សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គម្រោងសាងសង់ស្ពានឆ្លងទន្លេសាប និងទន្លេមេគង្គ ភ្នំពេញ-អរិយក្សត្រ កាន់តែជិតចេញជារូបរាងច្បាស់ហើយ ក្រោយរដ្ឋាភិបាលនៃសាធារណរដ្ឋកូរ៉េ បានសន្យាថានឹងផ្ដល់ហិរញ្ញប្បទានសម្រាប់គម្រោងនេះនៅក្នុងឆ្នាំ២០២៥ ខណៈអ្នកនាំពាក្យក្រសួងថាគម្រោងនេះគ្រោងបើកការដ្ឋានឆាប់ៗនេះ ។
បើតាមសេចក្ដីប្រកាសព័ត៌មានមួយរបស់ក្រុមប្រឹក្សាអភិវឌ្ឍន៍កម្ពុជាកាលពីកន្លងទៅនេះបានឱ្យដឹងថា សម្រាប់ឆ្នាំ២០២៥នេះ រដ្ឋាភិបាលនៃសាធារណរដ្ឋកូរ៉េ គ្រោងផ្ដល់ហិរញ្ញប្បទានអភិវឌ្ឍន៍ផ្លូវការដល់កម្ពុជាទំហំប្រមាណ៣១៥លានដុល្លារអាមេរិក ។ ក្នុងទឹកប្រាក់ប្រមាណជាង៣០០លានដុល្លារអាមេរិកក៏មានទឹកប្រាក់សម្រាប់សាងសង់ស្ពានឆ្លងទន្លេពីភ្នំពេញទៅកាន់ក្រុងអរិយក្សត្រផងដែរ ។
បើតាមលោក ផន រឹម អ្នកនាំពាក្យក្រសួងសាធារណការ និងដឹកជញ្ជូន បានថ្លែងប្រាប់ AMS នៅថ្ងៃទី០១ មេសា ឆ្នាំ ២០២៥ឱ្យដឹងថា គម្រោងស្ពានតភ្ជាប់ភ្នំពេញទៅកាន់ក្រុងអរិយក្សត្រនេះ បានរៀបចំត្រៀមសម្រាប់បើកការដ្ឋានរួចរាល់ហើយ ដោយរង់ការសម្រេចពីសំណាក់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នឹងបើកការដ្ឋានជាផ្លូវការតែម្ដង ។
លោកបន្តថា គម្រោងនេះ នឹងបើកការដ្ឋាននៅពេលឆាប់ៗខាងមុខដីខ្លីនេះហើយ ប៉ុន្តែលោកមិនបានបញ្ជាក់ពីកាលបរិច្ឆេទច្បាស់លាស់ណាមួយនៅឡើយទេ ដោយក្រាន់តែបញ្ជាក់ គម្រោងនេះគឺជាគម្រោងពិតជាក់ច្បាស់ហើយ ។
បើទោះបីជាគម្រោងសាងសង់ស្ពានភ្នំពេញ អរិយក្សត្រ ឬ ស្ពានមិត្តភាពកម្ពុជា កូរ៉េ មិនទាន់ចេញជារូបរាងក៏ដោយ ក៏មានវិនិយោគិនក្នុងនិងក្រៅប្រទេសមួយចំនួន បានត្រៀមជើងព្រួលក្នុងការដាក់ទុនវិនិយោគនៅតំបន់អរិយក្សត្ររួចហើយ ចាក់ស្ដែងក្រុមហ៊ុនក្នុងស្រុកមួយបានបណ្ដាក់ទុនវិនិយោគ បង្កើតទីក្រុងរណបនៅតំបន់ជ្រោយចង្វាររួចហើយដែរ ដែលនឹងជំរុញឱ្យសក្ដានុពលនៃតំបន់អរិយក្សត្រកាន់តែទាក់ទាញបន្ថែមទៀត ស្របជាមួយនឹងរាជរដ្ឋាភិបាលក៏បានបង្កើតតំបន់អរិយក្សត្រជាក្រុងរួចហើយផងដែរ ។
អ្នកវាយតម្លៃនិងភ្នាក់ងារអចលនវត្ថុកម្ពុជា លោក ប៉ូ អ៊ាវគង់ អគ្គនាយកក្រុមហ៊ុន Advance Real Estate បានថ្លែងថា នៅក្នុងក្រុងអរិយក្សត្រ អ្វីដែលគួរអភិវឌ្ឍន៍មុនគេ គឺហេដ្ឋារចនាសម្ព័ន្ធក្នុងតំបន់ ហើយនៅពេលមានហេដ្ឋារចនាសម្ព័ន្ធរួចហើយ នឹងមនុស្សទៅរស់នៅតំបន់នោះកាន់តែច្រើន ដែលធ្វើឱ្យតម្រូវការលំនៅឋានអាចនឹងកើនឡើងខ្ពស់ ដែលជាពេលវេលាសម្រាប់វិនិយោគិនក្នុងការអភិវឌ្ឍលំនៅឋានដើម្បីបំពេញតម្រូវការ ។
ក្រសួងរៀបចំដែនដីនគរូបនីយកម្មនិងសំណង់ ក៏បានបង្ហើបពីគម្រោងបង្កើតសួនច្បារសាធារណៈ នៅក្នុងតំបន់ក្រុងអរិយក្សត្រដើម្បីជាកន្លែងកម្សាន្ត និងហាត់ប្រាណរបស់ពលរដ្ឋរស់នៅទីនោះ ដែលជាចក្ខុវិស័យរបស់ក្រសួងក្នុងការរៀបចំនគរូបនីយកម្មទំនើប ។
គួរបញ្ជាក់ថា គម្រោងសាងសង់ស្ពានមិត្តភាពកម្ពុជា កូរ៉េនេះ បើតាមមន្ត្រីជាន់ខ្ពស់ក្រសួងសាធារណការនិងដឹកជញ្ជូនបានបង្ហើបប្រាប់អ្នកសារព័ត៌មានកន្លងមកថា អាចនឹងសាងសង់នៅខែមិថុនាឆ្នាំ២០២៥ ដែលគម្រោងនេះ ជាគម្រោងហិរញ្ញប្បទានរបស់ធនាគារអាហរ័ណ-នីហរ័ណ នៃសាធារណរដ្ឋកូរ៉េ ដែលតម្លៃគម្រោងកិច្ចសន្យាមានតម្លៃ ២៣៥លានដុល្លារអាមេរិក និងមានកិច្ចសន្យាសាងសង់មានរយៈពេល៦០ខែ ៕
Account
Security
Favourite Content