សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ គម្រោងវិនិយោគ និងអភិវឌ្ឍទីតាំងព្រលានយន្តហោះអន្តរជាតិសៀមរាបចាស់ ឱ្យក្លាយជាតំបន់អភិវឌ្ឍពហុមុខងារ ដែលរួមបញ្ចូលសេវាទេសចរណ៍ ពាណិជ្ជកម្ម ការកម្សាន្ត និងសកម្មភាពសេដ្ឋកិច្ចផ្សេងទៀត កំពុងស្ថិតក្នុងដំណាក់កាលពិភាក្សា និងពិគ្រោះយោបល់នៅឡើយ ដោយមិនទាន់មានការសម្រេចជាក់លាក់ណាមួយទេ។
ក្រុមហ៊ុន Angkor International Airport Investment (AIAI) ដែលជាក្រុមហ៊ុនអភិវឌ្ឍអាកាសយានដ្ឋានអន្តរជាតិសៀមរាបអង្គរ បានបង្ហាញគម្រោងអភិវឌ្ឍន៍សំខាន់ៗចំនួន៣ សម្រាប់ខេត្តសៀមរាប ក្នុងគោលបំណងទាក់ទាញភ្ញៀវទេសចរ និងវិនិយោគិនមកកាន់ខេត្តសៀមរាប និងកម្ពុជា។
គម្រោងទាំងនេះត្រូវបានលោក Lu Wei ប្រធានក្រុមប្រឹក្សាភិបាល AIAI បង្ហាញក្នុងជំនួបជាមួយឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ កាលពីចុងសប្ដាហ៍កន្លងទៅ។ គម្រោងទាំង៣ រួមមានការអភិវឌ្ឍផលិតផលទេសចរណ៍ទស្សនាអង្គរពេលរាត្រី គម្រោងអភិវឌ្ឍទីតាំងព្រលានយន្តហោះអន្តរជាតិសៀមរាបចាស់ និងការពង្រឹងកិច្ចសហប្រតិបត្តិការនាំភ្ញៀវទេសចរចិនមកកម្ពុជា។
សម្រាប់ទីតាំងព្រលានយន្តហោះចាស់ គម្រោងដែលបានលើកឡើងគឺការអភិវឌ្ឍទៅជាតំបន់ពហុមុខងារ ដែលអាចរួមបញ្ចូលសេវាទេសចរណ៍ ពាណិជ្ជកម្ម ការកម្សាន្ត និងសកម្មភាពសេដ្ឋកិច្ចផ្សេងទៀត។
ឯកឧត្តម ហួត ហាក់ បានបង្ហាញការគាំទ្រចំពោះគម្រោងនេះ និងស្នើឱ្យក្រុមហ៊ុនសិក្សា និងរៀបចំផែនការលម្អិតប្រកបដោយចីរភាព និងបរិយាបន្ន។ ឯកឧត្តមក៏បានលើកទឹកចិត្តឱ្យមានការបង្កើតផលិតផលទេសចរណ៍ថ្មីៗនៅតំបន់អង្គរ ដើម្បីបង្កើនបទពិសោធន៍របស់ភ្ញៀវ ពន្យារពេលស្នាក់នៅ និងជំរុញការចំណាយរបស់ភ្ញៀវទេសចរ។
ឯកឧត្តមបានបញ្ជាក់ថា ក្រសួងទេសចរណ៍នឹងបន្តធ្វើការជិតស្និទ្ធជាមួយក្រុមហ៊ុន និងភាគីពាក់ព័ន្ធ ដើម្បីអភិវឌ្ឍផលិតផលទេសចរណ៍ថ្មីៗ ពង្រឹងការតភ្ជាប់ផ្លូវអាកាស និងលើកកម្ពស់ភាពប្រកួតប្រជែងរបស់គោលដៅទេសចរណ៍កម្ពុជា។
ទោះជាយ៉ាងណា លោក ស៊ីន ចាន់ សេរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល បានប្រាប់បណ្ដាញព័ត៌មាន AMS នៅរសៀលថ្ងៃទី៣ ខែសីហា ឆ្នាំ២០២៦ថា គម្រោងនេះត្រូវបានក្រុមហ៊ុនលើកយកមកបង្ហាញជាយូរមកហើយ ប៉ុន្តែមិនទាន់មានការសិក្សាលម្អិតនៅឡើយ។
លោកបញ្ជាក់ថា ក្នុងរយៈពេលចុងក្រោយ ភាគីក្រុមហ៊ុនចិនបានមានការផ្លាស់ប្តូររចនាសម្ព័ន្ធក្រុមហ៊ុន ដូច្នេះព័ត៌មានលម្អិតពាក់ព័ន្ធនឹងគម្រោងនេះមិនទាន់មាននៅឡើយ។
លោក តុប សុភ័ក អ្នកនាំពាក្យក្រសួងទេសចរណ៍ ក៏បានបញ្ជាក់ថា គម្រោងអភិវឌ្ឍទីតាំងព្រលានយន្តហោះអន្តរជាតិសៀមរាបចាស់ កំពុងស្ថិតក្នុងដំណាក់កាលពិភាក្សា និងពិគ្រោះយោបល់ ហើយមិនទាន់មានការសម្រេចជាក់លាក់ណាមួយទេ។
លោកចាត់ទុកគម្រោងនេះថា ជាសញ្ញាណល្អសម្រាប់ការរៀបចំទីតាំងព្រលានយន្តហោះអន្តរជាតិសៀមរាបចាស់ឱ្យក្លាយជាតំបន់អភិវឌ្ឍពហុមុខងារ ដែលអាចជួយទាក់ទាញភ្ញៀវទេសចរជាតិ និងអន្តរជាតិ ព្រមទាំងវិនិយោគិនចូលមកកាន់ខេត្តសៀមរាប៕
Account
Security
Favourite Content