ភ្នំពេញ ៖ សម្រាប់ឆ្នាំ ២០២៣ សេដ្ឋកិច្ចកម្ពុជារំពឹងថានឹងបន្តនិន្នាការកើនឡើងក្នុងរង្វង់ ៥,៦% ប៉ុន្តែសន្ទុះកំណើនមានការថមថយជាងការរំពឹងទុកបន្តិច ដោយសារភាពមិនប្រាកដប្រជាពីក្រៅប្រទេស ស្របពេលដែលស្ថានភាពសេដ្ឋកិច្ចសកល និងតំបន់កាន់តែមានភាពយ៉ាប់យ៉ឺនទៅៗ។ នេះបើយោងតាមសេចក្តីសង្ខេបស្តីពីស្ថានភាពម៉ាក្រូសេដ្ឋកិច្ច ឆ្នាំ២០២២-២០២៣ របស់ក្រសួងសេដ្ឋកិច្ច និងហិរញ្ញវត្ថុ ដែលបានចេញផ្សាយនៅថ្ងៃទី ២៥ ខែមករា ឆ្នាំ២០២៣។

របាយការណ៍សេដ្ឋកិច្ចនេះត្រូវបានបង្ហាញក្នុងវេទិកាសាធារណៈស្តីពីគ្រប់គ្រងម៉ាក្រូសេដ្ឋកិច្ច និងច្បាប់ស្តីពីហិរញ្ញវត្ថុ សម្រាប់ការគ្រប់គ្រងឆ្នាំ២០២៣ ដែលដឹកនាំដោយឯកឧត្តម វង្សី វិស្សុត រដ្ឋមន្រ្តីប្រតិភូអមនាយករដ្ឋមន្រ្តី និងជារដ្ឋលេខាធិការប្រចាំការនៃក្រសួងសេដ្ឋកិច្ច និងហិរញ្ញវត្ថុ នៅថ្ងៃទី២៥ ខែមករា ឆ្នាំ២០២៣ នៅសណ្ឋាគារសូហ្វីតែល ភូគីត្រាភ្នំពេញ។

របាយការណ៍បានឱ្យដឹងថា ទស្សនវិស័យសេដ្ឋកិច្ចកម្ពុជាឆ្នាំ២០២៣ បាននិងកំពុងប្រឈមនឹងភាពមិនប្រាកដប្រជាខ្ពស់។ ផលវិបាកនៃសង្គ្រាមរុស្ស៊ី-អ៊ុយក្រែន បាននិងកំពុងបន្តអូសបន្លាយ ហើយផលប៉ះពាល់ កាន់តែមានភាពធ្ងន់ធ្ងរ ស្របពេលដែលស្ថានភាពសេដ្ឋកិច្ចសកល និងតំបន់កាន់តែមានភាពយ៉ាប់យ៉ឺនទៅៗ បន្ទាប់ពីបាន និងកំពុងឆ្លើយតប និងទប់ទល់ជាមួយផលវិបាកនេះអស់រយៈពេលជិត ១ ឆ្នាំ គួបផ្សំនឹងស្លាកស្នាមដែលបន្សល់ពីវិបត្តិជំងឺកូវីដ-១៩។

សម្រាប់ឆ្នាំ២០២៣ សេដ្ឋកិច្ចកម្ពុជារំពឹងថានឹងបន្តនិន្នាការកើនឡើងក្នុងរង្វង់ ៥,៦% ប៉ុន្តែសន្ទុះកំណើនមានការថមថយជាងការរំពឹងទុកបន្តិច។ ក្នុងនោះ វិស័យបម្រើការនាំចេញ ជាពិសេស វិស័យកាត់ដេរ រំពឹងថាមានកំណើនថមថយ ប៉ុន្តែនៅតែអាចរក្សាបានកំណើនវិជ្ជមានក្នុងរង្វង់ ៥,៥% ដោយសារការរំពឹងទុកការថមថយតម្រូវការខាងក្រៅ ជាពិសេសទីផ្សារអឺរ៉ុប ខណៈដែលវិស័យកម្មន្តសាលមិនមែនកាត់ដេរ រំពឹងថានៅបន្តកំណើនល្អក្នុងរង្វង់ ១១,៧% ដោយសក្តានុពលខ្ពស់នៃផលិតកម្មបម្រើការនាំចេញមួយចំនួន (គ្រឿងសង្ហារិមសូឡា និងគ្រឿងបង្គុំអេឡិចត្រូនិកជាដើម) និងការបន្តនិន្នាការល្អប្រសើរនៃផលិតកម្មបម្រើឱ្យតម្រូវការក្នុងស្រុក ជាពិសេស ផលិតកម្មម្ហូបអាហារ និងភេសជ្ជៈ។

វិស័យសំណង់ និងអចលនទ្រព្យ រំពឹងថានឹងបន្តកើនឡើង ប៉ុន្តែក្នុងល្បឿនយឺតក្នុងរង្វង់ ១,១% និង ១២% រៀងគ្នា ដោយសារការរំពឹងទុកនូវការងើបឡើងវិញយឺតនៃរំហូរវិនិយោគទុនពីបរទេស ខណៈដែលវិស័យនេះរំពឹងថានឹងបន្តទ្រទ្រង់ដោយការវិនិយោគ និងតម្រូវការក្នុងស្រុក (ផ្នែកលំនៅឋាន)និងនិន្នាការនៃសកម្មភាពសំណង់បម្រើឱ្យឧស្សាហកម្ម និងសេវាកម្មក្នុងស្រុក។ វិស័យកសិកម្ម រំពឹងថានៅបន្តរក្សាបាននិន្នាការល្អប្រសើរក្នុងរង្វង់ ១,១% ដែលទ្រទ្រង់ដោយអនុវិស័យដំណាំ រួមមាន ស្រូវ និងដំណាំ ផ្សេងទៀត (ដំឡូងមី និងពោត), និងអនុវិស័យចិញ្ចឹមសត្វ ជាពិសេសផលិតកម្មជ្រូក។

វិស័យទេសចរណ៍ (សណ្ឋាគារ និងភោជនីយដ្ឋាន) រំពឹងថានៅបន្តនិន្នាការកើនឡើង ក្នុងរង្វង់ ៣២,៧% ដោយសារការបន្តងើបឡើងនៃរំហូរមនុស្សទាំងក្នុង និងក្រៅតំបន់។ ការដកចេញគោលនយោបាយគ្មានកូវីដរបស់ចិន គួបផ្សំនឹងការប្រារព្ធព្រឹត្តិការណ៍ស៊ីហ្គេម នឹងផ្តល់ភាពអំណោយផលដល់វិស័យទេសចរណ៍សម្រាប់ឆ្នាំ ២០២៣ នេះ។

ទន្ទឹមនេះ ទេសចរជាតិក៏រំពឹងថានឹងបន្តនិន្នាការកើនឡើង ដោយសារភាពកាន់តែល្អប្រសើរនៃសេវាកម្មទេសចរណ៍ និងកន្លែងកំសាន្ត ស្របពេលដែលហេដ្ឋារចនាសម្ព័ន្ធ និងមធ្យោបាយធ្វើដំណើរក៏កាន់តែមានភាពងាយស្រួលជាងមុន។ ជាលទ្ធផល, កម្ពុជារំពឹងថានឹងទទួលបានភ្ញៀវទេសចរអន្តរជាតិប្រមាណ ៤,៣ លាននាក់ និងទេសចរជាតិប្រមាណ ១៤ លាននាក់ក្នុងឆ្នាំ ២០២៣។ ទន្ទឹមនេះ វិស័យលក់ដុំ-រាយក៏រំពឹងថា នឹងបន្តនិន្នាការល្អប្រសើរ ពោលមានកំណើនក្នុងរង្វង់ ៦,៥% ដោយសារការបន្តនិន្នាការនៃការកើនឡើង សកម្មភាពចាយវាយក្នុងស្រុក និងកំណើនសកម្មភាពទេសចរណ៍។ សូមបញ្ជាក់ផងដែរថា កាលពីដើមឡើយ សេដ្ឋកិច្ចកម្ពុជា ត្រូវបានព្យាករថានឹងសម្រេចបានកំណើនក្នុងរង្វង់ 6,6% ក្នុងឆ្នាំ 2023 នេះ ដោយសារការបន្តនូវភាពល្អប្រសើរនៃតម្រូវការខាងក្រៅ ស្របពេលដែលសកម្មភាពសេដ្ឋកិច្ចក្នុងស្រុក បានវិលត្រឡប់មករកប្រក្រតីភាពវិញ ប៉ុន្ដែតាមការវាយតម្លៃចុងក្រោយ សេដ្ឋកិច្ចកម្ពុជាព្យាករថានឹងមានកំណើនត្រឹមតែ ៥,៦ ភាគរយប៉ុណ្ណោះ ជាតួលេខថ្មីដែលសម្ដេចតេជោ ហ៊ុន សែន នាយករដ្ឋមន្រ្ដីនៃកម្ពុជា អនុម័តឲ្យប្រើប្រាស់ និងជាតួលេខប្រាកដនិយមជាងគេ ព្រមទាំងជាតួលេខប្រហាក់ប្រហែលនឹងការវាយតម្លៃ របស់ស្ថាប័នអន្ដរជាតិធំៗផងដែរ៕