សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ក្រដាសប្រាក់រៀលថ្មីៗ ជាពិសេសប្រភេទ ១០០រៀល ៥០០រៀល និង១,០០០រៀល មានតម្រូវការកើនឡើងខ្លាំង ក្នុងអំឡុងពេលបុណ្យកាន់បិណ្ឌ-ភ្ជុំបិណ្ឌរយៈពេល ១៥ថ្ងៃ ខណៈអ្នកស្រាវជ្រាវផ្នែកសេដ្ឋកិច្ច និងសង្គម មើលឃើញថា សកម្មភាពប្តូរប្រាក់ដុល្លារ ឬក្រដាសប្រាក់រៀលចាស់ៗ ទៅជាក្រដាសប្រាក់រៀលថ្មី គឺជាផ្នែកមួយជួយលើកកម្ពស់ការប្រើប្រាស់ប្រាក់រៀលក្នុងស្រុក។
អ្នកជំនាញបានណែនាំថា ដើម្បីធ្វើឱ្យមានសង្គតិភាពលើចរន្តប្រាក់រៀល ជាពិសេសក្រដាសប្រាក់ថ្មីៗ អាជីវករទិញ-លក់ និងប្តូរប្រាក់ គួរមានស្មារតីចូលរួមលើកកម្ពស់ប្រាក់រៀល ដោយមិនគួរគិតកម្រៃជើងសារ ឬកាត់ទឹកច្រើនចំពោះការប្តូរក្រដាសប្រាក់ថ្មីឡើយ។ ប្រសិនបើមានការកាត់ទឹក គួររក្សាទុកក្នុងកម្រិតទាបបំផុត។
ការណែនាំនេះស្របនឹងគោលការណ៍របស់ធនាគារជាតិ ដែលលើកកម្ពស់ការប្រើប្រាស់ប្រាក់រៀល តាមរយៈការប្តូរក្រដាសប្រាក់ថ្មីដោយមិនតម្រូវឱ្យកាត់ទឹក ឬកម្រៃជើងសារ។
អាជីវករទិញ-លក់មាស និងប្តូរប្រាក់នៅហាង សុផល168 ស្ថិតនៅសង្កាត់ទឹកល្អក់២ ខណ្ឌទួលគោក បានប្រាប់បណ្តាញសារព័ត៌មាន AMS ថា ក្នុងរដូវបុណ្យភ្ជុំបិណ្ឌឆ្នាំ ២០២៦ នេះ ហាងរបស់អ្នកស្រីបានត្រៀមក្រដាសប្រាក់ថ្មីប្រភេទ ១០០រៀល និង៥០០រៀល ចំនួន ៣លានរៀល សម្រាប់ប្តូរជូនអតិថិជនដោយមិនកាត់ទឹក ឬគិតកម្រៃជើងសារឡើយ។
អ្នកស្រីបានបញ្ជាក់ថា ការមិនគិតកម្រៃជើងសារនេះ ក៏ជាផ្នែកមួយនៃការទាក់ទាញអតិថិជនឱ្យចូលមកទិញគ្រឿងមាស ឬផ្លាកទីននៅហាងជាប្រចាំ។ ម្យ៉ាងទៀត ការប្តូរក្រដាសប្រាក់ថ្មីៗ ភាគច្រើនគឺសម្រាប់យកទៅប្រើក្នុងពិធីបុណ្យ និងចែកទាន។ ដូច្នេះ អ្នកស្រីយល់ថា ការប្តូរប្រាក់ដោយមិនកាត់ទឹក ក៏ដូចជាការចូលរួមធ្វើបុណ្យទានជាមួយប្រជាពលរដ្ឋខ្មែរផងដែរ។
ចំណែកម្ចាស់ហាងទិញ-លក់មាស និងប្តូរប្រាក់ ហេង សុភុំ នៅខណ្ឌទួលគោក បានឱ្យដឹងថា ហាងរបស់លោកបានបោះដុំ និងរាយក្រដាសប្រាក់ថ្មីៗទៅឱ្យហាងតូចៗមួយចំនួនបន្តទៀត។ សម្រាប់ហាងលោកផ្ទាល់ បានបម្រុងក្រដាសប្រាក់រៀលថ្មីៗចន្លោះពី ២០ ទៅ៣០លានរៀល ក្នុងមួយរដូវកាលបុណ្យកាន់បិណ្ឌ-ភ្ជុំបិណ្ឌ ដោយគិតកម្រៃជើងសារ ឬកាត់ទឹកក្នុងកម្រិតតិចតួចបំផុត។
លោក ហេង សុភុំ បានបញ្ជាក់ថា ហាងរបស់លោកមិនអាចប្តូរក្រដាសប្រាក់ថ្មីសុទ្ធដោយមិនគិតកម្រៃជើងសារតិចតួចនេះបានទេ ដោយសារមុនយកក្រដាសប្រាក់ថ្មីចូលហាង លោកត្រូវចំណាយលើការដឹកជញ្ជូន ការរាប់ផ្ទៀងផ្ទាត់ និងកម្រៃផ្សេងៗ។
លោកបានបន្តថា អតិថិជនរបស់លោក ដែលភាគច្រើនជាកម្មករ-កម្មការិនី នឹងសម្រុកមកប្តូរលុយថ្មីៗកាន់តែច្រើន បន្ទាប់ពីបើកប្រាក់សម្រាប់ទៅលេងស្រុកក្នុងរដូវបុណ្យភ្ជុំបិណ្ឌ នៅចុងសប្តាហ៍ទី២ ខែតុលានេះ។ ដូច្នេះ ក្រដាសប្រាក់ថ្មីប្រមាណ ៣០លានរៀលដែលលោកបានបម្រុងទុក រំពឹងថានឹងប្តូរអស់ ដូចកាលពីឆ្នាំ២០២៥កន្លងទៅ។
លោក ហេង សុភុំ បាននិយាយថា អតិថិជនរបស់លោកភាគច្រើនបើកប្រាក់ជាដុល្លារ ហើយនៅពេលមកប្តូរ ពួកគាត់បាញ់តាម QR ពីប្រាក់ដុល្លារ ដើម្បីដូរយកក្រដាសប្រាក់រៀលថ្មីៗ។ លោកចង់ឃើញចរន្តចាយវាយប្រាក់បែបនេះកាន់តែច្រើន ហើយលោកក៏ចូលរួមប្រាប់អតិថិជនអំពីការលើកកម្ពស់ប្រាក់រៀលតាមរយៈសកម្មភាពចាយវាយរបស់ប្រជាពលរដ្ឋផងដែរ។
ជុំវិញរឿងនេះ លោកបណ្ឌិត ញិល រដ្ឋា អ្នកជំនាញសេដ្ឋកិច្ច បានគូសបញ្ជាក់ថា អាជីវករប្តូរប្រាក់ ដែលលោកចាត់ទុកថាជាឈ្មួញកណ្តាល ស្ទើរតែទាំងអស់បានប្តូរក្រដាសប្រាក់រៀលថ្មីដោយកាត់ទឹកទៅតាមកម្រិតផ្សេងៗគ្នា។ ប៉ុន្តែការកាត់ទឹកនោះ គួរតែស្ថិតក្នុងកម្រិតទាបបំផុត។
លោកបានលើកឡើងថា តាមការសង្កេត ហាងខ្លះបានប្តូរក្រដាសប្រាក់ ១០០រៀលថ្មី ចំនួន ១០ម៉ឺនរៀល ដោយកាត់កម្រៃជើងសារ ១,៥០០រៀល ខណៈហាងខ្លះទៀតបានកាត់រហូតដល់ ២,៥០០រៀល។
លោកបណ្ឌិត ញិល រដ្ឋា បានលើកឡើងថា ទោះបីហាងប្តូរប្រាក់ទាំងអស់មិនទាន់អាចអនុវត្តតាមសេចក្តីណែនាំរបស់ធនាគារជាតិបាន ១០០ភាគរយ ដែលកំណត់ថា ការប្តូរក្រដាសប្រាក់ថ្មីគ្រប់ប្រភេទ មិនត្រូវកាត់ទឹក ឬកម្រៃជើងសារក៏ដោយ ក៏រដ្ឋគួរមានវិធានការរឹតបន្តឹង ជាពិសេសនៅរដូវកាលបុណ្យប្រពៃណីជាតិម្តងៗ។
លោកក៏បានលើកទឹកចិត្តឱ្យប្រជាពលរដ្ឋទៅប្តូរក្រដាសប្រាក់រៀលថ្មីៗនៅតាមរតនាគារជាតិគ្រប់សាខាខេត្ត-ក្រុង ដើម្បីមិនអស់កម្រៃជើងសារ ឬកាត់ទឹក។ ប៉ុន្តែប្រសិនបើប្រជាពលរដ្ឋពិបាក ឬមិនអាចទៅប្តូរនៅតាមរតនាគារជាតិ ដោយសារផ្ទះស្ថិតនៅឆ្ងាយ និងពិបាកធ្វើដំណើរ អ្នកជំនាញរូបនេះថា ម្ចាស់ហាងប្តូរប្រាក់នានា ក៏គួរពិចារណាកាត់កម្រៃពីអតិថិជនរបស់ខ្លួនក្នុងកម្រិតទាបបំផុត ដើម្បីចូលរួមលើកកម្ពស់ប្រាក់រៀល ដោយផ្អែកលើពាក្យស្លោក «ខ្មែរ ស្រឡាញ់ប្រាក់រៀល»៕
Account
Security
Favourite Content