ភ្នំពេញ៖ មហាសង្ក្រាន្តឆ្នាំថោះបញ្ចស័ក ពុទ្ធសករាជ ២៥៦៧ ចុល្លសករាជ១៣៨៥ គ្រឹស្តសករាជ ២០២៣ នឹងចូលមកនៅក្នុងថ្ងៃសុក្រ ៩ រោច ខែចេត្រ ត្រូវនឹងថ្ងៃទី ១៤ ខែមេសា ឆ្នាំ ២០២៣ វេលាម៉ោង ១៦:០០ នាទីរសៀល​។ ក្នុងឱកាសបុណ្យចូលឆ្នាំខ្មែរ គេហដ្ឋានត្រូវបានតុបតែងលម្អដោយផ្កាយ ភ្លើងទេពអប្សរ រុក្ខជាតិ និងការថ្វាយ អាហារ និងភេសជ្ជៈផ្សេងៗ។
សម្រាប់​ការ​រៀបរណ្ដាប់ទទួលទេវតា​ គឺ​តាមទំនៀមពីបុរាណរៀងមក ត្រូវរៀបរាងទទួលទេវតាឆ្នាំថ្មី នៅខាងមុខផ្ទះ​មួយសម្រាប់តាំងគ្រឿងពលីការផ្សេងៗ។ បន្ទាប់មក ត្រូវរៀបក្រាលសំពត់ពណ៌ស ឬពណ៌ក្រហម តាមលទ្ធភាព​ដែលមាន ហើយក្រៅពីនេះត្រូវរៀបចំនូវគ្រឿងសក្ការបូជាទេវតា មានជា​អាទិ៍៖ បាយសី ៩ ថ្នាក់មួយគូ បាយសី ៧ ថ្នាក់មួយគូ បាយសី ៥ ថ្នាក់មួយគូ បាយសី ៣ ថ្នាក់មួយគូ បាយសីប៉ាឆាមមួយគូ ស្លាធម៌មួយគូ ទឹកអប់មួយគូ ទៀន ៥ ធូប ៥ លាច ៥ ផ្កា ៥ ដាក់លើជើងពាន ១ គូ ចេកនួន ចេកណាំវ៉ាដាក់លើជើងពានមួយគូ ផ្លែឈើ ១១ ​មុខរៀបដាក់ជើងពាន ១១ គូ ដូងឡៅមួយគូ ទឹកស្អាតពីរកែវ។

រហូតដល់វេលាដែលទេវតាចុះមក ប្រជាជនខ្មែរត្រូវជួបជុំក្រុមគ្រួសារ ដើម្បីថ្វាយបង្គំព្រះនមស្សការ​ព្រះរតនៈត្រ័យ សមាទានសីល ហើយតាំងចិត្តឲ្យបានស្អាតបរិសុទ្ធជ្រះស្រឡះនូវមន្ទិលទាំងពួង តម្កល់ចិត្តរំពឹងគិតទៅលើព្រះពុទ្ធ ព្រះធម៌ ព្រះសង្ឃជាទីពឹងទីរឮក ដល់ចប់ពិធីទទួលទេវតា។

ចំពោះបាយសី ៩ ថ្នាក់ ៧ ថ្នាក់ ជាទំនៀមមានចែងនៅក្នុងសៀវភៅព្រះរាជពិធីទ្វារទសមាស និងមានអនុវត្តនៅព្រះបរមរាជវាំង តែចំពោះប្រជារាស្រ្ដគួរធ្វើត្រឹម ៥ ថ្នាក់ចុះមក ឬរៀបត្រឹមគ្រឿង​សក្ការបូជាដែលមានទៀន ៥ ធូប ៥ ស្លាធម៌ កូនចេកមួយគូ ក៏ល្មមសមគួរដែរ។ ចំពោះផ្លែឈើ​សម្រាប់​ប្រជារាស្រ្ដគួររៀបឱ្យបានត្រឹម ៣ ឬ ៥ មុខ ក៏ជាការប្រសើរ គឺរៀបទៅតាមធនធានរបស់ខ្លួន។ យ៉ាងណាមិញ នៅគ្រប់ដង្វាយទាំងអស់ត្រូវដាក់​ផ្កាម្លិះភួង​ពីលើគ្រប់ដង្វាយនៅលើជើងពាន និងលើបាយសីត្រូវដោតទៀន ហើយដុតបំភ្លឺ។

ទាក់ទិននឹងចំណុចនេះ លោកបណ្ឌិត ឈត ប៊ុនថង ប្រធានផ្នែកទំនាក់ទំនងវប្បធម៌ អប់រំ និងទេសចរណ៍​​នៃវិទ្យាស្ថានទំនាក់ទំនងអន្តរជាតិ នៃរាជបណ្ឌិតត្យសភាកម្ពុជា បានលើកឡើងអំពីការរៀបរណ្តាប់​ទទួលទេវតាឆ្នាំថ្មីនេះថា ជាការពិត ប្រពៃណីជាតិនីមួយ​ៗ តែងតែមាននូវការរៀប​រណ្តាប់​ ពិសេសប្រពៃណីជាតិខ្មែរ។ នៅក្នុងការរៀបរណ្ដាប់នូវគ្រឿងសក្ការបូជាទេវតា និងសំណែន​ផ្លែឈើផងដែរ គឺធ្វើឡើងស្របទៅតាមការទស្សន៍ទាយដែលបាន​ចងក្រងទុកមក ទៅតាមឆ្នាំនីមួយៗ។

លោក បណ្ឌិត បានលើកនូវសំណួរថា ៖

“ប្រសិនបើយើងមិនបានការគោរព ឬការរៀបរណ្តាប់មិនបាន​ត្រឹមត្រូវ មិនដូចតាមការចែង នៃទំនៀមទម្លាប់ តើការគោរពប្រណិបតន៍នេះមានផលប៉ះពាល់អ្វីដែរទេ?”

លោកបណ្ឌិតបានបញ្ជាក់ផងដែរថា នៅក្នុងរដ្ឋមួយ ពលរដ្ឋក្នុងសង្គមត្រូវគោរពទៅតាមការចែងរបស់​ច្បាប់ ដែលក្លាយជាទំនៀមទម្លាប់រៀងមក។ បើតាមការចែងនោះ ប្រសិនបើយើងមិនធ្វើបាន មានន័យថា ​យើងមិនបានអភិរក្សប្រពៃណីវប្បធម៌របស់យើងឱ្យត្រឹមត្រូវនោះទេ។

ក៏ប៉ុន្តែសម័យបច្ចុប្បន្នតាមទស្សនវិជ្ជា ជាក់ស្ដែង ការធ្វើដោយមិនបានអនុវត្តតាមក្បួនខ្នាតត្រឹមត្រូវ មិនមាន​ផលប៉ះពាល់ធ្ងន់ធ្ងរដល់អ្នកគោរពនោះទេ គ្រាន់តែគេចាត់ទុកថា យើងមិនបានអភិរក្ស។ នេះបើតាមការបញ្ជាក់បន្ថែមរបស់លោកបណ្ឌិត ឈត ប៊ុនថង។

បណ្ឌិត ឈត ប៊ុនថង បានកត់សម្គាល់ផងដែរអំពីការរៀបចំនេះថា ៖«ទី.១ គឺការជាក់ស្ដែង ទី.២ គឺដាក់អ្វីដែលជាផ្លែឈើសំខាន់ប្រចាំឆ្នាំ និងទី.៣គាត់មិនបានសែន និងរៀបរណ្តាប់» ។ លោកបណ្ឌិតបានគូសបញ្ជាក់ផងដែរថា បើរកមិនបានគ្រប់រណ្តាប់ ទៅតាមកំណត់​លំដាប់នៃឆ្នាំនោះ គឺយើងអាចដាក់រណ្តាប់ផ្សេងជំនួសបាន ព្រោះជួនកាលផ្លែឈើ ដែលបានកំណត់មានការឡើងថ្លៃ ឬមានមិនគ្រប់តម្រូវការជាដើម។ ចំណុចមួយទៀត គឺខកខានមិនបាន គឺការរៀបរណ្តាប់ ព្រោះ​ប្រជាជន​មួយចំនួន​ ធ្ចើដំណើរទៅលេង​កម្សាន្ដតាមតំបន់នានា និងមិនបានតាមដាន​ការរៀបរណ្តាប់ផង សម្រាប់​ចំណុច​នេះគឺ​អាចលើក​លែងបាន។

លោកបណ្ឌិត ឈត ប៊ុនថង ក៏បានសង្កត់ធ្ងន់ថា ការណ៍ដែលអាចធ្វើបាន វាធ្វើឱ្យយើងរក្សាទុកនូវ​ទំនៀមទម្លាប់ រៀងរាល់ឆ្នាំសម្រាប់ការគោរពតរៀងមក ហើយការណ៍ដែលយើងធ្វើបាន អភិរក្សបាន គោរពប្រណិប័តន៍បាន នោះវារឹតតែប្រសើរបំផុត៕