សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី Thailand Business News បានរាយការណ៍ថា ទីផ្សារលំនៅដ្ឋានរបស់ប្រទេសថៃកំពុងប្រឈមមុខនឹងបញ្ហាអវិជ្ជមានដោយសារកត្តាសំខាន់ៗមួយចំនួន ដែលកើតមានឡើងទាំងនៅក្នុងស្រុក និងនៅក្រៅស្រុក រួមមានដូចជា ការធ្លាក់ចុះនៃវិស័យអចលនទ្រព្យរបស់ចិន ការថយចុះតម្រូវការសំណង់ បំណុលគ្រួសារកើនឡើងខ្ពស់ និងការកើនឡើងនៃចំនួនប្រជាជនវ័យចំណាស់។
ការធ្លាក់ចុះនៃវិស័យអចលនទ្រព្យរបស់ចិនបាននាំឱ្យមានការធ្លាក់ចុះនៃតម្រូវការសំណង់ពិភពលោក ខណៈដែលការផ្គត់ផ្គង់ទីផ្សារគ្រឿងសំណង់ក្នុងតំបន់អាស៊ីអាគ្នេយ៍កើនឡើងលើសពីតម្រូវការ ដូចជា ដែកថែប និងគ្រឿងសំណង់ផ្សេងទៀត។ ជាលទ្ធផល បញ្ហាទាំងនេះបានធ្វើឱ្យមានការប្រកួតប្រជែងតម្លៃដោយបង្ខំឱ្យអាជីវកម្មថៃមួយចំនួនត្រូវបិទទ្វារ។ បន្ថែមពីនេះ ទីផ្សារលំនៅដ្ឋានរបស់ថៃក៏ប្រឈមមុខទៅនឹងសម្ពាធដែលបណ្តាលមកពីការធ្លាក់ចុះនៃវិស័យអចលនទ្រព្យរបស់ប្រទេសចិនផងដែរ ស្របពេលដែលបញ្ហាសេដ្ឋកិច្ចក្នុងស្រុករបស់ខ្លួនក៏កំពុងប្រឈម ដែលនាំឱ្យមានការកាត់បន្ថយការចំណាយរបស់អ្នកប្រើប្រាស់ និងការកាត់បន្ថយចំពោះកម្ចីទិញលំនៅដ្ឋាន។ នៅក្នុងត្រីមាសទី២ ឆ្នាំ២០២៤ បំណុលគ្រួសារថៃក្នុងស្រុកបានឈានដល់ ៨៩,៦ ភាគរយនៃផលិតផលក្នុងស្រុកសរុបដែលធ្វើឱ្យការចំណាយរបស់អ្នកប្រើប្រាស់កាន់តែតឹងតែង។
មិនត្រឹមតែប៉ុណ្ណោះ ការបដិសេធកម្ចីទិញផ្ទះសម្រាប់ប្រាក់កម្ចីក្រោម ៣ លានបាតបានកើនឡើងដល់ ៧០ ភាគរយ ដែលរារាំងដល់តម្រូវការលំនៅដ្ឋាន។ លើសពីនេះ ប្រជាជនវ័យចំណាស់របស់ថៃដែលមានអាយុលើសពី ៦០ឆ្នាំ មានអត្រាកើនឡើងរហូតដល់ ២០ភាគរយនៃចំនួនប្រជាជនសរុប ដែលបង្ហាញពីកំណើនយឺតនៃប្រជាជននាពេលអនាគត។ អ្នកដែលទិញផ្ទះភាគច្រើនមានអាយុចន្លោះពី ២៥ ទៅ ៣៤ ឆ្នាំ ដោយ ៣៥ ភាគរយនៃចំនួនសរុបមានប្រាក់ចំណូលប្រចាំខែចន្លោះពី ១៥ ០០០ បាតទៅ ៣០ ០០០ បាត។ យ៉ាងណាមិញ ការអនុម័តលើតំបន់សំណង់ទូទាំងប្រទេសបានធ្លាក់ចុះ ១៤,៩ ភាគរយធៀបនឹងឆ្នាំមុន ខណៈពេលដែល ៣២ ភាគរយនៃចំនួនអ្នកទិញផ្ទះកំពុងប្រឈមមុខនឹងបញ្ហាហិរញ្ញវត្ថុ។
លើសពីនេះ ខុនដូនៅក្រោមកម្មសិទ្ធិជនបរទេសក៏ធ្លាក់ចុះផងដែរ ដោយសារអ្នកអភិវឌ្ឍន៍ភាគច្រើនបានផ្លាស់ប្តូរពីខុនដូបែបមធ្យមទៅជាទីផ្សារបែបប្រណីតលំដាប់ខ្ពស់ ។ ការវិនិយោគបរទេសសម្រាប់ខុនដូបានធ្លាក់ចុះ ៦,២ ភាគរយនៅក្នុងត្រីមាសទី ២ ឆ្នាំ២០២៤ ខណៈដែលចំនួននៃការផ្ទេរសិទ្ធិជាម្ចាស់ខុនដូរធ្លាក់ចុះ ១៧,៧ ភាគរយ។ យ៉ាងណាក៏ដោយ បើទោះបីជាមានការកើនឡើងនៃចំនួនយូនីតលំដាប់ខ្ពស់ និងបែបប្រណីត ដែលមានតម្លៃចាប់ពី ១០ លានបាតឡើងទៅក៏ដោយ ប៉ុន្តែអចលនទ្រព្យដែលមានតម្លៃក្រោម ៣ លានបាតនៅតែមានប្រជាប្រិយភាព និងបានកើនឡើង ១២ ភាគរយជារៀងរាល់ឆ្នាំ បើគិតចាប់តាំងពីឆ្នាំ២០១៩ មក។
កាលពីខែមេសា កន្លងទៅ ធនាគារលំនៅដ្ឋានរដ្ឋាភិបាល GH Thai បានអនុម័តលើការបញ្ចុះតម្លៃ ០,០១ ភាគរយសម្រាប់ការផ្ទេរកម្មសិទ្ធិ និងការបញ្ចាំសម្រាប់ផ្ទះក្រោម ៧ លានបាត។ ធនាគារនេះក៏បានបើកដំណើរការគម្រោង “Happy Home” ដោយផ្តល់ប្រាក់កម្ចីការប្រាក់ទាបសម្រាប់អចលនទ្រព្យក្រោម ៣ លានបាតផងដែរ។ លើសពីនេះ ធនាគារកណ្តាលថៃបានអនុវត្តកម្មវិធីបង្រួបបង្រួមបំណុល ដោយបន្ធូរបន្ថយប្រាក់កម្ចីសម្រាប់លំនៅដ្ឋាន និងបំណុលផ្ទាល់ខ្លួន។ យ៉ាងណាក៏ដោយ បើទោះបីជារដ្ឋាភិបាលថៃបន្តជំរុញ និងជួយសម្របសម្រួលវិស័យអចលនទ្រព្យឱ្យមានភាពល្អប្រសើរក្ដី ប៉ុន្តែភាពប្រឈមនឹងបញ្ហានៅតែមានដដែល ជាពិសេសចំពោះអ្នកដែលមានចំណូលទាប៕
Account
Security
Favourite Content