ភ្នំពេញ៖ ដើម្បីអបអរសាទរ​ និងលើកកម្ពស់រសជាតិអាហារបែប “Glocal” (ការរួមបញ្ចូលគ្នារវាងរសជាតិសកល និងរសជាតិក្នុងស្រុក) កាលពីល្ងាចថ្ងៃទី២ ខែមេសា ឆ្នាំ២០២៦ ភោជនីយដ្ឋាន Yi Sang ដែលទើបនឹងសម្ពោធថ្មីៗស្ថិតនៅក្នុងអាកាសយានដ្ឋានអន្តរជាតិតេជោ (KTI) នេះ បានរៀបចំកម្មវិធីពិសាអាហារពេលល្ងាចដ៏ពិសេស គឺជាការផ្សារភ្ជាប់គ្នារវាងសិល្បៈចម្អិនម្ហូបបែបកាតាំងបុរាណ និងកេរដំណែលកសិកម្មដ៏ល្បីល្បាញលើពិភពលោករបស់ប្រទេសកម្ពុជា។

តាមរយៈកិច្ចសហការជាមួយ La Plantation ដែលជាសហគ្រាសឈ្នះពានរង្វាន់មកពីខេត្តកំពត ព្រឹត្តិការណ៍នេះបានបង្ហាញនូវមុខម្ហូប “ឌីមសាំ” (Dim Sum) កែច្នៃយ៉ាងសម្រិតសម្រាំងដោយបញ្ចូលនូវម្រេចកំពតដែលមានម៉ាកសម្គាល់ភូមិសាស្ត្រ (PGI) និងជាគ្រឿងទេសក្នុងស្រុកជាមួយស្រាទំពាំងបាយជូរអន្តរជាតិគុណភាពខ្ពស់ ។

• វិថីឆ្ពោះទៅកាន់ឧត្តមភាពនៃកម្ពុជា
  ក្នុងពេលដែលអាកាសយានដ្ឋានអន្តរជាតិតេជោ ជាទីតាំងនៃមជ្ឈមណ្ឌលដ៏សំខាន់ កិច្ចសហការនេះដើរតួជាវេទិកាយុទ្ធសាស្ត្រក្នុងការណែនាំអ្នកធ្វើដំណើរអន្តរជាតិឱ្យស្គាល់ពីភាពសំបូរបែបនៃទឹកដីកម្ពុជា។ ព្រឹត្តិការណ៍នេះបានសង្កត់ធ្ងន់លើសារៈសំខាន់នៃ “កសិទេសចរណ៍” ដោយបង្ហាញថាផលិតផលក្នុងស្រុកអាចត្រូវបានលើកកម្ពស់ទៅជាអាហារកម្រិតខ្ពស់។
  “គោលដៅរបស់យើងគឺចង់ឱ្យប្រាកដថា ដំណើរឆ្លងកាត់ប្រទេសកម្ពុជា ចាប់ផ្តើមជាមូយនឹងអាហារ”។ នេះជាការលើកឡើងរបស់ លោក លូ ម៉េង សហស្ថាបនិក និងជាអគ្គនាយកក្រុមហ៊ុន Almond Hospitality Group។
  លោក លូ ម៉េង បានបន្តថា៖​ “តាមរយៈការបញ្ជ្រាបគ្រឿងទេសលំដាប់ពិភពលោករបស់ La Plantation ជាមួយ មរតកម្ហូបកាតាំងរបស់ Yi Sangបានបង្កើតជាកិច្ចសន្ទនាមួយរវាងវប្បធម៌ពីរខុសគ្នា”។ 
  លោកអគ្គនាយកក្រុមហ៊ុន Almond Hospitality Group បានលើកឡើងថា៖គំនិតផ្ដួចផ្ដើមសហការរបស់ ភោជនីយដ្ឋាន Yi Sang និងLa Plantation នេះជាការលើកកម្ពស់គ្រឿងផ្សំក្នុងស្រុក បន្ទាប់ពីភាពជោគជ័យនាពេលថ្មីៗនេះ ក្នុងការលើកតម្កើងតម្លៃ “អំបុក” (អំបុក ដែលបានដាល់តាមបែបប្រពៃណី)។ ខណៈពេលដែលអាកាសយានដ្ឋានអន្តរជាតិតេជោ បន្តពង្រីកវិសាលភាពពាណិជ្ជកម្មរបស់ខ្លួន កិច្ចសហការបែបនេះបានបង្ហាញពីសញ្ញានៃយុគសម័យថ្មីមួយ ដែលអាកាសយានដ្ឋានមិនមែនត្រឹមតែជាកន្លែងឆ្លងកាត់ប៉ុណ្ណោះទេ ប៉ុន្តែគឺជាគោលដៅសម្រាប់ការស្វែងយល់ពីវប្បធម៌ និងរសជាតិម្ហូបអាហារដ៏ពិតប្រាកដ។
• សហថាមពលនៃរសជាតិ៖ ឌីមសាំ និងគ្រឿងទេសកំពត
  នៅក្នុងពិធីភ្លក់អាហារបែបច្នៃប្រឌិតខ្ពស់ថ្មីនិងរសជាតិឆ្ងាញ់ពិសារសជាតិបែបបុរាណអមដោយបរិយាកាសស្រស់ស្រាយនៅអាកាសយានដ្ឋាននោះ មុខម្ហូបច្នៃប្រឌិតថ្មីៗដោយចុងភៅលំដាប់អន្តរជាតិដែលយកមកបម្រើភ្ញៀវកិត្តិយសរួមមាន៖
• មុខម្ហូបទី ១៖ ហាកាវម្រេចខ្ចី (Green Salted Pepper Har Gow) – ការច្នៃប្រឌិត ហាកាវបង្គា ដោយប្រើគ្រាប់ម្រេចខ្ចីពី La Plantation ដែលផ្តល់នូវក្លិនឈ្ងុយបែបឱសថ និងរសជាតិស្រស់នៃសាច់បង្គារ ។
• មុខម្ហូបទី ២៖ ស៊ាវឡុងប៉ាវម្រេចស (White Pepper Xiao Long Bao) – នំប៉ាវទឹកស៊ុបបែបបុរាណ ត្រូវបានបង្កើនរសជាតិឈ្ងុយភាយដូចក្លិនផ្កាម្រេចសដែលធ្វើឱ្យទឹកស៊ុបសាច់ជ្រូកកាន់តែមានរសជាតិឆ្ងាញ់ជាប់ចិត្ត។
• មុខម្ហូបទី ៣៖ នំឆៃថាវម្រេចក្រហម (Red Pepper Radish Cake) – មុខម្ហូបចៀនដ៏ពេញនិយមដែលមានរសជាតិដូចជាផ្លែឈើ និងរសនៃម្រេចក្រហម ផ្តល់នូវភាពកក់ក្តៅដិតជាប់មាត់ ដែលស័ក្តិសមបំផុតជាមួយស្រា Sparkling សម្រាប់អាហារពេលនេះ។
  នៅក្នុងមុខម្ហូបទាំងនេះ សុទ្ធតែប្រើប្រាស់ម្រេចកំពតដែលជាផលិតផលសម្គាល់ភូមិសាស្ត្រ (PGI) និងជាជាបេះដូងនៃព្រឹត្តិការណ៍នេះ។ ម្រេចកំពតជាផលិតផលកម្ពុជាដំបូងគេដែលទទួលបានឋានៈ PGI ពីស្តង់ដារសហភាពអឺរ៉ុបនៃវិស័យកសិកម្មរបស់កម្ពុជា។
• ការផ្សារភ្ជាប់កសិកម្មទៅកាន់អ្នកធ្វើដំណើរទូទាំងពិភពលោក
  តំណាងក្រុមហ៊ុនLa Plantation បានថ្លែងថា៖ La Plantation បានដើរតួនាទីយ៉ាងសំខាន់ក្នុងការផលិតគ្រឿងទេសប្រកបដោយចីរភាពក្នុងខេត្តកំពត។ ភាពជាដៃគូជាមួយ Yi Sang ដែលជាម៉ាកយីហោតំណាងឱ្យស្ដង់ដានៃសិល្បៈចម្អិនម្ហូប គឺជាជំហានដ៏សំខាន់ក្នុងការផ្សព្វផ្សាយ “Terroir” (លក្ខណៈពិសេសនៃទឹកដីកម្ពុជា) ទៅកាន់អ្នកធ្វើដំណើរដែលស្រឡាញ់អាហារ និងថ្នាក់ដឹកនាំធុរកិច្ចមកពីជុំវិញពិភពលោក។
  ខណៈពេលដែលអាកាសយានដ្ឋានអន្តរជាតិតេជោ បន្តពង្រីកវិសាលភាពពាណិជ្ជកម្មរបស់ខ្លួន កិច្ចសហការបែបនេះបានបង្ហាញពីសញ្ញានៃយុគសម័យថ្មីមួយ ដែលអាកាសយានដ្ឋានមិនមែនត្រឹមតែជាកន្លែងឆ្លងកាត់ប៉ុណ្ណោះទេ ប៉ុន្តែគឺជាគោលដៅសម្រាប់ការស្វែងយល់ពីវប្បធម៌ និងរសជាតិម្ហូបអាហារដ៏ពិតប្រាកដ។
  ព្រឹត្តិការណ៍នេះមានការចូលរួមយ៉ាងសកម្មពីភាគីពាក់ព័ន្ធក្នុងវិស័យអាកាសចរណ៍ និងទេសចរណ៍។ តំណាងមកពីក្រុមហ៊ុនអាកាសចរណ៍ធំៗដែលកំពុងប្រតិបត្តិការនៅអាកាសយានដ្ឋានអន្តរជាតិតេជោ រួមមាន Air Cambodia, Cambodia Airways, AirAsia, និង Singapore Airlines រួមជាមួយក្រុមហ៊ុនគ្រប់គ្រងគោលដៅទេសចរណ៍ (DMCs) បានចូលរួមបទពិសោធន៍នៃរសជាតិច្នៃប្រឌិតនេះ។

តាមរយៈការចូលរួមជាមួយដៃគូអាកាសចរណ៍ និងភ្នាក់ងារទេសចរណ៍ Yi Sang និង La Plantation កំពុងកំណត់ស្តង់ដារថ្មីសម្រាប់បដិសណ្ឋារកិច្ចនៅអាកាសយានដ្ឋាន ដើម្បីធានាថាឧត្តមភាពកសិកម្មរបស់កម្ពុជានឹងបន្សល់ទុកនូវចំណាប់អារម្មណ៍មិនអាចបំភ្លេចបានដល់អ្នកធ្វើដំណើរគ្រប់រូប។
ឯកឧត្តម គុជ បញ្ញាសា រដ្ឋលេខាធិការក្រសួងទេសចរណ៍ បានថ្លែងថា៖ព្រឹត្តិការណ៍នេះ បង្ហាញពីភាពជាដៃគូដ៏សំខាន់រវាងវិស័យសាធារណៈ និងឯកជន ក្នុងការលើកកម្ពស់មុខមាត់កម្ពុជា និង វិស័យម្ហូបអាហារដ៏សម្បូរបែប។
ឯកឧត្តម បានមានប្រសាសន៍ថា៖ការជួបជុំនេះឆ្លុះបញ្ចាំងពីសារៈសំខាន់ដែលកំពុងកើនឡើងនៃ វិស័យម្ហូបអាហារ ដែលជាសសរស្តម្ភដ៏សំខាន់សម្រាប់ការអភិវឌ្ឍវិស័យទេសចរណ៍កម្ពុជា។ កម្ពុជាមិនត្រឹមតែជាគោលដៅទេសចរណ៍នៃបេតិកភណ្ឌវប្បធម៌ និងសម្រស់ធម្មជាតិប៉ុណ្ណោះទេ ប៉ុន្តែថែមទាំងជាឋានសួគ៌ដែលកំពុងលេចធ្លោសម្រាប់បទពិសោធន៍ម្ហូបអាហារកម្រិតខ្ពស់ ដែលផ្ដល់ភាពរីករាយដល់ទាំងភ្ញៀវក្នុងស្រុក និងភ្ញៀវអន្តរជាតិ។

ព្រឹត្តិការណ៍នាថ្ងៃនេះ គឺមានអត្ថន័យលើសពីបទពិសោធន៍នៃការពិសាអាហារ។ វាគឺជាការបង្ហាញនូវឆន្ទៈយ៉ាងច្បាស់លាស់មួយថា កម្ពុជាបានត្រៀមខ្លួនរួចជាស្រេចក្នុងការបង្ហាញខ្លួន មិនត្រឹមតែជាគោលដៅទេសចរណ៍នៃបេតិកភណ្ឌ និងវប្បធម៌ប៉ុណ្ណោះទេ ប៉ុន្តែក៏ជាគោលដៅនៃរសជាតិ ភាពច្នៃប្រឌិត និងការភ្ជាប់ទំនាក់ទំនងជាសកលផងដែរ។
ដូចដែលបានឆ្លុះបញ្ចាំងតាមរយៈកិច្ចសហការដ៏វិសេសវិសាលនេះ ដែលជាការរួមបញ្ចូលគ្នារវាងសិល្បៈនៃការចម្អិនអាហារបែបក្វាងទុង (Cantonese) ជាមួយនឹងភាពសម្បូរបែបនៃគ្រឿងផ្សំរបស់កម្ពុជា ដូចជាម្រេចកំពតជាដើម យើងកំពុងឃើញនូវអំណាចនៃវិស័យម្ហូបអាហារ ក្នុងការរៀបរាប់អំពីដំណើររឿងនៃជាតិសាសន៍របស់យើង។

ឯកឧត្តម គឹម មិនា នាយកប្រតិបត្តិក្រុមប្រឹក្សាភិបាលទីផ្សារនិងផ្សព្វផ្សាយទេសចរណ៍កម្ពុជា បានមានប្រសាសន៍ថា៖ព្រឹត្តិការណ៍នាថ្ងៃនេះ គឺមានអត្ថន័យលើសពីបទពិសោធន៍នៃការពិសាអាហារ។ វាគឺជាការបង្ហាញនូវឆន្ទៈយ៉ាងច្បាស់លាស់មួយថា កម្ពុជាបានត្រៀមខ្លួនរួចជាស្រេចក្នុងការបង្ហាញខ្លួន មិនត្រឹមតែជាគោលដៅទេសចរណ៍នៃបេតិកភណ្ឌ និងវប្បធម៌ប៉ុណ្ណោះទេ ប៉ុន្តែក៏ជាគោលដៅនៃរសជាតិ ភាពច្នៃប្រឌិត និងការភ្ជាប់ទំនាក់ទំនងជាសកលផងដែរ។តាមរយៈកិច្ចសហការដ៏វិសេសវិសាលនេះ ជាការរួមបញ្ចូលគ្នារវាងសិល្បៈនៃការចម្អិនអាហារបែបកាតាំង ជាមួយនឹងភាពសម្បូរបែបនៃគ្រឿងផ្សំរបស់កម្ពុជា ដូចជាម្រេចកំពតជាដើម យើងកំពុងឃើញនូវអំណាចនៃវិស័យម្ហូបអាហារ ក្នុងការរៀបរាប់អំពីដំណើររឿងនៃជាតិសាសន៍របស់យើង។
Yi Sang : ជាម៉ាកយីហោឈានមុខគេរបស់ Almond Hospitality ដែលល្បីល្បាញខាងម្ហូបកាតាំង និងការប្តេជ្ញាចិត្តក្នុងការរួមបញ្ចូលរសជាតិខ្មែរ និងការទទួលខុសត្រូវសង្គម។
La Plantation : មានទីតាំងនៅខេត្តកំពត ជាសហគ្រាសដែលខិតខំថែរក្សា និងលើកកម្ពស់ម្រេចកំពត និងគ្រឿងទេសក្នុងស្រុកតាមរយៈការដាំដុះតាមបែបសរីរាង្គ និងកសិទេសចរណ៍៕