង និងគោលដៅសម្រេចការបំភាយឧស្ម័នផ្ទះកញ្ចក់ស្មើសូន្យត្រឹមឆ្នាំ ២០៥០ វៀតណាមមានផែនការលើកកម្ពស់ការផលិត ការដំឡើង និងការនាំចូលយានយន្តអគ្គិសនី ព្រមទាំងអភិវឌ្ឍហេដ្ឋារចនាសម្ព័ន្ធស្ថានីយសាកថ្ម។
អាជ្ញាធរវៀតណាមក៏បានណែនាំដល់ក្រសួងពាក់ព័ន្ធឱ្យពិនិត្យឡើងវិញនូវបទប្បញ្ញត្តិសម្រាប់ស្ថានីយសាកថ្មនៅតាមស្ថានីយប្រេងឥន្ធនៈ និងរៀបចំស្តង់ដារសម្រាប់ទីតាំងសាកថ្មនៅតាមអគារអាផាតមិន មជ្ឈមណ្ឌលពាណិជ្ជកម្ម និងកន្លែងឈប់សម្រាកតាមដងផ្លូវ។
IEA រំពឹងថា ការប្រើប្រាស់រថយន្តអគ្គិសនីនៅវៀតណាមនឹងបន្តកើនឡើង ដោយព្យាករណ៍ថា EV អាចក្តោបបានជាង ៨០ ភាគរយនៃការលក់រថយន្តថ្មីនៅប្រទេសនេះត្រឹមឆ្នាំ ២០៣៥ ដែលអាចជាកម្រិតខ្ពស់បំផុតមួយនៅក្នុងតំបន់អាស៊ីអាគ្នេយ៍។
នៅទូទាំងពិភពលោក ការលក់រថយន្តអគ្គិសនីបានកើនឡើង ២០ ភាគរយក្នុងឆ្នាំ ២០២៥ ដល់ជាង ២០ លានគ្រឿង បើធៀបនឹងឆ្នាំ ២០២៤។
ចិននៅតែជាទីផ្សារ EV ធំបំផុតលើពិភពលោក ដោយការលក់ក្នុងឆ្នាំ ២០២៥ មានជាង ១៣ លានគ្រឿង និងមានចំណែកជិត ៥៥ ភាគរយនៃទីផ្សាររថយន្តអគ្គិសនីសកលលោក៕
Account
Security
Favourite Content