សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គិតត្រឹមថ្ងៃទី២៣ ខែមិថុនា ឆ្នាំ២០២៥ ក្រសួងរៀបចំដែនដី តាមរយៈមន្ទីររៀបចំដែនដី នគរូបនីយកម្ម សំណង់ និងសុរិយោដី រាជធានីភ្នំពេញ សម្រេចបានការចុះបញ្ជីដីរដ្ឋនៅរាជធានីភ្នំពេញ សរុបចំនួន ១ ០៥៩ក្បាលដីហើយ ដែលស្មើនឹងទំហំ ១ ៧៦៣,៤៣ហិកតា ។ នេះបើតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ ផ្សព្វផ្សាយនៅថ្ងៃទី ២៤ ខែមិថុនា ឆ្នាំ ២០២៥កន្លងទៅនេះ។
សូមជម្រាបដែរថា យោងតាមអនុក្រឹត្យរបស់រាជរដ្ឋាភិបាល លេខ. ៣២១ អនក្រ.បក ចុះថ្ងៃទី០២ ខែវិច្ចិកា ឆ្នាំ២០២៣ ក្រោមហត្ថលាខារបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានកំណត់វាក្យសព្ទសំខាន់ៗសម្រាប់និយមន័យដីរដ្ឋ ដោយក្នុងវាក្យសព្ទនោះ «ដីរដ្ឋ» គឺសំដៅដីសាធារណៈរបស់រដ្ឋ និងរបស់នីតិបុគ្គលសាធារណៈដទៃទៀត ព្រមទាំងដីឯកជនរបស់រដ្ឋ និងរបស់នីតិបុគ្គលសាធារណៈដទៃទៀត ហើយដីសាធារណៈរបស់រដ្ឋ គឺសំដៅដល់ដីដែលដាក់ឱ្យប្រើប្រាស់ជាសាធារណៈតាមស្ថានភាពពីកំណើត ឬក្រោយពីបានរៀបចំរួច ឬដីដែលមានជាប់ផលប្រយោជន៍ជាសាធារណៈ ឬជាដីដែលមានការរៀបចំពិសេសសម្រាប់ប្រយោជន៍សាធារណៈទូទៅ ។
នៅក្នុងអនុក្រឹត្យនោះ ក៏បានកំណត់អំពីលក្ខខណ្ឌ និងនីតិវិធីនៃការចុះបញ្ជីដីរដ្ឋ តាមរយៈការធ្វើអត្តសញ្ញាណកម្ម ការធ្វើផែនទី និងការធ្វើចំណាត់ថ្នាក់ដីរដ្ឋ ក្នុងគោលបំណង ដើម្បីធានាការពារកម្មសិទ្ធិ និងសិទ្ធិផ្សេងទៀតលើដីរបស់រដ្ឋ ។
យោងតាមមាត្រ១៥ នៃអនុក្រឹត្យស្ដីពីលក្ខខណ្ឌ និងនីតិវិធីនៃការចុះបញ្ជីដីរដ្ឋ របស់រាជរដ្ឋាភិបាលកម្ពុជា បានបង្ហាញពីដំណើរការនៃការចុះបញ្ជីដីរដ្ឋ ដោយមាន ៤ដំណាក់កាល រួមមាន ៖ ១ ការបញ្ជាក់ពីកម្មសិទ្ធិរបស់រដ្ឋ និងរបស់នីតិបុគ្គលសាធារណៈដទៃទៀតលើដី ។ ២. ការកំណត់ព្រំប្រទល់ច្បាស់លាស់លើដី ។ ៣. ការស្វែងរកការឯកភាពគ្នាពីគ្រប់ភាគីដែលពាក់ព័ន្ធ និង ៤. ការចុះបញ្ជីក្នុងសៀវភៅគោលបញ្ជីដីធ្លី ។
ក្នុងមាត្រាដដែលនេះបញ្ជាក់ផងដែរថា ក្រសួង ស្ថាប័ន ឬរដ្ឋបាលថ្នាក់ក្រោមជាតិ ដែលអះអាងថាក្បាលដីរដ្ឋណាមួយជាដីសាធារណៈរបស់រដ្ឋ ឬរបស់នីតិបុគ្គលសាធារណៈដទៃទៀត ត្រូវផ្ដល់ឯកសារនិងភស្តុតាងផ្សេងៗទៀតដែលបង្ហាញថា ដីនោះត្រូវចុះបញ្ជីជាដីសាធារណៈរបស់រដ្ឋឬរបស់នីតិបុគ្គលសាធារណៈដទៃ ។ ដីរដ្ឋ ដែលមិនបានបង្ហាញឱ្យឃើញថាមានចរិតបម្រើប្រយោជន៍សាធារណៈ ត្រូវចុះបញ្ជីជាដីឯកជនរបស់រដ្ឋ ឬរបស់នីតិបុគ្គលសាធារណៈដទៃទៀត ។
នៅក្នុងមាត្រាទី១៦នៃអនុក្រឹត្យស្ដីពីលក្ខខណ្ឌ និងនីតិវិធីនៃការចុះបញ្ជីដីរដ្ឋ ក៏បានបង្ហាញថា នៅក្នុងការចុះបញ្ជីដីមានលក្ខណៈជាប្រព័ន្ធលើកដំបូង ដីរដ្ឋនៅក្នុងតំបន់វិនិច្ឆ័យត្រូវបានកំណត់ព្រំប្រទល់ ហើយដីនោះត្រូវបានចុះក្នុងសៀវភៅគោលបញ្ជីដីធ្លីថាជាដីរដ្ឋ ។
ប្រភេទជាដីសាធារណៈ ឬជាដីឯកជនរបស់រដ្ឋ ឬរបស់នីតិបុគ្គលសាធារណៈដទៃទៀត ត្រូវបានចុះបញ្ជីប្រសិនបើការធ្វើអត្តសញ្ញាណកម្ម និងការធ្វើផែនទីដីរដ្ឋ ត្រូវបានធ្វើចប់មុនការចុះបញ្ជីដោយគ្មានការអះអាងណាមួយរបស់ក្រសួង ស្ថាប័ន ឬរដ្ឋបាលថ្នាក់ក្រោមជាតិដែលមិនស្របគ្នា ឬទោះបីជាមិនទាន់មានការធ្វើអត្តសញ្ញាណកម្ម និងការធ្វើផែនទីដីរដ្ឋ ប៉ុន្តែមានព័ត៌មានដែលអាចធ្វើការសន្និដ្ឋានបានអំពីប្រភេទដី និងប្រភេទប្រើប្រាស់ដីបច្ចុប្បន្ននៃដីនោះ ហើយក្រសួងស្ថាប័ន និងរដ្ឋបាលថ្នាក់ក្រោមជាតិទាំងឡាយក៏មានការឯកភាពមតិគ្នាលើប្រភេទដីនោះជាដីសាធារណៈ ឬជាដីឯកជនរបស់រដ្ឋ ឬរបស់នីតិបុគ្គលសាធារណៈដទៃទៀត ៕
Account
Security
Favourite Content