បរទេស ៖ ឥណ្ឌា បានសាកល្បងបណ្ដុះពពកជាលើកដំបូង​លើរដ្ឋធានីញូវដេលីដែលពោរពេញដោយផ្សែងអ័ព្ទខ្មៅ ដើម្បីបង្កើតភ្លៀងសិប្បនិម្មិត និងលាងសម្អាតមេរោគចេញពីខ្យល់ពុល នេះបើយោងតាមការរាយការណ៍ពីសារព័ត៌មាន CNA ។

អាជ្ញាធរទីក្រុងញូវដេលី បានធ្វើការជាមួយវិទ្យាស្ថានបច្ចេកវិទ្យាឥណ្ឌា Kanpur សម្រាប់ការបណ្តុះពពកសាកល្បងនៅរសៀលថ្ងៃព្រហស្បតិ៍ សប្ដាហ៍កន្លងទៅ ដោយប្រើយន្តហោះធុនស្រាល Cessna។ យ៉ាងណាមិញ គេ​នៅមិន​ទាន់​ដឹង​ច្បាស់​ទេថា តើ​សារធាតុ​គីមី​អ្វីខ្លះ​ត្រូវ​បាន​គេ​ប្រើ​ក្នុង​ការ​ធ្វើ​តេស្តនៃការបណ្តុះពពក ​ដើម្បី​បង្កើត​ទឹក​ភ្លៀង ?

លោក Manjinder Singh Sirsa ប្រធាននាយកដ្ឋានបរិស្ថានទីក្រុង បាននិយាយនៅក្នុងសេចក្តីថ្លែងការណ៍មួយថា ការហោះហើរសាកល្បងត្រូវបានធ្វើឡើងរួចរាល់ ដើម្បីត្រួតពិនិត្យសមត្ថភាពនៃដុំពពកក្នុងការត្រៀមខ្លួន និងគ្រប់គ្រងរបស់យន្តហោះ ក៏ដូចជាការវាយតម្លៃសមត្ថភាពនៃឧបករណ៍ និងការសម្របសម្រួលក្នុងចំណោមភ្នាក់ងារពាក់ព័ន្ធទាំងអស់។ ទន្ទឹមនឹងនេះ នាយករដ្ឋមន្រ្ដីរបស់ទីក្រុងញូវដេលីលោក Rekha Gupta បបានង្ហាញក្តីសង្ឃឹមថា ប្រសិនបើលក្ខខណ្ឌអំណោយផល ទីក្រុងនឹងទទួលបានភ្លៀងសិប្បនិម្មិតជាលើកដំបូងនៅថ្ងៃទី២៩ ខែតុលាខាងមុខនេះ។

ការបណ្ដុះពពក គឺជាការបាញ់អំបិល ឬសារធាតុគីមីផ្សេងទៀតចូលទៅក្នុងពពកដោយការប្រើប្រាស់យន្តហោះដើម្បីបង្កជាភ្លៀងសិប្បនិម្មិត។ វិធីសាស្ត្របណ្ដុះពពកដើម្បីបង្កើតភ្លៀងសិប្បនិម្មិតត្រូវបានបង្កើត​ឡើង​ក្នុង​ទសវត្សរ៍​ឆ្នាំ១៩៤០ ដែលត្រូវបានអនុវត្តដោយប្រទេស​​ជា​ច្រើន​ ដើម្បី​កាត់​បន្ថយ​គ្រោះ​រាំង​ស្ងួត និងប្រយុទ្ធប្រឆាំង​នឹង​ភ្លើង​ឆេះ​ព្រៃជាដើម។

គួរបញ្ជាក់ដែរថា ទីក្រុងញូវដេលី មានចំនួនប្រជាជនសរុបជាង ៣០ លាននាក់កំពុងរស់នៅ និងជាប់ចំណាត់ថ្នាក់ជារដ្ឋធានីដែលមានការបំពុលខ្យល់ខ្លាំងបំផុតរបស់ពិភពលោក ជាមួយនឹងផ្សែងអ័ព្ទយ៉ាងធ្ងន់ធ្ងរគ្របដណ្តប់ពេញមេឃរាល់រដូវរងា។ ជាតិពុលនៅក្នុងខ្យល់ត្រជាក់បង្កើតជាការបំភាយដ៏គ្រោះថ្នាក់ គួបផ្សំជាមួយនឹងការដុតដំណាំ ការបំពុលពីរោងចក្រ និងចរាចរណ៍នៃយានយន្ត។ លើសពីនេះ ជាតិពុលមានកម្រិតខ្ពស់ដល់ទៅ PM2.5 ដែលភាគល្អិតៗនៅក្នុងខ្យល់បង្កជាមេរោគមហារីកតូចល្មមអាចចូលទៅក្នុងចរន្តឈាម ជាពិសេស អត្រាគ្រោះថ្នាក់អាចកើនឡើងជាងការកំណត់របស់អង្គការសហប្រជាជាតិទៅលើសុខភាពប្រចាំថ្ងៃរបស់ប្រជាជនទូទៅ។ មិនត្រឹមតែប៉ុណ្ណោះ ការបំពុលកាន់តែកើនឡើងខ្ពស់នៅក្នុងសប្តាហ៍កន្លងទៅនេះបន្ទាប់ពីមានការបាញ់កាំជ្រួចជាច្រើនថ្ងៃដើម្បីប្រារព្ធពិធីបុណ្យ Diwali ដែលជាពិធីបុណ្យរបស់សាសនាហិណ្ឌូ។ អ្នកវិទ្យាសាស្ត្របានព្រមានថា តំបន់បេតិកភណ្ឌពិភពលោករបស់អង្គការយូណេស្កូក៏កំពុងទទួលរងនូវហានិភ័យ និងប៉ះពាល់ដល់ទ្រង់ទ្រាយដើមជាបន្តបន្ទាប់ដោយសារតែខ្យល់ពុល៕