សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ប្រជាពលរដ្ឋដែលរស់នៅជុំវិញតំបន់បឹងកក់ ក៏ដូចជាពលរដ្ឋដែលធ្វើដំណើរកាត់តាមតំបន់នេះ បានបង្ហាញការសាទរចំពោះគម្រោងបើកផ្លូវថ្មីនៅតំបន់បឹងកក់ ដែលធ្វើឱ្យការធ្វើដំណើរកាន់តែងាយស្រួល កាត់បន្ថយការកកស្ទះចរាចរណ៍ និងចំណេញពេលវេលា។
កាលពីចុងសប្ដាហ៍កន្លងទៅនេះ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ថ្នាក់ដឹកនាំសមាគមឥស្លាមនៅកម្ពុជា ក្រុមហ៊ុនស៊ូកាកូអ៊ីន និងសណ្ឋាគារភ្នំពេញ បានជួបប្រជុំពិភាក្សាពីគម្រោងនៃការបើកផ្លូវពី R4 តភ្ជាប់ពីតំបន់បឹងកក់ ឆ្ពោះទៅកាន់មហាវិថីព្រះមុនីវង្ស ហើយជាលទ្ធផលនៃកិច្ចប្រជុំពិភាក្សានោះ ភាគីទាំងអស់ បានឯកភាគលើការបើកតម្រាយផ្លូវនេះ ដើម្បីសម្រួលដល់ចរាចរណ៍ និងកាត់បន្ថយការកកស្ទះ។
ការបើកផ្លូវថ្មីនេះតំបន់ដែលមានចរាចរណ៍មមាញឹកនេះដែរ ក៏ជាផែនការយុទ្ធសាស្ត្ររបស់ក្រសួងរៀបចំដែនដីនគរូបនីយកម្មនិងសំណង់ ក្នុងការរៀបចំទីក្រុងឱ្យមានសណ្ដាប់ធ្នាប់របៀបរៀបរយ បង្កលក្ខណៈងាយស្រួលដល់ប្រជាពលរដ្ឋនៅក្នុងរាជធានីភ្នំពេញ ។
អ្នកស្រី គៀត ផាវី ពលរដ្ឋរស់ខណ្ឌទួលគោក រាជធានីភ្នំពេញ ដែលស្ថិតនៅក្បែរតំបន់បឹងកក់បានបង្ហាញការសាទរចំពោះ ដំណឹងពីការបើកតម្រាយផ្លូវតភ្ជាប់ពីតំបន់បឹងកក់ទៅមហាវិថីព្រះមុនីវង្ស។ អ្នកស្រីបានលើកឡើងថា កន្លងមក ពេលអ្នកស្រីធ្វើដំណើរទៅកន្លែងធ្វើការម្ដង ពិតជាពិបាក ដោយសារតែផ្លូវដែលត្រូវឆ្លងកាត់ គឺកកស្ទះរៀងរាល់ពេលព្រឹក និងពេលល្ងាច ពីព្រោះតែពលរដ្ឋដទៃទៀតក៏ត្រូវធ្វើដំណើរទៅធ្វើការ និងត្រលប់មកផ្ទះ។
អ្នកស្រីបន្តថា បើសិនជាផ្លូវមួយនេះ បើកឱ្យពលរដ្ឋបានឆ្លងកាត់ នោះនឹងធ្វើឱ្យការធ្វើដំណើររបស់អ្នកស្រី ក៏ដូចជាពលរដ្ឋផ្សេងទៀត នឹងកាត់បន្ថយពេលវេលា ហើយមិនធ្វើឱ្យមានការកកស្ទះដូចជានៅតំបន់រង្វង់មូលគួចកាណុង និងស្តុបក្ដាន់ពីរជាដើម។
កញ្ញា ស៊ុំ ស្រីនុត ដែលតែងតែធ្វើឆ្លងកាត់តំបន់បឹងកក់ ដើម្បីទៅធ្វើការនៅតំបន់ជ្រោយចង្វារក៏បានលើកឡើងថា ការអភិវឌ្ឍផ្លូវថ្មីៗបន្ថែមនៅក្នុងរាជធានីភ្នំពេញ នឹងជួយកាត់បន្ថយការកកស្ទះបានមួយកម្រិត ពីព្រោះថាបច្ចុប្បន្នផ្លូវស្ទើរតែគ្រប់ខ្សែនៅភ្នំពេញពោរពេញទៅដោយចរារណ៍យ៉ាងមមាញឹក ហើយផ្លូវខ្លះបើសិនជាធ្វើដំណើរនៅពេលបុគ្គលិកឬសិស្សានុសិស្សចេញ គឺកកស្ទះមិនអាចទៅមុខបានទេ។
ក្នុងរយៈពេលប៉ុន្មានមកនេះ រដ្ឋបាលរាជធានីភ្នំពេញបានកសាងផ្លូវថ្មីៗ ជាបន្តបន្ទាប់នៅក្នុងដែនដីនៃរាជធានី ស្របនឹងកំណើនយានយន្តដោយសារតែកំណើនពលរដ្ឋនៅក្នុងរាជធានីភ្នំពេញកើនឡើងជាលំដាប់។ ការសាងសង់ផ្លូវថ្មីៗនេះដែរ ដើម្បីកាត់បន្ថយការកកស្ទះចរាចរណ៍ សម្រួលដល់ការធ្វើដំណើររបស់ប្រជាពលរដ្ឋ។
ការសាងសង់ផ្លូវថ្មីៗក៏នៅតែមិនអាចរំដោះចរាចរណ៍បាន ១០០ ភាគរយ ដូច្នេះរាជរដ្ឋាភិបាលក៏បានបញ្ចេញថវិការាប់សិបលានដុល្លារសាងសង់ស្ពានអាកាសនៅតំបន់ដែលមានការកកស្ទះខ្លាំង ដែលរហូតមកដល់ពេលនេះរដ្ឋាភិបាលបានសង់ស្ពានអាកាសចំនួន៨ហើយរួមមាន ស្ពានអាកាស៧មករា ស្ពានអាកាសស្ទឹងមានជ័យ ស្ពានអាកាសព្រះមុនីវង្សចាស់ ស្ពានអាកាសព្រះមុនីវង្សថ្មី ស្ពានអាកាសមរតតេជោ ស្ពានអាកាសតិចណូ ស្ពានអាកាសឬស្សីកែវ និងស្ពានអាកាសចោមចៅ ។
អ្នកជំនាញនៃវិស័យអចលនទ្រព្យជាច្រើនបានលើកឡើងពីសុទិដ្ឋិនិយមនៃតម្លៃ និងការអភិវឌ្ឍអចលនវត្ថុនៅតាមតំបន់ដែលមានហេដ្ឋារចនាសម្ព័ន្ធទំនើប ដូចជាផ្លូវធំទូលាយ បំពាក់ភ្លើងបំភ្លឺពេលរាត្រី ជាក់ស្ដែង តំបន់ដែលត្រូវបានអភិវឌ្ឍន៍ហេដ្ឋារចនាសម្ព័ន្ធថ្មីបានទាក់ទាញការវិនិយោគច្រើន ធ្វើឱ្យតំបន់នោះ កាន់តែរីកចម្រើន ដូចពាក្យមួយថា មានផ្លូវធ្វើឱ្យដីឡើងថ្លៃ៕
Account
Security
Favourite Content